អាជ្ញាធរអូស្ត្រាលី បានឱ្យដឹងនៅថ្ងៃពុធនេះថា ពលរដ្ឋរបស់ខ្លួននិងអ្នករស់នៅអចិន្ត្រៃយ៍ទាំងឡាយណាដែលបានចាក់វ៉ាក់សាំងរួចរាល់ នឹងអាចធ្វើដំណើរចាកចេញពីប្រទេសបានចាប់ពីថ្ងៃទី១ ខែវិច្ឆិកា ខាងមុខនេះ។
ពលរដ្ឋអូស្ត្រាលី មិនអាចធ្វើដំណើរចេញទៅក្រៅប្រទេសបានអស់រយៈពេលជាង១៨ខែមកហើយ ខណៈដែលប្រជាពលរដ្ឋរបស់ខ្លួនរាប់ពាន់នាក់ផ្សេងទៀតដែលរស់នៅក្រៅប្រទេស ក៏មិនអាចវិលត្រលប់ចូលមកកាន់ប្រទេសវិញបានផងដែរ បើទោះបីជាពួកគេបានចាក់វ៉ាក់សាំងការពារពេញលេញហើយក្ដី។
ទោះជាយ៉ាងណា ពួកគេទាំងអស់ត្រូវបានរំពឹងថានឹងវិលត្រលប់មកកាន់ប្រទេសវិញ បន្ទាប់ពីទីក្រុងស៊ីដនី (Sydney) និងមែលប៊ន (Melbourne) គ្រោងនឹងបញ្ចប់វិធានចត្តាឡីស័កសម្រាប់អ្នកដំណើរដែលចាក់វ៉ាក់សាំងរួចរាល់ ចាប់ពីថ្ងៃទី១ ខែវិច្ឆិកា តទៅ។
ទីភ្នាក់ងារសារព័ត៌មាន Reuters បានស្រង់សម្ដីនាយករដ្ឋមន្រ្តីអូស្រ្តាលី លោក Scott Morrison ដែលបានថ្លែងប្រាប់សារព័ត៌មានក្នុងស្រុកមួយថា៖ «ផែនការជាតិកំពុងតែដំណើរការ ដែលទាក់ទងទៅនឹងការបើកប្រទេសអូស្ត្រាលីឡើងវិញ ស្របពេលដែលចំនួននៃការចាក់វ៉ាក់សាំងស្ថិតនៅក្នុងអត្រាមួយខ្ពស់»។
ការសម្រេចដកបម្រាមធ្វើដំណើរចាប់ពីសប្ដាហ៍ក្រោយនេះ ត្រូវបានធ្វើឡើងស្របពេលដែលសិង្ហបុរី កាលពីថ្ងៃអង្គារម្សិលមិញ ក៏បានលើកឡើងថា ខ្លួននឹងអនុញ្ញាតឱ្យអ្នកដំណើរដែលបានចាក់វ៉ាក់សាំងរួចពីអូស្ត្រាលីចូលមកកាន់ប្រទេសរបស់ខ្លួន ដោយមិនតម្រូវឱ្យធ្វើចត្តាឡីស័ក ចាប់ពីថ្ងៃទី៨ ខែវិច្ឆិកាខាងមុខនេះផងដែរ។
គិតរហូតមកដល់ពេលនេះ អូស្ត្រាលីមានការឆ្លងវីរុសកូវីដ-១៩សរុបនៅក្នុងប្រទេសប្រមាណជាជាង១៦ម៉ឺនករណី និងអ្នកស្លាប់ចំនួន១ ៦៦៩នាក់ ហើយក្នុងនោះប្រជាជនរបស់ខ្លួនជាង ៦០% ហើយដែលទទួលបានការចាក់វ៉ាក់សាំងពេញលេញ៕