មន្ត្រីក្រសួងយុត្តិធម៌លើកឡើងថា ការសម្រេចដករាល់ការចោទប្រកាន់ទាំងឡាយទៅលើលោក យឹម ស៊ីណន និងបក្ខពួក ដែលជាអតីតសកម្មជនបក្សប្រឆាំង បានឬមិនបានអាស្រ័យលើសិទ្ធិសម្រេចរបស់តុលាការតែប៉ុណ្ណោះ។
កាលពីថ្ងៃពុធម្សិលមិញ អតីតប្រធានចលនាយុវជនគណបក្សសង្រ្គោះជាតិប្រចាំប្រទេសកូរ៉េខាងត្បូង លោក យឹម ស៊ីណន និងបក្ខពួកចំនួន៩នាក់ផ្សេងទៀត បានផ្ញើលិខិតមួយស្នើសុំកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ជួយស្នើដល់អាជ្ញាធរមានសមត្ថកិច្ចដកការចោទប្រកាន់ទាំងឡាយទៅលើរូបលោកនិងបក្ខពួកដែលជាប់ពាក់ព័ន្ធនឹងព្រឹត្តិការណ៍វិលចូលស្រុករបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩។
ជាការឆ្លើយតបលិខិតស្នើសុំរបស់លោក យឹម ស៊ីណន កាលពីយប់មិញ តាមរយៈសារព័ត៌មានស្និទ្ធរដ្ឋាភិបាល Fresh News លោកនាយករដ្ឋមន្ត្រី ហ៊ុន សែន បញ្ជាក់ថា លោកទទួលបានលិខិតនោះរួចហើយ។ ជាមួយគ្នានេះ លោកក៏បានផ្ញើលិខិតរបស់អតីតប្រធានចលនាយុវជនគណបក្សសង្គ្រោះជាតិរូបនេះ ជូនទៅលោក កើត រិទ្ធ រដ្ឋមន្រ្តីក្រសួងយុត្តិធម៌ ដើម្បីពិនិត្យមើលបញ្ហាទាំងឡាយ និងខិតខំរកដំណោះស្រាយឱ្យពួកគេទទួលបានយុត្តិធម៌ ខណៈតុលាការបានចោទប្រកាន់ពួកគេពាក់ព័ន្ធនឹងព្រឹត្តិការណ៍វិលចូលស្រុករបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានប្រាប់ វីអូឌី តាមតេឡេក្រាមនៅថ្ងៃទី៣០ ខែកញ្ញានេះថា ក្រសួងបានទទួលលិខិតរបស់លោក យឹម ស៊ីណន តាមរយៈលោកនាយករដ្ឋមន្ត្រី ហ៊ុន សែន ហើយ។ ប៉ុន្តែលោកពន្យល់តាមនីតិវិធីច្បាប់ថា ការសម្រេចដកការចោទប្រកាន់ទាំងឡាយណាបាន អាស្រ័យលើជនល្មើសចូលខ្លួនមកសារភាព និងសហការជាមួយតុលាការ ដើម្បីចាប់មេខ្លោងមកអនុវត្តទោសតាមច្បាប់។
លោកថា៖ «ជាគោលការណ៍ច្បាប់ សំណុំរឿងដែលនៅក្នុងដំណើរការនីតិវិធីរបស់តុលាការ ការសម្រេចយ៉ាងណាជាឆន្ទានុសិទ្ធិរបស់តុលាការ។ ហើយគ្រប់ភាគីទាំងអស់មានសិទ្ធិស្នើ ទាំងរដ្ឋាភិបាល សង្គមស៊ីវិល ឬមួយមេធាវី ឬមួយជនជាប់ចោទគ្រប់រូបក៏មានសិទ្ធិស្នើសុំឱ្យទម្លាក់បទចោទឬការបន្ធូរបន្ថយណាមួយ ក៏ប៉ុន្តែការសម្រេចយ៉ាងណានោះ គឺនៅលើតុលាការដែលជាស្ថាប័នឯករាជ្យ»។
លោកពន្យល់ទៀតថា៖ «ក៏ប៉ុន្តែជានីតិវិធីរបស់តុលាការ កាលណាមានការសហការពីជនជាប់ចោទមានការចូលរួម មានការសារភាព មានការដឹងកំហុស ជួយដល់តុលាការក្នុងការស៊ើបអង្កេតបំបែកសំណុំរឿងផ្សេងៗទៀតបាន បើផ្អែកលើទិដ្ឋភាពច្បាប់ គេអាចពិចារណាអាចទម្លាក់ចោលបទចោទ ឬប្តូរបទចោទ ឬការអនុគ្រោះតាមផ្លូវច្បាប់ណាមួយ»។
វីអូឌី មិនអាចសុំការបំភ្លឺពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ ខណៈលោក យឹម ស៊ីណន ក៏មិនអាចសុំការបំភ្លឺបន្ថែមបានដែរ។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មានប្រសាសន៍ថា សំណុំរឿងលោក យឹម ស៊ីណន និងបក្ខពួក ពាក់ព័ន្ធនឹងរឿងនយោបាយ ដូច្នេះបើចង់ដកការចោទប្រកាន់វិញបាន លុះត្រាតែរដ្ឋាភិបាលស្នើទៅតុលាការផ្ទាល់ ដូចករណីលោកបណ្ឌិត សេង សេរី ជាដើម។
លោកមានប្រសាសន៍ថា៖ «ការចោទប្រកាន់ពីដើមទីមក ពាក់ព័ន្ធនឹងរឿងនយោបាយរួចទៅហើយ ដូច្នេះមានតែការចរចាក្នុងផ្លូវនយោបាយទេ ទើបអាចមានដំណោះស្រាយល្អប្រសើរជាងនេះ ពីព្រោះតុលាការ កាលណាមានការដាក់ពាក្យឬក៏មានការដកពាក្យពីម្ចាស់ដើមបណ្តឹងហើយ អ្វីៗតុលាការនឹងរៀបចំតាមនីតិវិធីហ្នឹង។ ហើយខ្វះខាតកន្លែងណា គេច្បាស់ជាជជែកត្រូវរ៉ូវគ្នាក្នុងកម្រិតណា ហើយខាងតុលាការនឹងប្រាប់ទៅខាងដើមបណ្ដឹងនិងចុងបណ្ដឹងហ្នឹងហើយ ថាតើពួកគាត់ត្រូវដោះស្រាយគ្នារបៀបម៉េច ដើម្បីរំលត់បណ្ដឹងអាជ្ញានោះ»។
ព្រឹត្តិការណ៍៩វិច្ឆិកា ឆ្នាំ២០១៩ ត្រូវបានបង្កើតឡើងដោយលោក សម រង្ស៉ី ប្រធានអតីតគណបក្សសង្រ្គោះជាតិ ដោយកំណត់ពេលវិលត្រលប់មកប្រទេសកម្ពុជាវិញ ជាមួយនឹងការអំពាវនាវឱ្យកងកម្លាំងប្រដាប់អាវុធប្រឆាំងរាជរដ្ឋាភិបាល និងអំពាវនាវឱ្យប្រជាពលរដ្ឋងើបបះបោរ។
ព្រឹត្តិការណ៍នេះបណ្ដាលឱ្យមានការចាប់ខ្លួនអតីតសកម្មជននិងមន្ត្រីអតីតបក្សប្រឆាំងជាច្រើននាក់ ប៉ុន្តែអ្នកខ្លះក៏ត្រូវបានដោះលែងវិញ ហើយខ្លះទៀតកំពុងជាប់ឃុំនៅឡើយ និងមួយចំនួនទៀតកំពុងរត់ភៀសខ្លួនទៅក្រៅប្រទេសថែមទៀតផង។
ក្រោយពីបរាជ័យក្នុងដំណើរមាតុភូមិនិវត្តន៍របស់លោក សម រង្ស៊ី នៅថ្ងៃទី៩ ខែវិច្ឆិកា ឆ្នាំ២០១៩នោះ នៅដើមឆ្នាំ២០២១នេះ ថ្នាក់ដឹកនាំអតីតគណបក្សប្រឆាំងមួយនេះដែលដឹកនាំដោយ លោកស្រី មូរ សុខហួរ ក៏បានបរាជ័យក្នុងការធ្វើដំណើរមកមាតុប្រទេសវិញដែរ ដែលកាលណោះ ពួកគេមានគម្រោងមកកម្ពុជាវិញ ដើម្បីជួបចរចានយោបាយជាមួយលោកនាយករដ្ឋមន្ត្រី ហ៊ុន សែន៕
