រដ្ឋាភិបាលកម្ពុជាបានផ្ដល់វ៉ាក់សាំងការពារជំងឺកូវីដ-១៩ ចំនួន២សែនដូស ជូនដល់រដ្ឋាភិបាលវៀតណាមនៅថ្ងៃនេះ ដើម្បីចូលរួមប្រយុទ្ធប្រឆាំងនឹងជំងឺកូវីដ-១៩។
ពិធីប្រគល់និងទទួលវ៉ាក់សាំងការពារជំងឺកូវីដ-១៩ពីកម្ពុជានេះ បានធ្វើឡើងនៅព្រំដែនបាវិត-មុកប៉ាយ ក្នុងខេត្តស្វាយរៀង នៅព្រឹកថ្ងៃទី២៩ ខែតុលានេះ ដោយមានការចូលរួមប្រគល់ដោយលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ តំណាងឱ្យលោកនាយករដ្ឋមន្ត្រី ហ៊ុន សែន។
កាលពីថ្ងៃទី២៩ ខែកញ្ញា កម្ពុជាក៏បានផ្ដល់វ៉ាក់សាំងការពារជំងឺកូវីដ-១៩ ចំនួន២សែនដូស ដល់ប្រទេសឡាវផងដែរ។ ការផ្ដល់វ៉ាក់សាំងការពារជំងឺកូវីដ-១៩ ដល់ប្រទេសឡាវពេលនោះ និងវៀតណាមនៅពេលនេះ គឺធ្វើឡើងតែមួយថ្ងៃប៉ុណ្ណោះ ក្រោយពីលោកនាយករដ្ឋមន្ត្រី ហ៊ុន សែន បានចូលរួមកិច្ចប្រជុំត្រីភាគីរវាងមេដឹកនាំគណបក្សដឹកនាំប្រទេសកម្ពុជា វៀតណាម ឡាវ កាលពីថ្ងៃទី២៦ ខែកញ្ញា នៅទីក្រុងហាណូយ ប្រទេសវៀតណាម។ ក្រៅពីវៀតណាម និងឡាវ កម្ពុជាក៏បានផ្ដល់ម៉ាសនិងបរិក្ខារពេទ្យជាច្រើនប្រភេទទៀតដល់ប្រទេសជាច្រើនទៀត ដូចជា ប្រទេសមីយ៉ាន់ម៉ា ទីម័រខាងកើត និងប្រទេសនេប៉ាល់ ជាដើម។
លោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសប៊ុកនៅថ្ងៃនេះថា ក្នុងអំឡុងពេលរាតត្បាតនៃជំងឺកូវីដ-១៩នេះ ក្នុងនាមជាប្រមុខរដ្ឋាភិបាលកម្ពុជា លោកបានផ្ដល់នូវជំនួយជាបន្តបន្ទាប់ទៅកាន់ប្រទេសជាសមាជិកអាស៊ានផ្សេងទៀត ដើម្បីចូលរួមចំណែកប្រយុទ្ធប្រឆាំងនឹងជំងឺកូវីដ-១៩។
ការផ្ដល់វ៉ាក់សាំងរបស់កម្ពុជាជូនប្រទេសសមាជិកអាស៊ាននេះ គឺជាការបង្ហាញនូវសមានចិត្តមនុស្សធម៌ សប្បុរសធម៌របស់លោកនាយករដ្ឋមន្ត្រី ចំពោះសុខភាពនិងសុខុមាលភាពប្រជាពលរដ្ឋនៃប្រទេសដែលរស់នៅជាប់ព្រំដែនជាមួយគ្នា ក៏ដូចជាប្រជាពលរដ្ឋរស់នៅក្នុងតំបន់៕
