រដ្ឋបាលខេត្តសៀមរាបបានដាក់ចេញរួចហើយអំពីផែនការរំសាយការប្រមូលផ្ដុំ ដោយចាត់ទុកថា ការជួបជុំនេះគឺមិនបានការសហការណាមួយជាមួយអាជ្ញាធរ និងភាគីពាក់ព័ន្ធ ដែលនាំឱ្យការប្រមូលផ្ដុំនេះប៉ះពាល់ទៅដល់សណ្ដាប់ធ្នាប់ សន្តិសុខ បរិស្ថាន និងវិធានការបង្ការ និងទប់ស្កាត់ប្រឆាំងជំងឺកូវីដ-១៩។
លោក ទៀ សីហា អភិបាលខេត្តសៀមរាប បានលើកឡើងនៅក្នុងសេចក្ដីជូនដំណឹងរបស់រដ្ឋបាលខេត្ត កាលពីថ្ងៃទី២៩ ខែសីហា ថាអាជ្ញាធរបានស្នើឱ្យបញ្ឈប់ការប្រមូលផ្ដុំ និងរំសាយការជួបជុំនេះ ចាប់ពីថ្ងៃទី៣០ ខែសីហា តទៅ ហើយរាល់សំណង់ដែលបានសាងសង់ ត្រូវដាក់ពាក្យស្នើសុំអនុញ្ញាតពីអាជ្ញាធរមានសមត្ថកិច្ច។
គិតត្រឹមថ្ងៃទី៣០ ខែសីហានេះ គេសង្កេតឃើញមានរូបថតជាច្រើនសន្លឹកនៅលើបណ្ដាញសង្គមហ្វេសប៊ុក និយាយពីការវេចបង្វេចចាកចេញរបស់ពលរដ្ឋ ពីទីតាំងប្រមូលផ្ដុំគ្នា ទៅលំនៅឋានវិញជាបណ្ដើរៗ។
លោក ខឹម វាសនា បានអំពាវនាវកាលពីថ្ងៃទី២៥ ខែសីហា នៅលើបណ្ដាញសង្គមហ្វេសប៊ុករបស់លោកថា នៅថ្ងៃទី៣០ ខែសីហានេះហើយ គឺជាថ្ងៃដែលពិភពលោកនឹងត្រូវលិចលង់ដោយទឹកជំនន់។ តាមរយៈសេចក្ដីប្រកាសរបស់ខ្លួន សូម្បីទីក្រុងភ្នំពេញក៏ត្រូវវិនាសអន្តរាយដែរ។ ទីតាំងដែលអាចជួយសង្រ្គោះជីវិតមនុស្សបាន គឺមានតែនៅចម្ការម្រេចរបស់លោក ដែលស្ថិតក្នុងឃុំត្បែង ស្រុកបន្ទាយស្រី ខេត្តសៀមរាប តែមួយគត់ ដែលអាចជួយស្រោចស្រង់សត្វលោកបាន ព្រោះលោកគឺជាព្រហ្មចុះមករក្សាមនុស្សលោក។
ស្នងការខេត្តសៀមរាប លោក តេង ច័ន្ទណាត បានប្រាប់ វីអូឌី នៅថ្ងៃអង្គារនេះថា នៅពេលនេះ អ្នកប្រមូលផ្ដុំទើបបានចាកចេញពីចម្ការម្រេចរបស់លោក ខឹម វាសនា មួយចំនួនតូច។ បើតាមស្នងការរូបនេះ ទំនងការវិលត្រលប់ទៅវិញរបស់ពួកគេអាចនឹងមានការយឺតយ៉ាវ។ នៅពេលសួរថាតើ ប្រសិនបើការរំសាយនេះមិនអនុវត្តទៅតាមផែនការដែលដាក់ចេញដោយអាជ្ញាធរខេត្ត ពួកគេ ឬប្រធានគណបក្ស លោក ខឹម វាសនា ត្រូវប្រឈមមុខបែបណា លោកស្នងការឆ្លើយតបថា នៅចំពោះមុខនេះ គឺត្រូវរង់ចាំការសម្រេចបន្តទៀតពីភាគីពាក់ព័ន្ធទៀត។
លោកបន្តថា៖ «នៅទេ! អត់ទាន់ចេញអស់ទេ នៅមានខ្លះៗ។ រឿងនេះទាល់តែចាំគណៈបញ្ជាការឯកភាពខេត្ត លោកអ្នកសម្រេចរឿងហ្នឹង។ អូ!មានថយ[ជាង]ពីមុន ប្រហែលនៅសល់ត្រឹម១ម៉ឺន៥ពាន់នាក់អីទេ»។
ដោយឡែក លោក សេក សុជាតិ ស្ថាបនិកនៃអង្គការអភិវឌ្ឍន៍ផ្នត់គំនិត យល់ឃើញថា ការពន្យារពេលទៅតាមការស្នើសុំរបស់ប្រមុខបក្សសម្ព័ន្ធដើម្បីប្រជាធិបតេយ្យនេះ វាអាចជាកិច្ចការដែលសមត្ថកិច្ចធ្វើការដោយប្រយ័ត្នប្រយែង។ លោកបន្តថា ការធ្វើកិច្ចការដោយភាពអត់ធ្មត់នេះ ទំនងជាសមត្ថកិច្ចមើលឃើញពីការប្រឈមមុខដាក់គ្នាក្នុងកម្រិតមួយខ្ពស់រួចទៅហើយ ព្រោះពួកគេជារួម គឺជាអ្នកដែលជឿស៊ប់ទៅក្នុងជំនឿអរូបីច្រើនជាងគោលនយោបាយ។
លោកបន្តថា៖ «យើងមើលឃើញថា ជាការងារមួយដែលពួកគាត់ត្រូវធ្វើ ដើម្បីការពារកុំឱ្យមានចលនាណាមួយកើតឡើង នៅពេលដែលអាជ្ញាធរស្នើសុំឱ្យលោក ខឹម វាសនា ទៅកន្លែងសមត្ថកិច្ចអីអ៊ីចឹងទៅ។ ដូច្នេះហើយគេដឹងថា មនុស្សដែលទៅជួបជុំនៅចម្ការលោក ខឹម វាសនា គឺជាមនុស្សដែលស្ដាប់បញ្ជារបស់លោក ខឹម វាសនា ខ្លាំងណាស់។ ដូច្នេះ នៅពេលដែលអាជ្ញាធរចាត់វិធានការទៅលើលោក ខឹម វាសនា ភ្លាមៗ ពេលនោះ អ្នកដែលទៅជួបជុំនៅក្នុងចម្ការរបស់គាត់ នឹងផ្ទុះការតវ៉ាធំ ហើយកងកម្លាំងនៅខេត្តសៀមរាបមួយ គឺមិនអាចគ្រប់គ្រងសភាពការណ៍មនុស្សដែលមានចំនួនរាប់ពាន់នាក់នៅទីនោះបានភ្លាមទេ»។
លោក សេក សុជាតិ មានសុទិដ្ឋិនិយមថា ក្រោយការបញ្ចប់ផែនការនេះ ប្រធានគណបក្សសម្ព័ន្ធដើម្បីប្រជាធិបតេយ្យ អាចនឹងត្រូវសមត្ថកិច្ចកោះហៅ ដើម្បីសាកសួរបន្ថែម អំពីមូលហេតុដែលនាំឱ្យមានកម្លាំងមនុស្សប្រមូលផ្ដុំក្នុងទ្រង់ទ្រាយមួយដែលធំបែបនេះ។
សេចក្តីរាយការណ៍នានាពីសារព័ត៌មានក្នុងស្រុកដែលដកស្រង់សម្ដីពីអាជ្ញាធរ បង្ហាញថា គិតមកដល់ពេលនេះ អ្នកគាំទ្រ តាមការអំពាវនាវរបស់ប្រធានគណបក្សសម្ព័ន្ធដើម្បីប្រជាធិបតេយ្យរូបនេះ បានបន្តស្នាក់នៅលើដីចម្ការម្រេចជិតជើងភ្នំគូលេនរបស់លោក ខឹម វាសនា ប្រមាណជិត២ម៉ឺននាក់។
បើតាមលោក សេក សុជាតិ លោកក៏ចង់ឃើញការអនុវត្តដូចគ្នានេះពីសំណាក់សមត្ថកិច្ចទៅលើក្រុមអ្នកនយោបាយបក្សជំទាស់ សកម្មជនការពារសិទ្ធិមនុស្ស យុវជនស្រឡាញ់បរិស្ថាន និងអ្នកការពារសិទ្ធិដីធ្លី ជាដើម តាមរយៈការសម្របសម្រួល ជាជាងចាត់វិធានការផ្លូវច្បាប់ ដូចជា ចាប់ដាក់ពន្ធនាគារ និងប្រើប្រាស់អំពើហិង្សា ជាដើម៕