សាលាដំបូងខេត្តកំពង់ធំ បន្តស្រាវជ្រាវរកអ្នកពាក់ព័ន្ធដែលបានឈូលឆាយដីព្រៃរបស់រដ្ឋធ្វើកម្មសិទ្ធិដោយខុសច្បាប់ បន្ទាប់ពីមេភូមិនិងមេឃុំពពក បានចូលបំភ្លឺតាមការកោះហៅរបស់តុលាការនៅថ្ងៃអង្គារនេះ។
កាលពីថ្ងៃទី២២ ខែកញ្ញា ឆ្នាំ២០២១ តំណាងអយ្យការអមសាលាដំបូងខេត្តកំពង់ធំ លោក សាយ វាសនា បានចេញដីកាកោះហៅលោក កែវ នន ជាមេឃុំពពក និងលោក ឡេង សុខា ជាមេភូមិក្រសាំង ឱ្យឆ្លើយបំភ្លឺនៅថ្ងៃទី១២ ខែតុលា ឆ្នាំ២០២១នេះ ពាក់ព័ន្ធករណីឈូសឆាយដីព្រៃរបស់រដ្ឋដើម្បីយកធ្វើជាកម្មសិទ្ធិ។
អ្នកនាំពាក្យ និងជាតំណាងអយ្យការអមសាលាដំបូងខេត្តកំពង់ធំ លោក សាយ វាសនា មានប្រសាសន៍ថា នៅថ្ងៃនេះ លោក កែវ នន ជាមេឃុំពពក និងលោក ឡេង សុខា ជាមេភូមិក្រសាំង បានទៅបំភ្លឺតាមការកោះហៅរបស់តុលាការ។
លោកបន្តថា ក្រោយការឆ្លើយបំភ្លឺ តុលាការមិនបានឃាត់ខ្លួនអ្នកទាំងពីរនោះទេ ដោយបានអនុញ្ញាតឱ្យទៅលំនៅឋានវិញ។ ប៉ុន្តែលោកថា រឿងនេះមិនទាន់បញ្ចប់ទេ គឺខាងតុលាការនៅបន្តស៊ើបអង្កេតរកអ្នកពាក់ព័ន្ធផ្សេងទៀត។
លោកបន្ថែមថា៖ «យើងកំពុងតែស៊ើបអង្កេតរកអ្នកពាក់ព័ន្ធផ្សេងទៀត។ យើងត្រូវប្រើពេលស៊ើបអង្កេតយូរដែរ អ៊ីចឹងយើងអត់ទាន់អនុវត្តនីតិវិធីទេ យើងត្រូវការប្រមូលភស្តុតាងឱ្យបានទូលំទូលាយសិន»។
បើតាមមន្ត្រីតុលាការរូបនេះ ដីព្រៃដែលមានការឈូសឆាយយកធ្វើកម្មសិទ្ធិដោយខុសច្បាប់នោះ មានទំហំជាង២០០ហិកតា ស្ថិតនៅភូមិក្រសាំង ឃុំពពក ស្រុកស្ទោង ខេត្តកំពង់ធំ។
មេឃុំពពក លោក កែវ នន បានទទួលស្គាល់ថា ពិតជាមានករណីឈូសឆាយដីព្រៃរបស់រដ្ឋនោះមែន ប៉ុន្តែលោកមិនមែនជាអ្នកឈូសឆាយនោះទេ។ លោកអះអាងថា អ្នកឈូសឆាយដីព្រៃនោះជាអ្នកផ្សេង ប៉ុន្តែលោកមិនបញ្ជាក់អត្តសញ្ញាណអ្នកឈូសឆាយនោះទេ។
មេឃុំរូបនេះបន្តថា ម្ចាស់ដីបានដាក់សំណើសុំការឈូសឆាយពីអភិបាលខេត្ត លោក សុខ លូ ហើយអភិបាលខេត្តបានអនុញ្ញាត ទើបមានការឈូសឆាយបែបនេះ។ លោកថា អាជ្ញាធរមូលដ្ឋានគ្រាន់តែចូលរួមពិនិត្យក្នុងកិច្ចការងារនេះតែប៉ុណ្ណោះ។
លោកបន្ថែមថា៖ «គេ [អ្នកឈូសឆាយ] សម្អាតដី ដើម្បីបង្កបង្កើនផល។ ម្ចាស់ដីគេបានស្នើសុំដល់អភិបាលតើ! ចៅហ្វាយខេត្តគាត់មានសិទ្ធិសម្រេច ខ្ញុំគ្រាន់តែចូលរួមក្នុងនាមក្រុមការងារ មានអាជ្ញាធរស្រុក ចង់និយាយថា មានជំនាញពាក់ព័ន្ធទាំងអស់ មានមេព្រៃ បរិស្ថាន មានទាំងប៉ូលិស ប៉េអឹម ដែលបានចូលជាមួយនិងពិនិត្យមើលការឈូសឆាយនេះ»។
មន្ត្រីការពារសិទ្ធិសមាគមអាដហុកប្រចាំខេត្តកំពង់ធំ លោក សុខ រដ្ឋា មានប្រសាសន៍ថា អាជ្ញាធរមូលដ្ឋានជាអ្នកគ្រប់គ្រងក្នុងដែនសមត្ថកិច្ចរបស់ខ្លួន ក្នុងការការពារធនធានធម្មជាតិនិងទ្រព្យសម្បត្តិសាធារណៈរបស់រដ្ឋឱ្យបានគង់វង្សទៅតាមច្បាប់កំណត់ ដោយមិនអាចផ្ទេរឬទិញលក់បានឡើយ។
លោកបន្តថា ប្រសិនជាមេភូមិនិងមេឃុំបានគប់គិតគ្នាឈូសឆាយដីព្រៃរបស់រដ្ឋធ្វើជាកម្មសិទ្ធិមែននោះ គឺជាទង្វើខុសច្បាប់។ លោកថា ប្រសិនបើករណីឈូសឆាយដីព្រៃរបស់រដ្ឋនេះមានជាប់ពាក់ព័ន្ធជាមួយអាជ្ញាធរមូលដ្ឋានផ្សេង គឺតុលាការត្រូវស្វែងរកចាប់ពួកគេមកផ្តទ្ទាទោសទៅតាមច្បាប់។
លោកបន្ថែមថា៖ «ប្រសិនបើមានការជាប់ពាក់ព័ន្ធជាមួយអាជ្ញាធរមានសមត្ថកិច្ចនៅមូលដ្ឋានទៀត បើត្រូវរ៉ូវគ្នាផ្នែកណាមួយដែលនាំឱ្យមានការបាត់បង់ទ្រព្យសាធារណៈរបស់រដ្ឋ អាហ្នឹង អ្នកទាំងអស់គ្នាហ្នឹង ត្រូវចូលរួមទទួលខុសត្រូវចំពោះមុខច្បាប់»៕