តំណាងគណបក្សសម្ព័ន្ធដើម្បីប្រជាធិបតេយ្យ (LDP) ស្នើទៅអភិបាលខេត្តសៀមរាបជួយអន្តរាគមន៍ និងចាត់វិធានការច្បាប់ លើពលរដ្ឋដែលបន្តស្នាក់នៅលើដីចម្ការរបស់ខ្លួនចំនួន២ទីតាំង នៅស្រុកបន្ទាយស្រី ខេត្តសៀមរាប ក្រោយពលរដ្ឋទាំងនោះមិនគោរពតាមឱសានវាទរបស់ខេត្តដែលកំណត់ឱ្យចាកចេញពីទីនោះត្រឹមល្ងាចថ្ងៃទី៥ ខែកញ្ញា។
ក្នុងលិខិតរបស់លោក នី ចាន់ពិនិត្យ ដែលជាតំណាងរបស់គណបក្សសម្ព័ន្ធដើម្បីប្រជាធិបតេយ្យ បានឱ្យដឹងកាលពីថ្ងៃទី៦ ខែកញ្ញាម្សិលមិញថា គណបក្ស LDP បានប្រារព្ធកម្មវិធីជួបជុំសមាជិកគណបក្ស ស្ថិតនៅបរិវេណចម្ការ នៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប កាលពីចុងខែសីហានេះ។
លោកបន្តថា ក្រោយមក លោកបានធ្វើកិច្ចសន្យាផ្សព្វផ្សាយឱ្យប្រជាពលរដ្ឋដែលបានស្នាក់នៅក្នុងដីចម្ការរបស់ខ្លួន ចំនួន២ទីតាំង ឱ្យចាកចេញត្រលប់ទៅផ្ទះវិញរៀងៗខ្លួន រយៈពេល៥ថ្ងៃ ចាប់ពីថ្ងៃទី១ ដល់ថ្ងៃទី៥ ខែកញ្ញា ឆ្នាំ២០២២ ត្រឹមម៉ោង៥និង៣០នាទីល្ងាច ប៉ុន្តែរហូតមកដល់ពេលនេះ មានប្រជាពលរដ្ឋមួយចំនួនក្រៅពីក្រុមការងារគណបក្ស ពុំព្រមចាកចេញពីចម្ការរបស់ខ្លួនឡើយ។
ករណីនេះ តំណាងគណបក្សសម្ព័ន្ធដើម្បីប្រជាធិបតេយ្យ ស្នើទៅអភិបាលនៃគណៈអភិបាលខេត្តសៀមរាបជួយអន្តរាគមន៍ឬចាត់ការផ្លូវច្បាប់ឱ្យពួកគាត់ចាកចេញពីដីចម្ការទាំង២ទីតាំងនោះ។
អភិបាលរងខេត្តសៀមរាប លោក លី សំរិទ្ធ មានប្រសាសន៍នៅថ្ងៃពុធនេះថា គិតត្រឹមថ្ងៃទី៦ ខែកញ្ញា ម្សិលមិញ ពលរដ្ឋដែលចូលទៅក្នុងទីតាំងដីចម្ការនោះ នៅសល់ប្រមាណជាង១ ០០០នាក់។ ប៉ុន្តែលោកថា ក្រុមការងារជំនាញរបស់ខេត្តបានសហការជាមួយក្រុមការងារគណបក្សនោះ បានចុះស្រង់ស្ថិតិ និងនាំពលរដ្ឋចេញពីទីតាំងនោះបណ្ដើរៗហើយ។
លោកមានប្រសាសន៍ថា៖ «កាលពីម្សិលមិញ [ថ្ងៃទី០៦ ខែកញ្ញា] យើងបានធ្វើការងារហ្នឹងច្រើនហើយ បានស្រង់ស្ថិតិប្រជាពលរដ្ឋ ដើម្បីចង់ដឹងថាប្រជាពលរដ្ឋមានចំនួនប៉ុន្មាន ហើយយើងនឹងបន្តយកគាត់ចេញបន្ថែមទៀតតាមការស្ម័គ្រចិត្តរបស់គាត់ មិនកំណត់ពេលវេលាទេ។ យើងធ្វើទាល់តែអស់ ប៉ុន្តែយើងសង្ឃឹមថាមិនយូរទេ ដោយសារខាងក្នុងហ្នឹងមិនមានអ្វីសម្រាប់ការផ្គត់ផ្គង់អ្វីបន្តទៀតទេ បានពួកគាត់ព្រមទទួលថាកិច្ចសន្យារបស់គាត់ចប់ហើយ ហើយគាត់ប្រគល់ប្រជាពលរដ្ឋដែលមិនព្រមចាកចេញឱ្យអាជ្ញាធរចាត់ចែង»។
ប្រធានគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា កាលពីថ្ងៃទី២៥ ខែសីហា ឆ្នាំ២០២២ បានអំពាវនាវដល់អ្នកគាំទ្រគណបក្សនេះឱ្យទៅប្រមូលផ្ដុំគ្នានៅចម្ការរបស់លោក ក្នុងស្រុកបន្ទាយស្រី ខេត្តសៀមរាប ដោយថា ពិភពលោកទាំងមូលនឹងលិចលង់ដោយទឹកជំនន់ នៅថ្ងៃទី៣០ ខែសីហា ក្នុងនោះមានតែទីតាំងចម្ការរបស់លោកមួយទេ ដែលជួយសង្គ្រោះឱ្យរួចផុតពីគ្រោះមហន្តរាយនេះ។
ការកៀរគរនេះបានធ្វើឱ្យពលរដ្ឋដែលអាជ្ញាធរប៉ាន់ប្រមាណថាមានជាង១៥ ០០០នាក់ ទាំងពលរដ្ឋនៅក្នុងស្រុក និងត្រលប់ពីក្រៅប្រទេស បានធ្វើដំណើរទៅ និងសាងសង់រោងជាច្រើនស្នាក់នៅទីតាំងនោះ។
យ៉ាងណា រដ្ឋាភិបាល និងអាជ្ញាធរខេត្ត ក៏ធ្លាប់បានចេញប្រកាសជាបន្តបន្ទាប់ ប្រាប់ពលរដ្ឋកុំឱ្យជឿនូវរឿងអបិយជំនឿដែលលោក ខឹម វាសនា និយាយ ដោយថាជារឿងមិនពិត និងមិនអាចកើតឡើងឡើយ។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត យល់ថា ករណីដែលតំណាងគណបក្ស LDP ស្នើឱ្យអាជ្ញាធរខេត្តមានវិធានការផ្លូវច្បាប់លើពលរដ្ឋដែលមិនព្រមចាកចេញពីចម្ការលោក ខឹម វាសនា នោះគ្រាន់តែជាការគេចវេះពីការទទួលខុសត្រូវរបស់គណបក្សនេះប៉ុណ្ណោះ។ លោកថា បើអាជ្ញាធរជួយសម្របសម្រួល ឬចាត់វិធានការ ដោយមិនប្រុងប្រយ័ត្នទៅលើពលរដ្ឋដែលកំពុងស្នាក់នៅក្នុងចម្ការទាំង២ទីតាំងនោះ អាចរងការចោទប្រកាន់ពីតំណាងគណបក្សសម្ព័ន្ធដើម្បីប្រជាធិបតេយ្យ ជាដើម។
លោកថា៖ «ខ្ញុំមើលទៅដូចជាការមិនសក្តិសមទេ អ្វីដែលតំណាងគណបក្សខ្លួនឯងត្រូវតែអំពាវនាវ ឬក៏ជជែកជាមួយអ្នកគាំទ្ររបស់ខ្លួនចាកចេញ ពីព្រោះរឿងនេះ អាជ្ញាធរក៏គាត់មានការប្រយ័ត្នប្រយែងដែរ ពីព្រោះបើសិនជាមានការចាត់វិធានការទៅ មានបញ្ហាណាមួយ ខាងគណបក្ស LDP នឹងចោទប្រកាន់អាជ្ញាធរដូចគ្នាដែរ អ៊ីចឹងហើយបញ្ហាទាំងអស់នេះ អ្នកដែលទទួលខុសត្រូវមុនគេ គឺ LDP ហ្នឹងហើយ បន្ទាប់មកបានអាជ្ញាធរគាត់ជាអ្នកជួយសម្របសម្រួលនៅក្នុងករណីហ្នឹង»៕