វាគឺជារឿងដែលពិសេសមួយសម្រាប់ទីតាំងភោជនីយដ្ឋាន Chaophraya Antique Cafe ក្នុងខេត្តនន់ថៈប៊ុរី (Nonthaburi) ប្រទេសថៃ ដែលអាចទាញយកផលប្រយោជន៍ពីគ្រោះទឹកជំនន់ក្នុងប្រទេសនេះ តាមរយៈការអនុញ្ញាតឱ្យអតិថិជនរបស់ខ្លួនមកអង្គុយទទួលទានអាហារហើយដាក់ជើងរបស់ពួកគេចូលទៅក្នុងទឹក។
ម្ចាស់ទីតាំងភោជនីយដ្ឋាននេះ លោក Titiporn Jutimanon លើកឡើងថា គ្រួសាររបស់លោកបានរងផលប៉ះពាល់ដោយសារទឹកជំនន់អស់រយៈពេលជាច្រើនឆ្នាំមកហើយ ដែលបានធ្វើឱ្យ លោកមានគំនិតក្នុងការប្រែក្លាយឧបសគ្គទៅជាឱកាស។
ជាមួយគ្នានេះ លោក Titiporn Jutimanon ថ្លែងថា៖ «គ្រោះទឹកជំនន់ផ្ដល់អត្ថប្រយោជន៍សម្រាប់ទីតាំងភោជនីយដ្ឋានរបស់យើង ក្នុងការទទួលបានអតិថិជនកាន់តែច្រើន»។
យោងតាមទិន្នន័យពីនាយកដ្ឋានបង្ការ និងកាត់បន្ថយគ្រោះមហន្តរាយថៃ បានឱ្យដឹងថា ប្រទេសថៃ ជួបប្រទះគ្រោះទឹកជំនន់នៅតាមបណ្ដាខេត្តជាច្រើនជារៀងរាល់ឆ្នាំ ខណៈដែលមានប្រជាជនជិត១លាននាក់ និងផ្ទះសម្បែងប្រមាណជា៣០ម៉ឺនខ្នង បានរងផលប៉ះពាល់ដោយគ្រោះទឹកជំនន់នៅឆ្នាំនេះ។
នៅក្នុងបទសម្ភាសជាមួយសារព័ត៌មាន A24 News ម្ចាស់ទីតាំងភោជនីយដ្ឋានរូបនេះបានឱ្យដឹងថា៖ «ស្ថានភាពទឹកជំនន់ គឺជារឿងធម្មតាសម្រាប់ពួកយើងទៅហើយ ដោយសារតែយើងរស់នៅក្នុងសហគមន៍មួយដែលជាប់ទៅនឹងមាត់ទន្លេ ខណៈដែលគ្រោះទឹកជំនន់បានកើតឡើងជាញឹកញាប់។ កម្រិតទឹកជំនន់ខ្ពស់បំផុត គឺមានកម្ពស់៧០សង់ទីម៉ែត្រ»។
លោកបន្តថា៖ «អតិថិជនទាំងឡាយយល់ឃើញថា ការទទួលអាហារនៅមាត់ទន្លេ គឺជាការទាក់ទាញមួយ។ ស្របពេលដែលពួកគេអាចមើលទេសភាពស្អាត និងអាចដាក់ជើងរបស់ពួកគេចូលទៅក្នុងទឹកបានបន្ថែមទៀតនោះ វាកាន់តែក្លាយជាបទពិសោធន៍ដ៏ពិសេសមួយសម្រាប់ពួកគេ»។
ម្ចាស់ភោជនីយដ្ឋាននោះបន្ថែមថា៖ «វាគឺជាការបង្ហាញឱ្យឃើញពីចំណុចដ៏ល្អមួយរបស់ប្រជាជនថៃដែលសម្លឹងឃើញពីភាពវិជ្ជមាននៅរាល់ឧបសគ្គនានា»។
អតិថិជនមួយរូបដែលបានមកកាន់ភោជនីយដ្ឋាននេះ អ្នកស្រី Sudapond Sujaritpakdee បានឱ្យដឹងថា៖ «ខ្ញុំបានឃើញវីដេអូដ៏ចាប់អារម្មណ៍មួយរបស់ភោជនីយដ្ឋាននេះនៅលើអ៊ីនធឺណិត ដែលបានធ្វើឱ្យខ្ញុំចង់មកកាន់ទីនេះ»។
អតិថិជនមួយរូបទៀត លោក Arit Khanthong បានលើកឡើងដែរថា៖ «ខ្ញុំរំពឹងថា បរិយាកាសនៅទីនេះនឹងផ្ដល់ឱ្យខ្ញុំនូវភាពរំភើបរីករាយប្លែកមួយ ជាពិសេសនៅពេលដែលខ្ញុំកំពុងទទួលទានសាច់អាំង»៕
