យ៉ាងហោចណាស់ មានរថយន្តគេចពន្ធប្រមាណជាង៥០០គ្រឿងបានចូលមកបំពេញកាតព្វកិច្ចពន្ធនិងអាករ គិតត្រឹមថ្ងៃទី២៦ ខែតុលា ខណៈអគ្គនាយកដ្ឋានគយនិងរដ្ឋាករកម្ពុជា បានបន្តអំពាវនាវឱ្យម្ចាស់រថយន្តគេចពន្ធរាប់ពាន់គ្រឿងទៀតបន្តចូលមកបង់ពន្ធ និងបំពេញកាតព្វកិច្ចពន្ធតាមនីតិវិធីច្បាប់។
ក្នុងសន្និសីទសារព័ត៌មានស្តីពី «វឌ្ឍនភាពនៃការអនុវត្តការប្រមូលពន្ធលើយានយន្តគ្មានពន្ធ និងអាករនាំចូល» លោក គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានលើកឡើងថា ចាប់ពីថ្ងៃទី១០ ខែកញ្ញា ដល់ថ្ងៃទី២៦ ខែតុលា មានរថយន្តសរុប៥៤២គ្រឿងបានចូលមកបង់ពន្ធ ក្នុងនោះ មានរថយន្តចង្កូតឆ្វេង៣៥២គ្រឿង ស្មើនឹងថវិកា៥,៨លានដុល្លារ និងរថយន្តចង្កូតស្តាំបានមកកក់ប្រាក់សម្រាប់ទុកពេលធ្វើការកែចង្កូត (ពីស្តាំមកឆ្វេង) ចំនួន១៩០គ្រឿង គិតជាថវិកា១,៥លានដុល្លារ។
បើតាមលោក គុណ ញឹម ជាសរុបមក អគ្គនាយកដ្ឋានគយប្រមូលបានថវិកាប្រមាណជា៧,៣លានដុល្លារអាមេរិកពីការស្ម័គ្រចិត្តចូលមកបំពេញកាតព្វកិច្ចពន្ធនិងអាករ ក្នុងរយៈពេលជិត៥០ថ្ងៃមកនេះ។
ការចូលមកបំពេញកាតព្វកិច្ចពន្ធនិងអាករ ដោយមានការអនុគ្រោះ ១០% លើប្រាក់ពន្ធនិងអាករនាំចូលនេះ នឹងត្រូវបញ្ចប់ត្រឹមថ្ងៃទី៣១ ខែធ្នូ ឆ្នាំ២០២១ សម្រាប់រថយន្តចង្កូតឆ្វេង ខណៈការអនុគ្រោះសម្រាប់រថយន្តចង្កូតស្តាំ នឹងត្រូវបញ្ចប់នៅថ្ងៃទី៣០ ខែមិថុនា ឆ្នាំ២០២២។
បើតាមការប៉ាន់ស្មាន នៅកម្ពុជាមានរថយន្តគេចពន្ធជ្រកក្រោមស្លាកលេខផ្សេងៗ ដូចជា ស្លាកលេខ ខ.ម, ន.ប, ស្លាកលេខរដ្ឋ និងស្លាកលេខផ្សេងៗ ប្រមាណជា១ ០០ ០០០គ្រឿង ដែលកំពុងចរាចរនៅលើដងផ្លូវនៅទូទាំងប្រទេស។
គួរជម្រាបជូនថា រដ្ឋាភិបាលនឹងចាប់ផ្តើមអនុវត្តវិធានការច្បាប់បង្ក្រាបលើរថយន្តគ្មានពន្ធនិងអាករនាំចូលនេះ ចាប់ថ្ងៃទី១ ខែកក្កដា ឆ្នាំ២០២២តទៅ ហើយនៅពេលនោះ រថយន្តចង្កូតស្តាំដែលបង្ក្រាបបាន នឹងត្រូវកម្ទេចចោលឬដោះបំបែកជាគ្រឿងបន្លាស់តែម្តង៕