អគ្គនាយកដ្ឋានគយ និងរដ្ឋាករកម្ពុជា ព្រមានជាថ្មី ក្នុងការចាត់វិធានការក្ដៅទៅលើរថយន្តចង្កូតឆ្វេងដែលមិនបង់ពន្ធ និងកម្ទេចចោលនូវរថយន្តចង្កូតស្តាំដែលជាប្រភេទទំនិញហាមឃាត់ការនាំចូល ខណៈថ្ងៃឱសានវាទនៃយុទ្ធនាការប្រមូលពន្ធនិងអាករនាំចូលរថយន្តគ្មានពន្ធមានស្រាប់ក្នុងប្រទេស នឹងផុតកំណត់នៅចុងខែមិថុនានេះ។
អគ្គនាយកដ្ឋានគយ និងរដ្ឋាករ (អគរ) បញ្ជាក់ក្នុងសេចក្តីជូនដំណឹងមួយចុះថ្ងៃទី១៣ ខែមិថុនា ឆ្នាំ២០២២ ថាយុទ្ធនាការប្រមូលពន្ធនិងអាករនាំចូលលើរថយន្តគ្មានពន្ធមានស្រាប់ក្នុងប្រទេស នឹងត្រូវបញ្ចប់ត្រឹមថ្ងៃទី៣០ ខែមិថុនា ឆ្នាំ២០២២។ ក្នុងនោះ អគរ ក្រើនរំឭកដល់ម្ចាស់រថយន្តគ្មានពន្ធមានស្រាប់ក្នុងប្រទេសទាំងអស់ ត្រូវរួសរាន់ទៅបំពេញកាតព្វកិច្ចពន្ធនិងអាករ ឬតម្កល់ប្រាក់កក់ (ចំពោះរថយន្តចង្កូតស្ដាំ) ឱ្យបានទាន់ថ្ងៃឱសានវាទនេះ។
បើមិនដូច្នេះទេ ស្ថាប័នរដ្ឋមួយនេះថានឹងអនុវត្តវិធានការក្តៅ ពោលគឺចាប់ពីថ្ងៃទី១ ខែកក្កដា តទៅ រថយន្តចង្កូតឆ្វេងដែលបង្ក្រាបបាន នឹងតម្រូវឱ្យបង់ពន្ធនិងអាករ រួមទាំងប្រាក់ពិន័យ ខណៈរថយន្តគ្មានពន្ធចង្កូតស្ដាំ ដែលជាប្រភេទទំនិញហាមឃាត់ការនាំចូល ក្នុងករណីបង្ក្រាបបាន នឹងត្រូវកម្ទេចចោល ឬដោះបំបែកជាគ្រឿងបន្លាស់ តាមនីតិវិធីជាធរមាន។
តាមសេចក្ដីប្រកាសព័ត៌មានស្ដីពីលទ្ធផលសម័យប្រជុំពេញអង្គគណៈរដ្ឋមន្ត្រី ក្រោមវត្តមានលោក ហ៊ុន សែន កាលពីថ្ងៃទី៨ ខែតុលា ឆ្នាំ២០២១ រាជរដ្ឋាភិបាលប្តេជ្ញាបញ្ចប់ករណីរថយន្តមិនបង់ពន្ធនាំចូល និងរថយន្តចង្កូតស្តាំខុសច្បាប់ ដែលចាត់ទុកថាជាបញ្ហាច្រំដែល ចាប់ពីថ្ងៃទី១ ខែកក្កដា ឆ្នាំ២០២២ តទៅ។
កាលពីថ្ងៃទី២៣ ខែកុម្ភៈ ឆ្នាំ២០២២ លោកនាយករដ្ឋមន្ត្រី ហ៊ុន សែន បានចេញបញ្ជាផ្ទាល់មាត់ឱ្យមន្ត្រី និងអ្នកមានទ្រព្យមួយចំនួន បំពេញកាតព្វកិច្ចបង់ពន្ធតាមច្បាប់កំណត់ ដើម្បីបញ្ចៀសមហន្តរាយជាតិ ខណៈលោកថា ប៉ុន្មានឆ្នាំជាប់គ្នាមកនេះ រដ្ឋបានចំណាយច្រើនជាងប្រាក់ចំណូលដែលរកបាន។
លោកបន្តថា អាជ្ញាធរគ្រប់លំដាប់ថ្នាក់មិនគួរបណ្ដែតបណ្ដោយឱ្យវប្បធម៌គេចពន្ធបន្តរស់រានមានជីវិតតទៅទៀតនោះទេ។ ករណីនេះ លោកចេញបញ្ជាឱ្យអាជ្ញាធរគ្រប់លំដាប់ថ្នាក់ ត្រូវរួមគ្នាធ្វើយុទ្ធនាការគាំទ្រអង្គភាពប្រមូលពន្ធ ទាំងផ្នែកគយនិងពន្ធដារ ដើម្បីទប់ស្កាត់ហានិភ័យជាតិ។
បើតាមលោកនាយករដ្ឋមន្ត្រី រថយន្តគេចពន្ធមានប្រមាណ១ម៉ឺនគ្រឿង គិតជាប្រាក់ពន្ធប្រហែល១០០លានដុល្លារ៕