ក្រសួងរ៉ែ និងថាមពល បានបញ្ជាក់នៅថ្ងៃសុក្រនេះថា រដ្ឋាភិបាលនៅមិនទាន់បានទទួលដំណឹងជាផ្លូវការណាមួយទាក់ទិនស្ថានភាពប្រេងឆៅជិត៣០ម៉ឺនបារ៉ែល ដែលបានដាក់ស្នើសុំបញ្ជូនត្រឡប់ពីប្រទេសឥណ្ឌូនេស៊ីមកកម្ពុជាវិញនៅឡើយទេ។
លោក ជៀប សួរ អគ្គនាយកនៃអគ្គនាយកដ្ឋានប្រេងកាតកម្ពុជា បានប្រាប់តាមរយៈតេឡេក្រាមថា រដ្ឋាភិបាលឥណ្ឌូនេស៊ីនៅមិនទាន់ឆ្លើយតបអំពីសំណើរបស់កម្ពុជា ជុំវិញការនាំមកប្រេងឆៅដែលត្រូវបានគេលួចយកទៅនោះនៅឡើយរហូតមកដល់ពេលនេះ ហើយក្រសួងរ៉ែក៏មិនទាន់ដឹងច្បាស់ដែរ ថាតើពេលណាទើបកម្ពុជាអាចបានទទួលប្រេងឆៅនេះមកវិញ។
លោកបន្តថា៖ «យើងបានផ្ដល់ឯកសារឱ្យគេរួចហើយ ប៉ុន្តែពុំទាន់មានលទ្ធផលថាយ៉ាងណានៅឡើយទេ។ ខ្ញុំក៏ពុំអាចដឹងថាពេលណាយើងអាចយកប្រេងមកវិញបានដែរ»។
កាលពីពាក់កណ្ដាលខែសីហា ឆ្នាំ២០២១ លោក ជៀប សួរ បានប្រាប់បណ្ដាញព័ត៌មានក្នុងស្រុកថា តាមរយៈក្រសួងការបរទេស រដ្ឋាភិបាលបានដាក់បណ្ដឹងរួចហើយទៅរដ្ឋាភិបាលឥណ្ឌូនេស៊ី ដើម្បីទាមទារសិទ្ធិក្នុងនាមជាម្ចាស់ប្រេងឆៅមកគ្រប់គ្រងវិញ។
យ៉ាងនេះក្ដី អ្នកនាំពាក្យក្រសួងការបរទេសកម្ពុជា លោក កុយ គួង បដិសេធក្នុងការផ្ដល់ព័ត៌មានលម្អិតអំពីនីតិវិធីនិងដំណើរនៃការប្រព្រឹត្តទៅចំពោះលទ្ធភាពនៃការនាំប្រេងឆៅត្រលប់មកវិញ។ បើតាមអ្នកនាំពាក្យរូបនេះ លោកបានរុញការទទួលខុសត្រូវចំពោះនីតិវិធីផ្លូវច្បាប់នេះទៅក្រសួងយុត្តិធម៌វិញ។
លោកបន្តថា៖ «ខ្ញុំចង់ឱ្យសួរទៅក្រសួងដឹកនាំមុខវិញ ក្រសួងដឹកនាំមុខផ្នែកផ្លូវច្បាប់កន្លងមក ក្រសួងយុត្តិធម៌ជាអ្នកដឹកនាំមុខចរចាផ្នែកផ្លូវច្បាប់»។
ចំណែកអ្នកនាំពាក្យក្រសួងយុត្តិធម៌ លោក ជិន ម៉ាលីន បានបដិសេធក្នុងការផ្ដល់ព័ត៌មានលម្អិតអំពីរឿងនេះ។ លោកបញ្ជាក់តាមសារតេឡេក្រាមថា មានតែក្រសួងរ៉ែនិងថាមពលទេ ទើបជាអ្នកទទួលខុសត្រូវរួមលើបញ្ហានេះ។
លោកបន្តថា៖ «ការងារនេះមានក្រសួងសាម៉ីដែលទទួលរួម ក្រសួងយុត្តិធម៌មិនអាចឆ្លើយជំនួសបំពានសមត្ថកិច្ចនោះទេ»។
បើទោះជាបែបណា ការឆ្លើយតបភ្លាមៗរបស់រដ្ឋាភិបាលអំពីរឿងនេះ នៅបន្ទាប់ពីរដ្ឋាភិបាលឥណ្ឌូនេស៊ី បានប្រកាសកាលពីថ្ងៃទី២៥ ខែសីហា ថាខ្លួនរឹបអូសបាននាវាដឹកប្រេងមួយគ្រឿង ហើយនាវាដែលត្រូវបានកងទ័ពជើងទឹកឥណ្ឌូនេស៊ីចាប់បាននោះមានផ្ទុកប្រេងឆៅជិត៣០ម៉ឺនបារ៉ែល និងមាននាវិកនៅលើកប៉ាល់នោះផង។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី ថ្លែងថា កម្ពុជាគួរជំរុញរឿងនេះទៅឥណ្ឌូនេស៊ីឱ្យបានញឹកញាប់ក្នុងនាមជាម្ចាស់ទ្រព្យ ហើយប្រសិនបើនៅបន្តអូសបន្លាយឬត្រូវរង់ចាំចំណាត់ការពីភាគីឥណ្ឌូនេស៊ី វាអាចស៊ីពេលវេលាយូរបន្ថែមទៀត។
លោកបន្តថា៖ «ធ្វើម៉េចត្រូវជំរុញនីតិវិធីខាងយើងឱ្យលឿន។ ខាងគេ គេមិនមែនជាប្រយោជន៍គេ គេអាចកប់ទុករឿងនេះសិនទៅ មិនមែនជាអាទិភាព ប្រហែលគេមានរឿងផ្សេងត្រូវដោះស្រាយ។ អ៊ីចឹងទេ ទាល់តែយើងរុញពីខាងយើងទៅ»។
កាលពីខែមិថុនា ឆ្នាំ២០២១កន្លងទៅនេះ ក្រុមហ៊ុន គ្រីស អែនណឺជី ដែលមានទីតាំងនៅប្រទេសសិង្ហបុរី បានប្រកាសពីការក្ស័យធនរបស់ខ្លួនដោយសារជាប់បំណុល និងថាប្រេងដែលបូមបាននៅប្លុកអេនេះមានចំនួនតិចតួចមិនគ្រប់គ្រាន់ដូចការរំពឹងទុក។
យ៉ាងណា ការបាត់ប្រេងប្រមាណ៣០ម៉ឺនបារ៉ែល ដែលស្មើប្រហែល៥០ម៉ឺនលីត្រ ហើយបើគិតជាទឹកប្រាក់ប្រមាណ២០លានដុល្លារអាមេរិកនេះ ក្រុមអង្គការមិនមែនរដ្ឋាភិបាលដែលធ្វើការលើវិស័យប្រេងកាត យល់ឃើញថា ការនេះនឹងនាំឱ្យមានការសង្ស័យទៅលើការគ្រប់គ្រងរបស់អាជ្ញាធរកម្ពុជា ឬមានជាប់ពាក់ព័ន្ធក្នុងហេតុផលអ្វីមួយដែលនាំឱ្យនាវានេះអាចដឹកប្រេងទៅបានដោយស្រួលបែបនេះ។
ម្យ៉ាងវិញទៀត ប្រសិនបើបញ្ហានេះកើតចេញពីការធ្វេសប្រហែសឬធូររលុងនៃការគ្រប់គ្រង អាចនឹងធ្វើឱ្យប៉ះពាល់ធ្ងន់ធ្ងរដល់មុខមាត់របស់កម្ពុជាថែមទៀតផង។ បើទោះជាបែបណា ក្រសួងរ៉ែ និងថាមពល បានចេញសេចក្ដីប្រកាសព័ត៌មានដោយថ្លែងការពារថា នេះជាការលួចដឹកប្រេងឆៅដោយខុសច្បាប់របស់ក្រុមហ៊ុនបូមប្រេង Kris Energy ចេញពីសមុទ្រកម្ពុជា ទាំងដឹងថាវាជាទ្រព្យសម្បត្តិរបស់កម្ពុជាទៅហើយនោះ៕
