មន្ត្រីអង្គការសង្គមស៊ីវិល បារម្ភពីការឆ្លងរាលដាលនៃជំងឺកូវីដ-១៩ទ្រង់ទ្រាយធំឡើងវិញ ដែលធ្វើឱ្យប៉ះពាល់ដល់សេដ្ឋកិច្ចធ្ងន់ធ្ងរ ប្រសិនបើរដ្ឋាភិបាលនិងអ្នកពាក់ព័ន្ធមិនបានពង្រឹងការអនុវត្តវិធានសុខាភិបាលឱ្យបានតឹងរ៉ឹងទេនោះ។
ការព្រួយបារម្ភនេះធ្វើឡើងបន្ទាប់ពីប្រមុខរដ្ឋាភិបាល លោក ហ៊ុន សែន បានប្រកាសបើកប្រទេសឡើងវិញលើគ្រប់វិស័យ ចាប់ពីថ្ងៃទី១ ខែវិច្ឆិកា ឆ្នាំ២០២១តទៅ ដោយយោងទៅលើកត្តាសំខាន់ចំនួន៤ រួមមាន ការសម្រេចបានលទ្ធផលនៃការចាក់វ៉ាក់សាំងកូវីដ-១៩ ការពង្រឹងនិងពង្រីកសមត្ថភាពក្នុងការព្យាបាលជំងឺកូវីដ-១៩ ការឆ្លងកាត់បទពិសោធន៍នៃការគ្រប់គ្រងទប់ស្កាត់ការឆ្លងរាលដាលនៃជំងឺកូវីដ-១៩ ព្រមទាំងរបៀបគ្រប់គ្រងទប់ស្កាត់នៃជំងឺនេះក្នុងទ្រង់ទ្រាយធំ និងការយល់ដឹងរបស់ប្រជាពលរដ្ឋក្នុងការការពារខ្លួន និងការព្យាបាលជំងឺកូវីដ-១៩ ជាដើម។
ប្រធានមជ្ឈមណ្ឌលប្រជាពលរដ្ឋដើម្បីការអភិវឌ្ឍនៅកម្ពុជា លោក យង់ គិមអេង មានប្រសាសន៍នៅថ្ងៃអង្គារនេះថា ការបើកប្រទេសឡើងវិញ គឺជារឿងមួយប្រសើរ ប៉ុន្តែត្រូវប្រយ័ត្នប្រយែងជានិច្ច ពីព្រោះអាចឆ្លងរីករាលដាលសារជាថ្មីមកលើប្រទេសកម្ពុជា ដែលធ្វើឱ្យខូចខាតសេដ្ឋកិច្ចយ៉ាងធ្ងន់ធ្ងរ ខណៈនៅលើពិភពលោកមិនទាន់មានការបើកប្រទេសពេញលេញនៅឡើយ ហើយវីរុសដែលបំប្លែងខ្លួនថ្មីនៅតែជាបញ្ហាប្រឈមរបស់ពិភពលោក។
លោកលើកឡើងថា៖ «ហានិភ័យឆ្លងហ្នឹង វាអាចនឹងកើតមាន ប្រសិនបើអត់មានការប្រុងប្រយ័ត្ន អត់មានវិធានការជាក់លាក់ នេះជារឿងមួយសំខាន់! ព្រោះយើងដឹងហើយថា ការដើរហើរមួយកន្លែងទៅមួយកន្លែង នៅហាងផឹងកស៊ី ដែលធ្វើឱ្យមានហានិភ័យខ្ពស់សម្រាប់ដំណាក់កាលនៃការបើកប្រទេសឡើងវិញនេះ»។
លោកបន្ថែមថា៖ «នៅក្នុងដំណាក់កាលដំបូង រដ្ឋាភិបាលគួរតែកុំទាន់បើកដំណាលគ្នាចំពោះវិស័យណាដែលងាយឆ្លងកូវីដ-១៩ ដូចជា កន្លែងកម្សាន្ត ក្លឹប ខារ៉ាអូខេ ជាដើម ត្រូវតែរក្សាវិធានការសុខាភិបាលឱ្យបានខ្ជាប់ខ្ជួន និងសូមឱ្យមន្រ្តីថ្នាក់មូលដ្ឋានអនុវត្តឱ្យមានប្រសិទ្ធភាព ចៀងវាងប្រព្រឹត្តអំពើពុករលួយ ជាដើម»។
ចំណែកសមាគមគ្រូពេទ្យគុណធម៌កម្ពុជា លោក អ៊ូច វុទ្ធី គាំទ្ររដ្ឋាភិបាលដែលបើកប្រទេសឱ្យដំណើរការឡើងវិញ ដើម្បីឱ្យប្រជាពលរដ្ឋ ជាពិសេសអ្នកដែលក្រីក្រនិងជំពាក់បំណុលធនាគារ បានរកប្រាក់សងបំណុលគេវិញ ។
ប៉ុន្តែលោកថា បើអាជ្ញាធរពាក់ព័ន្ធនិងប្រជាពលរដ្ឋមិនពង្រឹងការអនុវត្តវិធានសុខាភិបាលឱ្យបានខ្ជាប់ខ្ជួនទេ នឹងធ្វើឱ្យការឆ្លងរាលដាលនៃជំងឺកូវីដ-១៩នៅតែបន្តកើតមាន។
លោកមានប្រសាសន៍ថា៖ «សូមឱ្យបងប្អូនចេះការពារខ្លួនឯងគ្រប់ៗគ្នា ហើយកុំបណ្ដោយខ្លួន នៅពេលដែលរដ្ឋាភិបាលបើកទូលាយ។ យើងបណ្ដែតបណ្ដោយខ្លួន ជួបជុំគ្នាអត់ស្រាកស្រាន្ត ហើយយើងមិនការពារខ្លួន មិនពាក់ម៉ាស់ មិនរក្សាគម្លាតគ្នា មិនសម្អាត មិនអនាម័យខ្លួនយើង កន្លែងហ្នឹងហើយដែលធ្វើឱ្យជំងឺដ៏កាចសាហាវវាឆ្លង មិនមែនថាតែជំងឺកូវីដទេ វាមានជំងឺផ្សេងៗទៀត»។
អគ្គនាយកបច្ចេកទេសសុខាភិបាល លោក ហុក គឹមចេង មានប្រសាសន៍ថា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩មានប្រសិទ្ធភាពខ្ពស់បាន លុះត្រាតែមានការចូលរួមពីប្រជាពលរដ្ឋ និងម្ចាស់អាជីវកម្ម ភោជនីយដ្ឋាន និងកន្លែងកម្សាន្ត (ក្លឹប ខារ៉ាអូខេ) ឬកន្លែងដែលបិទជិត ជាដើម។
យ៉ាងណា លោកបញ្ជាក់ថា បើសិនជាប្រជាពលរដ្ឋនិងម្ចាស់អាជីវកម្មទាំងអស់មិនអនុវត្តវិធានការសុខាភិបាលឱ្យបានខ្ជាប់ខ្ជួនទេ ហើយពលរដ្ឋឬម្ចាស់ទីតាំងអាជីវកម្មនោះនាំឱ្យមានការរាលដាលជំងឺកាចសាហាវនេះ នឹងត្រូវទទួលខុសត្រូវចំពោះមុខច្បាប់ផងដែរ។
លោកមានប្រសាសន៍ថា៖ «នៅពេលដែលវិធានការច្បាប់នៃច្បាប់ស្ដីពី “វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត” នៅជាធរមាន ដូច្នេះ ក្នុងករណីដែលបុគ្គលណាមួយមានការឆ្លងកូវីដ គាត់មិនគោរពទៅតាមវិធានការរបស់រដ្ឋបាល នាំឱ្យឆ្លងទៅដល់អ្នកដទៃ គឺគាត់ត្រូវទទួលខុសត្រូវចំពោះមុខច្បាប់ដែលចូលជាធរមាន»។
កាលពីថ្ងៃម្សិលមិញ លោកនាយករដ្ឋមន្ត្រី ហ៊ុន សែន បានបញ្ជាទៅក្រសួងសុខាភិបាលឱ្យពង្រឹងសមត្ថភាពព្យាបាលជំងឺ-១៩ឡើងវិញ ក្រោយរកឃើញថា អត្រាភាគរយនៃអ្នកស្លាប់នៅកម្ពុជា ដោយសារជំងឺរលាកផ្លូវដង្ហើមធ្ងន់ធ្ងរនេះ ខ្ពស់ជាងបណ្ដាប្រទេសមួយចំនួន រួមទាំងប្រទេសថៃ និងវៀតណាម។
លោកបញ្ជាក់ថា បើគិតពីអត្រាអ្នកឆ្លងជាចំនួនមនុស្ស កម្ពុជាមានអត្រាទាបជាងបណ្ដាប្រទេសមួយចំនួន ដូចជា ថៃ វៀតណាម ម៉ាឡេស៊ី បារាំង រុស្ស៊ី អាមេរិក និងចិន ជាដើម។ ប៉ុន្តែលោកថា បើគិតជាភាគរយនៃចំនួនអ្នកស្លាប់វិញ កម្ពុជាមានអត្រាខ្ពស់ជាងគេ ដោយលោកថា ជាតួលេខមួយស្ថិតក្នុងការព្រួយបាម្ភនៅឡើយ ដែលត្រូវពង្រឹងសមត្ថភាពព្យាបាលឡើងវិញ។
បើតាមក្រសួងសុខាភិបាល គិតត្រឹមព្រឹកថ្ងៃអង្គារនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១១៨ ៧០២នាក់ ក្នុងនោះ អ្នកជំងឺព្យាបាលជាសះស្បើយចំនួន១១៥ ០១៧នាក់ អ្នកស្លាប់កើនដល់ចំនួន២ ៨០០នាក់ និងករណីនាំចូលពីក្រៅប្រទេសចំនួន១៩ ៦៤៥នាក់ ៕