អាជ្ញាធរខេត្តដែលជាប់រាជធានីភ្នំពេញ កំពុងចាត់វិធានការចាក់ដីតាមព្រំប្រទល់ទប់ស្កាត់ប្រព័ន្ធទឹកដែលអាចហូរចេញពីស្ទឹងព្រែកត្នោត បើសិនមានភ្លៀងធ្លាក់ខ្លាំង និងតាមដានស្ថានភាពអាកាសធាតុ ដើម្បីត្រៀមជាមុនក្នុងការទប់ស្កាត់ការជន់លិចតំបន់ខ្លះក្នុងខេត្តរបស់ខ្លួនដោយសារជំនន់ទឹកភ្លៀង។
ប្រធានមន្ទីរធនធានទឹក និងឧតុនិយមខេត្តកណ្ដាល លោក អ៊ុក វណ្ណា បានឱ្យដឹងនៅថ្ងៃទី១១ ខែតុលា ថានៅពេលនេះ ស្ថានភាពជំនន់ទឹកភ្លៀងនៅតំបន់ខ្លះក្នុងក្រុងតាខ្មៅ បានស្រកបន្តិចហើយខណៈភូមិសាស្ត្រដែលមានប្រព័ន្ធទឹកហូរមកពីស្ទឹងព្រែកត្នោត ក៏នៅមិនទាន់មានការប្រកាសអាសន្ននោះដែរ។
តែយ៉ាងណា លោកថា ដើម្បីទប់ស្កាត់ការជន់ឡើងនៃទឹកស្ទឹងព្រែកត្នោត ក្នុងភូមិសាស្ត្រខេត្តកណ្ដាល ខាងមន្ត្រីជំនាញបានកាយដីទម្លាយប្រព័ន្ធទឹកនៅតាមព្រំដែននៃខេត្តកណ្ដាល និងរាជធានីភ្នំពេញ។
លោកបន្តថា៖ «សម្រាប់វិធានការ យើងបានកាយទម្លាយតាមក្រវាត់ទី៣ ចំណុចព្រំប្រទល់រវាងរាជធានីភ្នំពេញនិងកណ្ដាល ទំនប់ប្រឡាយ៩៤មួយ និងទំនប់ប្រឡាយ៩៦មួយ និងម្សិលមិញ [ថ្ងៃអាទិត្យ ទី១០] ឯកឧត្ដមអភិបាលខេត្តបានឱ្យកាយថែមនៅចំណុចស្អាងភ្នំទៅព្រលានយន្តហោះ»។
ដោយឡែក សម្រាប់ខេត្តកំពង់ស្ពឺវិញ ប្រធានមន្ទីរធនធានទឹក និងឧតុនិយមខេត្ត លោក ញ៉ាញ់ ជៀបហ័ង បានលើកឡើងថា បច្ចុប្បន្ន មិនទាន់មានទឹកជំនន់ពីស្ទឹងព្រែកត្នោតនៅឡើយទេ ដោយសារទឹកស្ទឹងនោះមានការស្រកចុះបន្តិចវិញ។ តែយ៉ាងណា លោកថា ខាងមន្ទីរធនធានទឹក នៅតែបន្តតាមដានចំពោះព្យុះទី១៨ ដែលនឹងជះឥទ្ធិពលលើប្រទេសកម្ពុជានាពេលឆាប់ៗនេះ។
លោកបន្តថា៖ «យើងចាំសិន បើមានបរិមាណទឹកភ្លៀងដែលអាចបង្កទៅជាទឹកជំនន់បាន លុះត្រាតែទឹកភ្លៀងហ្នឹងមកជាប់ៗគ្នា និងមកគ្រប់ស្ទឹងដែលជាសាខារបស់ស្ទឹងព្រែកត្នោត និង[មួយផ្នែកទៀត] កម្ពុជា គឺងាយរងព្យុះទី១៨ តែវាមិនទាន់មកដល់»។
នាយករដ្ឋបាលខណ្ឌដង្កោ បានថ្លែងដោយមិនបញ្ចេញឈ្មោះថា កម្ពស់ទឹកស្ទឹងព្រែកត្នោត កាលពីថ្ងៃទី៩ ខែតុលា បានស្រកចុះបន្តិចវិញហើយ ដោយស្ថិតនៅក្រោមកម្ពស់ទឹកប្រកាសអាសន្នជាង១ម៉ែត្រ។
តែយ៉ាងណា លោកថា អាជ្ញាធរបានណែនាំនិងផ្សព្វផ្សាយជូនប្រជាពលរដ្ឋរស់នៅតាមបណ្ដោយស្ទឹង ឱ្យមានការប្រុងប្រយ័ត្ន ខណៈមន្ត្រីជំនាញកំពុងតាមដានស្ថានភាពអាកាសធាតុជាប្រចាំ ដើម្បីត្រៀមបង្ការជាមុន ព្រមទាំងបានចាក់ដីបន្ថែមនៅតំបន់ដែលងាយបាក់ច្រាំងមាត់ស្ទឹងផងដែរ។
កាលពីឆ្នាំ២០២០ ទឹកស្ទឹងព្រែកត្នោត នៅក្នុងភូមិសាស្ត្រខណ្ឌដង្កោ បានហក់ឡើងលើសកម្រិតប្រកាសអាសន្ន បណ្តាលឱ្យមានការជន់លិចដល់ផ្ទះសម្បែងប្រជាពលរដ្ឋចំនួន២៣៥ខ្នង ស្មើនឹង៣២១គ្រួសារ៕
