បើទោះបីជាមានការសន្យារបស់ខ្លួនក្នុងការផ្ដល់ការអប់រំដល់ក្មេងស្រីក៏ដោយ ពួកតាលីបង់បច្ចុប្បន្ន នៅតែមិនទាន់បានអនុញ្ញាតឱ្យសិស្សស្រីពីកម្រិតអនុវិទ្យាល័យចូលទៅកាន់ថ្នាក់រៀនឡើងវិញនៅឡើយ។
ទាក់ទិននឹងករណីនេះ គ្រូបង្រៀននិងសិស្សនៅទីក្រុងកាប៊ុល ស្ថិតនៅក្នុងចំណោមអ្នកដែលមានការព្រួយបារម្ភខ្លាំងអំពីអនាគតរបស់ពួកគេ។
គ្រូបង្រៀននៅកម្រិតវិទ្យាល័យមួយរូប អ្នកស្រី Shaima Samih យល់ថា ការវិលត្រឡប់ទៅរកការគ្រប់គ្រងរបស់តាលីបង់វិញនេះ គឺគ្មានអ្វីក្រៅពីការបញ្ចប់អាជីពនេះនោះទេ។
គួរបញ្ជាក់ថា បុគ្គលិកជាស្រ្តីជាច្រើននាក់ដូចជា អ្នកស្រី Shaima Samih មិនអាចត្រលប់ទៅបំពេញកិច្ចការងារបាននោះទេ ចាប់តាំងពីពួកតាលីបង់បានឡើងកាន់អំណាចកាលពីខែសីហាកន្លងទៅ។
បន្ទាប់ពីបញ្ចប់ការអធិដ្ឋាននៅផ្ទះរបស់ខ្លួនក្នុងទីក្រុងកាប៊ុល អ្នកស្រី Shaima Samih ដែលជាអ្នកផ្គត់ផ្គង់តែមួយគត់សម្រាប់គ្រួសារមួយដែលមានសមាជិក៧នាក់ បានទទូចឱ្យរដ្ឋាភិបាលតាលីបង់ បើកសាលារៀនឡើងវិញ។
អ្នកស្រីថា៖ «ប្រសិនបើគ្រូបង្រៀនជាស្ត្រីដែលជាអ្នកផ្គត់ផ្គង់តែម្នាក់គត់នៅក្នុងគ្រួសារដូចរូបខ្ញុំ ក៏ដូចជាស្ត្រីដទៃទៀតដែលមានទំនួលខុសត្រូវបែបនេះ តម្រូវឱ្យនៅតែក្នុងផ្ទះ ហើយមិនអនុញ្ញាតឱ្យធ្វើការងារអ្វីនោះទេ តើអនាគតរបស់ពួកគេនិងកូនៗរបស់ពួកគេនឹងទៅជាយ៉ាងណា? ក្នុងករណីនេះ ពួកគេអាចធ្លាក់ចូលទៅក្នុងអំពើពេស្យាចារបាន»។
ទោះជាយ៉ាងណាក្ដី មន្រ្តីតាលីបង់ធ្លាប់បានលើកឡើងថា ពួកគេនឹងមិនអនុវត្តតាមគោលនយោបាយមូលដ្ឋានគ្រឹះនៃច្បាប់មុនៗរបស់ពួកគេ ដោយការអប់រំស្ត្រីត្រូវបានហាមឃាត់នោះឡើយ។
ពួកគេបានសន្យាថា ក្មេងស្រីអាចរៀនសូត្របានក្នុងលក្ខខណ្ឌដែលថ្នាក់រៀនត្រូវបែងចែកដាច់ដោយឡែកពីគ្នា។
យុវសិស្សមួយរូបនៅទីក្រុងកាប៊ុល ឈ្មោះ Marwa ថ្លែងថា ខ្លួនចង់ត្រលប់ទៅកាន់ថ្នាក់រៀនវិញ។
ប៉ុន្តែក្មេងស្រីនៅថ្នាក់អនុវិទ្យាល័យនិងកម្រិតខ្ពស់ជាងនេះមិនត្រូវបានអនុញ្ញាតឱ្យត្រលប់ទៅកាន់ថ្នាក់រៀនវិញនោះទេ ខណៈដែលស្ថាប័នអប់រំភាគច្រើននៅតែបន្តបិទទ្វារនៅឡើយ។
យុវសិស្សរូបនេះបន្តថា៖ «បន្ទាប់ពីការចូលកាន់កាប់នៃពួកតាលីបង់ ពួកគេលែងអនុញ្ញាតឱ្យយើងទៅកាន់សាលារៀនហើយ ដែលធ្វើឱ្យអនាគតរបស់យើងមានភាពមិនច្បាស់លាស់។ ខ្ញុំតែងតែប្រាថ្នាចង់ក្លាយទៅជាវេជ្ជបណ្ឌិតដ៏ឆ្នើមម្នាក់ ដើម្បីបម្រើប្រជាជនខ្ញុំ ប្រទេសខ្ញុំ គ្រួសារខ្ញុំ និងការងារនៅក្នុងសហគមន៍។ ប៉ុន្តែឥលូវនេះ ខ្ញុំមិនច្បាស់ថា អនាគតខ្ញុំនឹងទៅជាយ៉ាងណានោះទេ»។
ស្របពេលដែលពួកតាលីបង់មិនបានបញ្ជាឱ្យបិទសាលារៀនទាំងស្រុងបន្ទាប់ពីឡើងកាន់កាប់អំណាច ពួកគេថ្លែងថា សកម្មភាពជាច្រើនសម្រាប់ស្ត្រីនិងក្មេងស្រីនៅមិនទាន់អាចធ្វើទៅបាននោះទេ ដោយសារតែស្ថានភាពសន្តិសុខ។
ក្រុមតាលីបង់ បានលើកឡើងកាលពីសប្តាហ៍មុនផងដែរថា ពួកគេនឹងបើកសាលារៀនសម្រាប់តែសិស្សប្រុសនៅកម្រិតវិទ្យាល័យតែប៉ុណ្ណោះ ខណៈដែលវាបង្កឱ្យមានជាមន្ទិលសង្ស័យអំពីការសន្យារបស់ពួកគេទាក់ទងទៅនឹងការគោរពសិទ្ធិស្ត្រីនៅក្នុងប្រទេស៕
