ប៉ូលិសទីក្រុងឡុងដ៍ នៅថ្ងៃអាទិត្យម្សិលមិញនេះ បានចុះទៅកាន់ទីតាំងលំនៅឋានមួយកន្លែងដែលត្រូវបានរកឃើញថា មានជាប់ទាក់ទងទៅនឹងលោក Ali Harbi Ali ដែលត្រូវបានចាប់ខ្លួនបន្ទាប់ពីការស្លាប់របស់សមាជិកសភាអង់គ្លេសមួយរូប លោក David Amess។
លោក Ali Harbi Ali ត្រូវបានស្គាល់ថាជាកូនប្រុសមួយរូបរបស់អតីតទីប្រឹក្សាផ្នែកសារព័ត៌មានរបស់អតីតនាយករដ្ឋមន្ត្រីសូម៉ាលី។
ចំណែកលោក David Amess អាយុ៦៩ឆ្នាំ មកពីគណបក្ស Conservative Party របស់លោកនាយករដ្ឋមន្ត្រី Boris Johnson ត្រូវបានជនសង្ស័យចាក់ជាច្រើនកាំបិតបណ្ដាលឱ្យស្លាប់បាត់បង់ជីវិត ខណៈពេលដែលលោកជួបជាមួយអ្នកបោះឆ្នោតនៅក្នុងទីតាំងព្រះវិហារមួយកន្លែង កាលពីថ្ងៃសុក្រ នៅតំបន់ Leigh-on-Sea ភាគខាងកើតទីក្រុងឡុងដ៍។
ទាក់ទិននឹងករណីនេះ ប៉ូលិសបានឱ្យដឹងថា ពួកគេបានចាប់ខ្លួនបុរសជនជាតិអង់គ្លេស អាយុ២៥ឆ្នាំម្នាក់នៅកន្លែងកើតហេតុ ដោយសង្ស័យថាជាឃាតករ ខណៈប៉ូលិសជឿជាក់ថាបុគ្គលរូបនេះធ្វើសកម្មភាពតែម្នាក់ឯង។
ទោះជាយ៉ាងណា ប៉ូលិសមិនបានបញ្ជាក់ពីឈ្មោះជនសង្ស័យនោះទេ និងបានប្រើអំណាចក្រោមច្បាប់ប្រឆាំងភេរវកម្ម ដើម្បីឃុំខ្លួនជនសង្ស័យរូបនេះរហូតដល់ថ្ងៃទី២២ ខែតុលា។
ប៉ុន្តែប្រភពជិតស្និទ្ធនឹងការស៊ើបអង្កេតមួយបានឱ្យដឹងថា លោក Ali Harbi Ali គឺជាជនសង្ស័យដែលត្រូវបានឃាត់ខ្លួននោះ៕
