អាជ្ញាធរខេត្តព្រះសីហនុ បំភ្លឺជុំវិញការស្លាប់បុគ្គលិកធ្វើការនៅកាស៊ីណូ ដឹសេនជូរី បន្ទាប់ពីមានការផ្សព្វផ្សាយថា ការស្លាប់នោះដោយសារកើតជំងឺកូវីដ-១៩ និងបង្ខាំងបុគ្គលិកឱ្យធ្វើការងារទាំងឈឺ។
កាលពីម្សិលមិញនេះ បុគ្គលធ្វើការនៅកាស៊ីណូ ដឹសេនជូរី ស្ថិតនៅភូមិ៥ សង្កាត់លេខ៤ ក្រុងព្រះសីហនុ បានរាយការណ៍ប្រាប់អ្នកសារព័ត៌មានថា បុគ្គលម្នាក់បានស្លាប់ និងជាង៤០០នាក់ផ្សេងទៀតត្រូវបានបង្ខាំងឱ្យធ្វើការងារទាំងមានជំងឺកូវីដ-១៩។
ក្រោយមានការផ្សព្វផ្សាយនេះ រដ្ឋបាលខេត្តព្រះសីហនុ កាលពីល្ងាចថ្ងៃទី៣០ ខែកញ្ញា ឆ្នាំ២០២១ បានចេញសេចក្តីបំភ្លឺមួយដោយបញ្ជាក់ថា មូលហេតុនៃការស្លាប់របស់បុគ្គលិកកាស៊ីណូដឹសេនជូរី ឈ្មោះ ហៀ ស្រីនីច អាយុ២៨ឆ្នាំ កាលពីម្សិលមិញ គឺដោយសារពុលអាហារ។
រដ្ឋបាលខេត្តបានគូសបញ្ជាក់ថា កាលពីថ្ងៃទី២៩ ខែកញ្ញា ឆ្នាំ២០២១ ស្ត្រីរូបនេះមានអាការក្អួត ហើយក្រុមគ្រូពេទ្យបានចុះពិនិត្យនិងផ្តល់ថ្នាំសម្រាប់ព្យាបាល។ ហើយនៅថ្ងៃបន្ទាប់ អ្នកជំងឺមានអាការមិនធូរស្រាលនិងបាត់បងជាតិទឹកច្រើន ក៏បានស្លាប់តែម្តង។ រដ្ឋបាលខេត្តបន្តថា តាមការបញ្ជាក់ពីក្រុមគ្រូពេទ្យជំនាញ ការស្លាប់នេះគឺដោយសារពុលអាហារ។
រដ្ឋបាលខេត្តព្រះសីហនុបានបន្ថែមថា កាលពីថ្ងៃទី២៦ ខែកញ្ញានេះ អាជ្ញាធរខេត្តបានសម្រេចយកទីតាំងកាស៊ីណូ ដឹសេនជូរី ធ្វើជាមណ្ឌលធ្វើចត្តាឡីស័ក និងជាកន្លែងព្យាបាលអ្នកជំងឺកូវីដ-១៩ ក្រោយពិនិត្យឃើញបុគ្គលិកបម្រើការងារនៅកាស៊ីណូនេះឆ្លងជំងឺកូវីដ-១៩ច្រើនពេក ប៉ុន្តែក៏បានផ្តល់ជម្រើសដល់អ្នកជំងឺក្នុងការជ្រើសរើសកន្លែងព្យាបាលផងដែរថា ពួកគេចង់ព្យាបាលនៅទីនេះ ឬទៅសម្រាកព្យាបាលនៅមន្ទីរពេទ្យខាងក្រៅ។
រដ្ឋបាលខេត្តអះអាងថា ចំពោះអ្នកជំងឺសម្រាកព្យាបាលនៅកន្លែងកាស៊ីណូនេះ ត្រូវបានក្រុមគ្រូពេទ្យចុះពិនិត្យព្យាបាលដោយយកចិត្តទុកដាក់ និងតាមដានសុខភាពអ្នកជំងឺជាប្រចាំ ហើយមានការផ្តល់អាហារ៤ពេលពីម្ចាស់កាស៊ីណូផងដែរ។ រដ្ឋបាលខេត្តក៏បានច្រានចោលចំពោះការផ្សព្វផ្សាយតាមបណ្តាញសង្គម ដែលថា អាជ្ញាធរមិនបានយកបុគ្គលិកកាស៊ីណូដែលវិជ្ជមានជំងឺកូវីដ-១៩ទៅព្យាបាល។
ចំពោះការលើកឡើងថា មានការបង្ខាំងឱ្យបុគ្គលធ្វើការងារទាំងឈឺដោយគ្មានការព្រមព្រៀងនោះ អាជ្ញាធរខេត្តនេះនឹងស៊ើបអង្កេតឱ្យបានលម្អិត ហើយថា ប្រសិនបើរកឃើញដូចការលើកឡើងមែននោះ រដ្ឋបាលខេត្តនឹងចាត់វិធានការច្បាប់ដោយគ្មានការលើកលែងឡើយ។
រដ្ឋបាលខេត្តបញ្ជាក់ថា៖ «ក្នុងករណីបងប្អូនដែលកំពុងសម្រាកព្យាបាលនៅក្នុងទីតាំងខាងនេះ មានបំណងចង់ប្តូរទៅសម្រាកនៅមន្ទីរពេទ្យផ្សេង សូមទំនាក់ទំនងក្រុមការងារប្រចាំការ លេខទូរសព្ទ ០៩៣ ៩៩៩ ១៦៨ ដើម្បីធ្វើការសម្របសម្រួលជូន»។
បុគ្គលិកម្នាក់ដែលអះអាងថា ជាប្រធានគ្រប់គ្រងផ្នែករៀបចំបៀរនៅកាស៊ីណូ ដឹសេនជូរី ប្រាប់ វីអូឌី ក្នុងលក្ខខណ្ឌសុំមិនបញ្ចេញឈ្មោះកាលពីម្សិលមិញថា កាស៊ីណូ ដឹសេនជូរី ដែលជាកាស៊ីណូលេងល្បែងស៊ីសងតាមអនឡាញ មានបុគ្គលិកសរុបចំនួន៤៣៧នាក់។ បុគ្គលិករូបនេះអះអាងថា បុគ្គលិកជាង៤០០នាក់បានឆ្លងជំងឺកូវីដ-១៩ និងបង្ខាំងឱ្យធ្វើការងារទាំងឈឺ ដោយពុំមានគ្រូពេទ្យប្រចាំការជួយព្យាបាលឡើយ។
ប៉ុន្តែយ៉ាងណា ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តព្រះសីហនុ លោក យ៉ូវ ខេមរា អះអាងថា មានបុគ្គលិកតែជាង២០០នាក់ប៉ុណ្ណោះបានឆ្លងជំងឺកូវីដ-១៩ ហើយអាជ្ញាធរក៏មិនអនុញ្ញាតឱ្យមានការបង្ខិតបង្ខំបុគ្គលិកធ្វើការងារទាំងឈឺឡើយ៕
