មន្រ្តីជាន់ខ្ពស់អាមេរិកមួយរូបបានឱ្យដឹងបន្ទាប់ពីកិច្ចប្រជុំរវាងមន្រ្តីជាន់ខ្ពស់នៃសហរដ្ឋអាមេរិកនិងចិន កាលពីថ្ងៃពុធកន្លងទៅថា ប្រធានាធិបតីសហរដ្ឋអាមេរិក លោក ចូ បៃដិន និងប្រធានាធិបតីចិន លោក ស៊ី ជីនពីង បានព្រមព្រៀងក្នុងការជួបពិភាក្សាគ្នា ដែលជំនួបនោះនឹងធ្វើឡើងតាមរយៈប្រព័ន្ធវីដេអូនៅចុងឆ្នាំនេះ។
ប្រភពដដែលបន្តថា កិច្ចពិភាក្សាបិទទ្វារដែលធ្វើឡើងកាលពីថ្ងៃពុធ បានផ្ដោតលើការតាមដានបញ្ហាមួយចំនួនដែលត្រូវបានលើកឡើងក្នុងអំឡុងកិច្ចពិភាក្សាតាមរយៈទូរសព្ទរវាងមេដឹកនាំនៃប្រទេសទាំងពីរកាលពីខែមុន។
ជំនួបរវាងទីប្រឹក្សាសន្តិសុខជាតិរបស់សេតវិមាន លោក Jake Sullivan និងអ្នកការទូតកំពូលចិន លោក Yang Jiechi ក៏ជាការជួបពិភាក្សាគ្នាដោយផ្ទាល់លើកទីមួយផងដែរ គិតចាប់តាំងពីកិច្ចប្រជុំកំពូលសាធារណៈយ៉ាងតានតឹងនៅរដ្ឋអាឡាស្កា កាលពីខែមីនា។
ទាក់ទិននឹងជំនួបនេះ សេតវិមានបានឱ្យដឹងថា លោក Jake Sullivan បានលើកឡើងអំពីកង្វល់ទាក់ទងទៅនឹងសកម្មភាពរបស់ចិននៅសមុទ្រចិនខាងត្បូង កំណត់ត្រាសិទ្ធិមនុស្សរបស់ទីក្រុងប៉េកាំង និងជំហររបស់ខ្លួនលើទីក្រុងហុងកុង ស៊ីនជាំង និងតៃវ៉ាន់ ខណៈដែលកិច្ចពិភាក្សានេះមានលក្ខណៈស្ថាបនានិងស្មោះត្រង់ ខុសពីកិច្ចប្រជុំដែលប្រព្រឹត្តទៅនៅរដ្ឋអាឡាស្កា។
គួរបញ្ជាក់ថា ជំនួបតាមរយៈទូរសព្ទរវាងលោក ចូ បៃដិន និងលោក ស៊ី ជីនពីង ក្នុងខែកញ្ញាកន្លងទៅ ផ្ដោតសំខាន់អំពីតម្រូវការ ដើម្បីធានាថាការប្រកួតប្រជែងរបស់ពួកគេមិនធ្លាក់ចូលទៅក្នុងជម្លោះ ខណៈដែលប្រធានបទនេះក៏ត្រូវបានលើកឡើងសារជាថ្មីម្តងទៀតក្នុងអំឡុងកិច្ចពិភាក្សាកាលពីថ្ងៃពុធផងដែរ។
កាលពីថ្ងៃអង្គារ លោក ចូ បៃដិន ក៏បានឱ្យដឹងផងដែរថា រូបលោកនិងលោក ស៊ី ជីនពីង បានបញ្ជាក់ជាថ្មីពីការប្ដេជ្ញាចិត្តរបស់ខ្លួនចំពោះ «កិច្ចព្រមព្រៀងកោះតៃវ៉ាន់» ដោយរំពឹងថា អនាគតរបស់ដែនដីកោះមួយនេះនឹងត្រូវបានកំណត់ដោយសន្តិវិធី។
ការថ្លែងរបស់ប្រធានាធិបតីសហរដ្ឋអាមេរិករូបនេះ ធ្វើឡើងបន្ទាប់ពីកោះតៃវ៉ាន់បានរាយការណ៍ពីករណីប្រទេសចិនបានបញ្ជូនយន្ដហោះចម្បាំងជិត១៥០គ្រឿងចូលក្នុងតំបន់ការពារដែនអាកាសរបស់ខ្លួនកាលពីសប្តាហ៍មុន៕