ក្រសួងវប្បធម៌ និងវិចិត្រសិល្បៈ អះអាងថា វត្ថុបុរាណចំនួន៥ក្នុងចំណោម១០០រូប សាងពីថ្មនិងសំរឹទ្ធិ បានបញ្ជូនពីប្រទេសអង់គ្លេសត្រលប់មកដល់កម្ពុជាដាក់ជាសម្បត្តិវប្បធម៌ខ្មែរវិញ។
យោងតាមសេចក្ដីជូនព័ត៌មាននៅថ្ងៃទី២៩ ខែកញ្ញា ឆ្នាំ២០២១ របស់ក្រសួងវប្បធម៌ និងវិចិត្រសិល្បៈ អះអាងពីការបញ្ជូនវត្ថុបុរាណជាង១០០រូបពីអង់គ្លេសមកកម្ពុជា ដើម្បីដាក់ជាសម្បត្តិវប្បធម៌ខ្មែរ បន្ទាប់ពីចុះហត្ថលេខាលើកិច្ចព្រមព្រៀងរវាងរាជរដ្ឋាភិបាលកម្ពុជា និងគ្រួសារលោក ឌូគ្លាស ឡាចហ្វត (Douglas Latchford) ស្តីពីការបញ្ជូនវត្ថុបុរាណត្រឡប់មកធ្វើជាសម្បត្តិវប្បធម៌ខ្មែរវិញ ក្នុងនោះបដិមាជាង១០០អង្គ សាងពីថ្មនិងសំរឹទ្ធិ។
ក្រសួងបន្តថា៖ «ក្នុងដំណាក់កាលនេះ វត្ថុបុរាណដ៏ល្អឯក រួមមាន បដិមាថ្មព្រះសិវស្កន្ទ [ព្រះឥសូរនិងព្រះស្កន្ទ] មកពីប្រាសាទកោះកេរ្តិ៍ បដិមាថ្មព្រះអឌ្ឍនារីស្វរៈ [ព្រះឥសូរ និងនាងឧមា] និងកន្សៃទូកសំរឹទ្ធិ នឹងត្រូវបញ្ជូនពីប្រទេសអង់គ្លេសមកដល់កម្ពុជា នៅថ្ងៃទី២៩ ខែកញ្ញានេះ នឹងយកទៅរក្សាទុកនៅសារមន្ទីរជាតិភ្នំពេញ រង់ចាំរៀបចំពិធីប្រគល់-ទទួលជាផ្លូវការនៅពេលវេលាណាមួយដែលសមស្រប តាមការសម្រេចរបស់រាជរដ្ឋាភិបាល»។
កាលពីខែមករា ឆ្នាំ២០២១ កម្ពុជាធ្លាប់បានទទួលបុរាណវត្ថុខ្មែរជាង១០០ពីសហរដ្ឋអាមេរិកដែលមានអាយុកាលច្រើនសតវត្សរ៍ ក្រោយមានការឯកភាពពីកូនស្រីរបស់លោក Douglas Latchford ដែលជាអ្នកជំនាញបុរាណវត្ថុ និងជាជនជាតិអង់គ្លេសមួយរូបផងដែរ។
កាលពីថ្ងៃទី៩ ខែមិថុនា ឆ្នាំ២០២១ ភាគីកម្ពុជា-អាមេរិកបានចុះកិច្ចព្រមព្រៀងមួយដោយសហរដ្ឋអាមេរិកបានសម្រេចបញ្ជូនសម្បត្តិវប្បធម៌ខ្មែរចំនួន២៧រូបដែលរឹបអូសបានពីបទកាន់កាប់បុរាណវត្ថុដោយខុសច្បាប់ នៅទីក្រុងញូវយ៉ក ប្រគល់ជូនកម្ពុជាវិញ។ សម្បត្តិវប្បធម៌ខ្មែរចំនួន២៧រូបនោះ មានរូបបដិមាផ្នែកពុទ្ធសាសនានិងព្រហ្មញ្ញសាសនាសម័យអង្គរសំខាន់ៗដូចជា ព្រះពុទ្ធគង់សមាធិលើនាគធ្វើពីសំរឹទ្ធិ រូបព្រះឥសូរ និងព្រះនាងប្រាជ្ញាបារមិតា សាងពីថ្មភក់ ជាដើម៕