ប្រធានាធិបតីសហរដ្ឋអាមេរិក លោក ចូ បៃឌិន បានឱ្យដឹងនៅថ្ងៃព្រហស្បតិ៍ម្សិលមិញថា សហរដ្ឋអាមេរិកនឹងគិតគូរពីការការពារកោះតៃវ៉ាន់ និងប្ដេជ្ញាចិត្តដើម្បីការពារកោះ ដែលចិនអះអាងថាជាទឹកដីរបស់ខ្លួនមួយនេះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ទាក់ទិននឹងសំណួរថាតើសហរដ្ឋអាមេរិកនឹងការពារតៃវ៉ាន់ឬយ៉ាងណា ខណៈដែលដែនកោះមួយនេះបច្ចុប្បន្នកំពុងតែទទួលរងសម្ពាធផ្នែកយោធានិងនយោបាយពីចិន ក្នុងការទទួលយកអធិបតេយ្យភាពរបស់ខ្លួននោះ លោក ចូ បៃឌិន ថ្លែងថា៖ «ជាការពិតណាស់ យើងមានការប្ដេជ្ញាចិត្តក្នុងការធ្វើសកម្មភាពនេះ»។
កាលពីខែសីហាកន្លងទៅ មន្ត្រីរដ្ឋបាលរបស់លោក ចូ បៃឌិន មួយរូបក៏បានឱ្យដឹងផងដែរថា គោលនយោបាយរបស់សហរដ្ឋអាមេរិកលើកោះតៃវ៉ាន់មិនបានផ្លាស់ប្តូរនោះទេ ស្របពេលដែលប្រធានាធិបតីរូបនេះលើកឡើងថា សហរដ្ឋអាមេរិកនឹងការពារកោះនេះ ប្រសិនបើមានករណីវាយប្រហារណាមួយកើតឡើង។
ទាក់ទិននឹងករណីនេះ លោក ចូ បៃឌិន ថ្លែងថា ប្រជាពលរដ្ឋមិនគួរមានការព្រួយបារម្ភអំពីកម្លាំងយោធារបស់អាមេរិកឡើយ ខណៈប្រទេសចិន រុស្ស៊ី និងពិភពលោកទាំងមូលបានដឹងហើយថា យើងគឺជាយោធាដ៏មានឥទ្ធិពលបំផុតក្នុងប្រវត្តិសាស្ត្រពិភពលោក។
លោកបន្តថា៖ «ខ្ញុំមិនចង់មានសង្រ្គាមត្រជាក់ជាមួយចិនឡើយ។ ខ្ញុំគ្រាន់តែចង់ឱ្យចិនយល់ថា យើងនឹងមិនដើរថយក្រោយនោះទេ ហើយយើងក៏នឹងមិនផ្លាស់ប្តូរទស្សនៈរបស់យើងផងដែរ»។
គួរបញ្ជាក់ថា ប្រទេសចិននៅតែបន្តអះអាងថា កោះតៃវ៉ាន់គឺជាទឹកដីរបស់ខ្លួន ហើយបាននិងកំពុងបង្កើនសម្ពាធកាន់តែខ្លាំងឡើងលើដែនកោះមួយនេះ ខណៈដែលសកម្មភាពរបស់ចិននេះក៏ត្រូវបានថ្កោលទោសដោយអន្តរជាតិផងដែរ៕