មន្ត្រីជាន់ខ្ពស់អង្គការស្បៀងអាហារពិភពលោក (WFP) មួយរូប ព្រមានថា ប្រជាជនអាហ្វហ្គានីស្ថានរាប់លាននាក់ រួមទាំងកុមារ អាចប្រឈមនឹងការស្លាប់ដោយភាពអត់ឃ្លាន បើសិនជាមិនមានការចាត់វិធានការបន្ទាន់ណាមួយ ដើម្បីជួយដល់ប្រទេសនេះឱ្យងើបចេញពីការដួលរលំនោះទេ។
នាយកប្រតិបត្តិរបស់អង្គការស្បៀងអាហារពិភពលោក លោក David Beasley បានថ្លែងប្រាប់ទីភ្នាក់ងារសារព័ត៌មាន Reuters ថា ក្នុងចំណោមប្រជាជនអាហ្វហ្គានីស្ថានសរុបចំនួន៣៩លាននាក់ ក្នុងនោះមានប្រមាណជា២២លាននាក់កំពុងតែប្រឈមមុខនឹងបញ្ហាអសន្តិសុខស្បៀងយ៉ាងធ្ងន់ធ្ងរ ដែលអាចនឹងឈានទៅរកភាពអត់ឃ្លាន។
នាយកប្រតិបត្តិដដែល បន្តថា៖ «កុមារអាចនឹងស្លាប់បាត់បង់ជីវិត មនុស្សនឹងជួបប្រទះភាពអត់ឃ្លាន ហើយស្ថានការណ៍នឹងកាន់តែអាក្រក់ទៅៗ»។
គួរបញ្ជាក់ថា អាហ្វហ្គានីស្ថានបានធ្លាក់ចូលទៅក្នុងវិបត្តិកាលពីខែសីហាកន្លងទៅ បន្ទាប់ពីពួកតាលីបង់បានដណ្ដើមអំណាចយកមកគ្រប់គ្រង ដែលករណីនេះបានធ្វើឱ្យសហគមន៍អន្តរជាតិនានាសម្រេចបញ្ឈប់ផ្ដល់ជំនួយទាំងឡាយដល់ប្រទេសមួយនេះផងដែរ។
ទាក់ទិននឹងករណីនេះ លោក David Beasley បន្ថែមថា៖ «អ្វីដែលយើងបានរំពឹងទុកកាលពីពេលកន្លងទៅ បានក្លាយជាការពិតហើយ។ សេដ្ឋកិច្ចរបស់ប្រទេសនេះកំពុងតែមានការធ្លាក់ចុះលឿនជាងអ្វីដែលអ្នករាល់គ្នាបានរំពឹងទុកទៅទៀត»។
គិតចាប់តាំងពីឡើងកាន់អំណាច ក្រុមតាលីបង់បានប្រឈមមុខនឹងវិបត្តិសេដ្ឋកិច្ចធ្ងន់ធ្ងរ ខណៈដែលរដ្ឋមន្ត្រីការបរទេសអាហ្វហ្គានីស្ថាន កាលពីពេលកន្លងទៅ ក៏ធ្លាប់បានអំពាវនាវដល់ម្ចាស់ជំនួយអន្តរជាតិនានាឱ្យចាប់ផ្តើមផ្ដល់ជំនួយឡើងវិញដល់ប្រទេសនេះផងដែរ៕