កម្ពុជាបានសម្រេចបើកឱ្យមានការផ្ដល់ទិដ្ឋាការទេសចរណ៍ឡើងវិញ ដើម្បីត្រៀមទទួលភ្ញៀវទេសចរបរទេសឱ្យចូលមកទស្សនាកម្ពុជាសារជាថ្មី។
រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានសរសេរលិខិតផ្ញើទៅកាន់ឯកអគ្គរាជទូត អគ្គកុងស៊ុល និងកុងស៊ុលកិត្តិយសកម្ពុជាប្រចាំនៅបរទេស កាលពីថ្ងៃទី២០ ខែតុលា ស្តីពីការកែសម្រួលគោលការណ៍នៃការផ្ដល់ទិដ្ឋាការ លក្ខខណ្ឌនៃការធ្វើដំណើរ និងការធ្វើចត្តាឡីស័ក សម្រាប់អ្នកដំណើរចូលមកកម្ពុជា ស្របតាមគន្លងប្រក្រតីភាពថ្មី។
ក្នុងលិខិតនោះ លោកថា រដ្ឋាភិបាលបានសម្រេចបើកឱ្យមានការផ្ដល់នូវទិដ្ឋាការទេសចរណ៍ គោលការណ៍លើកលែងទិដ្ឋាការ (Visa Exemption) និងការស្នើសុំទិដ្ឋាការតាមប្រព័ន្ធអេឡិចត្រូនិច (e-Visa) ឡើងវិញ ដើម្បីសម្រួលដល់អ្នកដំណើរក្នុងការស្នើសុំទិដ្ឋាការចូលមកកម្ពុជា ប៉ុន្តែនៅបន្តផ្អាកការផ្ដល់ទិដ្ឋាការនៅពេលមកដល់ (Visa on Arrival)។
បើតាមលិខិតដដែល ការបើកឱ្យមានការផ្ដល់ទិដ្ឋាការទេសចរណ៍ឡើងវិញនេះ គឺដើម្បីអាចទទួលភ្ញៀវបរទេសនិងភ្ញៀវទេសចរទូទៅឱ្យចូលមកទស្សនាកម្ពុជាឡើងវិញ។
លោករដ្ឋមន្ត្រីបានឱ្យដឹងថា កម្ពុជាបានសម្រេចបើកប្រទេសឡើងវិញជាបណ្តើរៗនិងតាមដំណាក់កាល ជាមួយនឹងភាពប្រយ័ត្នប្រយែងនិងការទទួលខុសត្រូវខ្ពស់៕
