ក្រសួងសាធារណការ និងដឹកជញ្ជូន ណែនាំដល់ក្រុមហ៊ុនដឹកជញ្ជូននិងអ្នកដំណើរទាំងអស់បន្តយកចិត្តទុកដាក់អនុវត្តវិធានការបង្ការនិងទប់ស្កាត់ការឆ្លងរាលដាលនៃជំងឺ-១៩ ក្នុងអំឡុងពេលនិងក្រោយពេលពិធីបុណ្យភ្ជុំបិណ្ឌ ខណៈជំងឺនេះឆ្លងក្នុងព្រឹត្តិការណ៍«សហគមន៍២០កុម្ភៈ» មិនទាន់បិទបញ្ចប់នៅឡើយ។
ការណែនាំនេះធ្វើឡើងបន្ទាប់ពីក្រសួងសង្កេតឃើញថា ក្រុមហ៊ុនដឹកអ្នកដំណើរមួយចំនួនបានដឹកប្រជាពលរដ្ឋប្រជ្រៀតគ្នា មិនរក្សាគម្លាត ដោយមិនគោរពតាមណែនាំរបស់ក្រសួង ដើម្បីទប់ស្កាត់ការឆ្លងរាលដាលនៃជំងឺ-១៩។
ក្នុងសេចក្ដីណែនាំរបស់ក្រសួងសាធារណការ និងដឹកជញ្ជូន បានឱ្យដឹងកាលពីថ្ងៃទី៤ ខែតុលា ម្សិលមិញនេះថា ម្ចាស់ក្រុមហ៊ុនដឹកជញ្ជូនទាំងអស់ត្រូវចូលរួមអនុវត្តសារាចរណែនាំរបស់រដ្ឋាភិបាលស្តីពីការពង្រឹងវិធានការគ្រប់គ្រងការឆ្លងរាលដាលនៃជំងឺកូវីដ-១៩ សម្រាប់អំឡុងពេលនិងក្រោយពេលបុណ្យភ្ជុំបិណ្ឌឱ្យមានប្រសិទ្ធភាពខ្ពស់ ដោយបន្តអនុវត្តវិធានការបង្ការនិងទប់ស្កាត់ការរីករាលដាលនៃជំងឺកូវីដ-១៩។
ក្រសួងបញ្ជាក់ថា វិធានការដែលត្រូវអនុវត្តទាំងនោះ រួមមាន ត្រូវរក្សាគម្លាតសុវត្ថិភាពយ៉ាងតិច១,៥ម៉ែត្រ និងកាត់បន្ថយចំនួនផ្ទុកអ្នកដំណើរឱ្យបានជាអប្បបរមា ព្រមទាំងផ្តល់សម្អាតកន្លែងផ្តល់សេវាដល់អតិថិជនឱ្យបានស្អាតជានិច្ច ជាពិសេសកន្លែងលក់សំបុត្រ កន្លែងរង់ចាំ កន្លែងទទួលទានអាហារ និងបង្គន់អនាម័យ។
ចំណែកអ្នកបើកបរត្រូវត្រួតពិនិត្យសុខភាពអ្នកបើកបរនិងបុគ្គលិកបម្រើសេវាជាប្រចាំ ត្រូវពាក់ម៉ាស់ក្នុងពេលបំពេញការងារ ក្នុងករណីសង្ស័យលើសុខភាព ត្រូវឈប់សម្រាកជាបណ្តោះអាសន្នដើម្បីតាមដានសុខភាព ហើយក្នុងរថយន្តត្រូវប្រើអាល់កុលសម្លាប់មេរោគ ដោយប្រកាន់ខ្ជាប់ «៣កុំ ៣ការពារ» ជាដើម ។
ចំពោះអ្នកដំណើរវិញ ត្រូវវាស់កម្ដៅ ពាក់ម៉ាស់ ប្រើទឹកអាល់កុលលាងដៃ ពាក់ម៉ាស់មុននឹងអនុញ្ញាតឱ្យឡើងលើរថយន្ត បើសិនជាមានអាការមិនស្រួលខ្លួន ក្តៅលើសពី៣៧,២អង្សាសេ ឬក្អក ឬឈឺបំពង់ក ឬមានបញ្ហាដកដង្ហើម មិនអនុញ្ញាតឱ្យឡើងជិះរថយន្តឡើយ ហើយត្រូវណែនាំគាត់ឱ្យទៅមណ្ឌលសុខភាពនៅជិតបំផុត ឬទូរសព្ទទាន់ហេតុការណ៍លេខ ១១៥ របស់ក្រសួងសុខាភិបាល ។
បើតាមក្រសួងសុខាភិបាល គិតត្រឹមព្រឹកថ្ងៃអង្គារនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១១៣ ៧០៣នាក់ ក្នុងនោះ អ្នកជំងឺព្យាបាលជាសះស្បើយចំនួន១០៥ ៣៥០នាក់ អ្នកស្លាប់កើនដល់ចំនួន២ ៤១៨នាក់ និងករណីនាំចូលពីក្រៅប្រទេសចំនួន១៩ ១៣៦នាក់៕
