ស្នងការនគរបាលខេត្ដសៀមរាប នឹងឱ្យក្រុមការងារចុះស៊ើបអង្កេតពាក់ព័ន្ធនឹងការស្នើសុំឱ្យដកតំណែងអធិការនគរបាលស្រុកប្រាសាទបាគង ក្រោមការចោទថាបានប្រព្រឹត្តអំពើពុករលួយ និងបក្ខពួកនិយម រួមទាំងធ្វើឱ្យបែកបាក់សាមគ្គីផ្ទៃក្នុងជាដើម។
ស្នងការនគរបាលខេត្ដសៀមរាប លោក តេង ច័ន្ទណាត ប្រាប់ វីអូឌី នៅថ្ងៃពុធនេះថា រូបលោកបានឃើញនិងទទួលបណ្ដឹងអនាមិកមួយដែលស្នើសុំដកអធិការស្រុកបា្រសាទបាគង លោក លឹម សម្បត្តិ ហើយ។ លោកបន្តថា ខាងស្នងការនឹងឱ្យអធិការស្រុករូបនោះបំភ្លឺ និងចុះស៊ើបអង្កេតបន្ថែមទៀត ពាក់ព័ន្ធរឿងនេះ។
លោកថា៖ «លិខិតអនាមិកហ្នឹង ខ្ញុំមិនបានទទួលទេ តែខ្ញុំបានពីអ្នកសារព័ត៌មានគេបាញ់ឱ្យខ្ញុំវិញ។ ទាក់ទងនឹងបញ្ហាហ្នឹង យើងឱ្យអធិការធ្វើសេចក្ដីបំភ្លឺមកស្នងការដ្ឋាន ហើយយើងបង្កើតក្រុមការងារចុះស្រាវជ្រាវទៀត។ បន្ទាប់ពីមានព័ត៌មានម៉េច អាហ្នឹងយើងនឹងវាយតម្លៃ ព្រោះយើងមានគណៈកម្មការវិន័យរបស់យើង ហើយយើងមើលស្ថានភាពហ្នឹងម៉េចដែរ»។
ការសម្រេចបង្កើតក្រុមការងារឱ្យចុះស៊ើបអង្កេតនេះ បានធ្វើឡើងក្រោយពីស្នងការខេត្តបានទទួលលិខិតអនាមិកមួយដែលអះអាងថា ជាមន្ត្រីនគរបាល និងជាប្រជាពលរដ្ឋនៅស្រុកបា្រសាទបាគង ប្ដឹងអធិការនគរបាលស្រុកបា្រសាទបាគង លោក លឹម សម្បត្តិ។ ក្នុងពាក្យបណ្ដឹងអនាមិកដែលអមដោយស្នាមមេដៃទាំងនោះបានស្នើទៅស្នងការនគរបាលខេត្ដសៀមរាប ក្រសួងមហាផ្ទៃ និងអគ្គស្នងការដ្ឋាននគរបាលជាតិ ឱ្យដកតំណែងនិងផ្លាស់ប្ដូរតួនាទីអធិការនគរបាលស្រុកប្រាសាទបាគង ចេញពីតំណែង។
ពាក្យបណ្ដឹងនោះបានចោទប្រកាន់ថា ចាប់តាំងពីចូលកាន់តំណែងនៅចុងឆ្នាំ២០១៩មក អធិការនគរបាលស្រុករូបនោះបានធ្វើឱ្យបែកបាក់សាមគ្គីផ្ទៃក្នុង បក្ខពួកនិយម និងប្រព្រឹត្តអំពើពុករលួយជាដើម។ លើសនេះ អំពើចោរកម្ម ឆក់ប្លន់ និងទ្រព្យសម្បត្តិប្រជាពលរដ្ឋ បានកើតមានឡើងពេញស្រុក ប៉ុន្តែអធិការរូបនេះមិនយកចិត្តទុកដឹកនាំរៀបចំផែនការចុះបង្ក្រាបនោះទេ ហើយបើនៅពេលចុះបង្ក្រាបកន្លែងល្បែងស៊ីសងវិញ លោកតែងតែជំរិតទារប្រាក់ពីជនល្មើសពី២០០ដុល្លារទៅ៣០០ដុល្លារក្នុងម្នាក់ ដើម្បីជាថ្នូរនឹងការដោះលែងដោយមិនបញ្ជូនសំណុំរឿងទៅតុលាការ។
បើតាមពាក្យបណ្ដឹងដដែលបានរម្លឹកថា កាលពីពេលកន្លងមក លោក លឹម សម្បត្តិ បានកោះហៅមេប៉ុស្តិ៍ទាំង៩នាក់នៅក្នុងស្រុកបា្រសាទគង ទៅប្រជុំ ដើម្បីយកប្រាក់គោលនយោបាយភូមិឃុំមានសុវត្ថិភាពចំនួន៥០ម៉ឺនរៀលក្នុងមួយប៉ុស្តិ៍ ខណៈការដំឡើងអង់តែនវិទ្យុទាក់ទងប្រភេទអ៊ុយ ក៏តម្រូវឱ្យមួយប៉ុស្តិ៍ត្រូវបង់ប្រាក់១០០ដុល្លារ ក្នុងនោះ អធិការរងទទួលផ្នែកខ្លះ ត្រូវបង់៥០ទៅ១០០ដុល្លារជាកំហិត។
ពាក្យបណ្ដឹងដដែលនោះបន្តទៀតថា ចំណែកអាយកូមប្រភេទអង់តែនដែលកំពុងដំឡើង បើសិនជាពួកគាត់ចង់ប្រើប្រាស់នោះ ត្រូវទិញតាមរយៈលោក លឹម សម្បត្តិ ដែលមានតម្លៃ២២ដុល្លារ ទើបអធិការនគរបាលស្រុករូបនេះអនុញ្ញាតឱ្យប្រើ។ មួយវិញទៀត សម្រាប់មេឃុំទាំងអស់ដែលស្ថិតនៅក្នុងស្រុកប្រាសាទបាគង ត្រូវតែទិញវិទ្យុទាក់ទងក្នុងតម្លៃ៥០ដុល្លារ ដែលតម្លៃនេះខ្ពស់ជាងតម្លៃនៅលើទីផ្សារ។
ពលរដ្ឋម្នាក់រស់នៅស្រុកប្រាសាទបាគង ដែលសុំមិនបញ្ចេញឈ្មោះ បានអះអាងថា កន្លងមក ពួកគាត់បាននាំគ្នាលេងល្បែងកូនត្រីក្នុងរដូវបុណ្យចូលឆ្នាំ ត្រូវបានអធិការនគរបាលស្រុកប្រាសាទបាគង បានចុះចាប់ និងបានតម្រូវឱ្យពួកគាត់បង់ប្រាក់ប្រមាណជា១០ ០០០ ០០០រៀល។
លោកថា៖ «ខ្ញុំលេង ខ្ញុំខុសមែន បើតាមគំនិតខ្ញុំ បើគាត់គ្រាន់តែមកប្រាប់ថា “បងឯងលេងល្បែងអ៊ីចឹងខុសហើយ ជួយផ្អាក ឈប់លេងទៅ” ខ្ញុំនឹងឈប់ បង! ប៉ុន្តែអត់មានអ្នកណាមកប្រាប់ខ្ញុំទេ។ ប៉ូលិសប៉ុស្តិ៍ឃុំអត់ដែលមកប្រាប់ទេ ស្រាប់តែមកចាប់យកតែម្ដង»។
វីអូឌី មិនអាចសុំការបកស្រាយពីអធិការនគរបាលស្រុកប្រាសាទបាគង លោក លឹម សម្បត្ដិ បានទេ ដោយទូរសព្ទចូល ប៉ុន្តែលោកថាច្រឡំលេខ។
លោកថា៖ «ខ្ញុំមិនមែនជាអធិការស្រុកអីទេ ខ្ញុំជាអ្នកចម្ការ ច្រឡំលេខហើយ»។
កាលពីថ្ងៃទី១១ ខែតុលា ឆ្នាំ២០២១ រដ្ឋមន្ត្រីក្រសួងមហាផ្ទៃ លោក ស ខេង បានក្រើនរម្លឹកឱ្យអាជ្ញាធរខេត្តនិងមន្ត្រីពាក់ព័ន្ធយកចិត្តទុកដាក់ ពិនិត្យ និងដោះស្រាយចំពោះលិខិតនិងពាក្យបណ្ដឹងអនាមិកនានា ដោយថា លិខិតនិងបណ្ដឹងមួយចំនួនជារឿងពិត។
លោកថា៖ «ពីមុន យើងចាត់ទុកលិខិតអនាមិកមិនយកជាការទេ ប៉ុន្តែឥលូវមានបញ្ហាជាច្រើនដែលអាចយកជាការបាន សំបុត្រអនាមិកហ្នឹង! ដោយសាររឿង វាពិតជាក់ស្ដែង។ អនាមិកមែន ប៉ុន្តែគ្នាមិនហ៊ានបញ្ចេញឈ្មោះ ខ្លាចសន្តិសុខ។ អ៊ីចឹងយើងត្រូវមើលបញ្ហាហ្នឹង ចរិតនៃបញ្ហា តើវាពិតឬមិនពិត! បើវាពិតដូចសំបុត្រអនាមិក គេថាត្រូវហើយ! បានន័យថា គេថាត្រូវហើយ! ខ្ញុំបានដោះស្រាយច្រើនណាស់»៕