មេធាវីការពារក្ដីឱ្យលោក ឆន ផល្លា ដែលជាសកម្មជនបរិស្ថាននិងដីធ្លីម្នាក់នៅខេត្តរតនគិរី បានឱ្យដឹងថា តុលាការបានពន្យារពេលប្រកាសសាលក្រមកូនក្ដីរបស់ខ្លួនចំនួន២លើកមកហើយ ដោយសារមន្ត្រីនៅពន្ធនាគារខេត្តមានបញ្ហាឆ្លងជំងឺកូវីដ-១៩។
មេធាវីការពារក្ដីឱ្យលោក ឆន ផល្លា គឺលោក សំ ទិត្យសីហា ប្រាប់ វីអូឌី នៅថ្ងៃពុធនេះថា ថ្នាក់ដឹកនាំពន្ធនាគារបានស្នើទៅតុលាការខេត្តរតនគិរី ដើម្បីសុំពន្យារពេលប្រកាសសាលក្រមជាលើកទី២ លើសំណុំរឿងលោក ឆន ផល្លា ទៅសប្ដាហ៍ក្រោយវិញ ដោយសារមន្ត្រីពន្ធនាគារមួយចំនួនឆ្លងជំងឺកូវីដ-១៩។
លោកមានប្រសាសន៍ថា៖ «ខាងពន្ធនាគារ គេដាក់ពាក្យមួយស្នើសុំខាងតុលាការ សុំផ្អាកក្នុងការបញ្ជូនជនជាប់ចោទ ជនត្រូវចោទ ដែលកំពុងតែឃុំខ្លួននៅពន្ធនាគារខេត្តរតនគិរីហ្នឹង សុំផ្អាករយៈពេល៧ថ្ងៃក្នុងការដឹកជញ្ជូន ដោយសារមានមន្ត្រីពន្ធនាគារចំនួន៧នាក់ គាត់មានបញ្ហាឆ្លងកូវីដ-១៩ អ៊ីចឹងតុលាការសម្រេចថា លើកពេលប្រកាសសាលក្រមទៅថ្ងៃទី១០ ខែវិច្ឆិកាវិញ»។
លោក ឆន ផល្លា ត្រូវបានតុលាការបើកសវនាការកាត់ទោស កាលពីដើមខែតុលា ឆ្នាំ២០២១ ក្រោមការចោទប្រកាន់ពីបទ «កាប់គាស់ រុករាន ឆ្ការដុត និងឈូសឆាយដីព្រៃយកធ្វើជាកម្មសិទ្ធិ»។ តុលាការគ្រោងប្រកាសសាលក្រមលើសំណុំរឿងរបស់លោកនៅថ្ងៃទី២៧ ខែតុលា ប៉ុន្តែបានលើកពេលមកថ្ងៃទី៤ ខែវិច្ឆិកា និងបានស្នើសុំលើកពេលម្ដងទៀតទៅថ្ងៃទី១០ ខែវិច្ឆិកាវិញ។
ប្រធានពន្ធនាគារខេត្តរតនគិរី លោក អ៊ុក គឹមជន មានប្រសាសន៍ថា ដើមចមដែលនាំឱ្យគាត់ស្នើទៅតុលាការសុំពន្យារពេលនាំជនជាប់ចោទនិងជនត្រូវចោទទៅតុលាការកាត់សេចក្ដី ដោយសារមន្ត្រីពន្ធនាគារចំនួន៨នាក់ឆ្លងជំងឺកូវីដ-១៩ កាលពីសប្ដាហ៍មុន។
លោកបន្តថា បច្ចុប្បន្ននេះ ស្ថានភាពសុខភាពរបស់មន្ត្រីដែលឆ្លងជំងឺកូវីដ-១៩បានធូរស្រាលច្រើន ខណៈអ្នកជាប់ឃុំផ្សេងទៀតមិនមានអ្នកឆ្លងនោះទេ។ លោកថា នៅដើមសប្ដាហ៍ក្រោយ ខាងពន្ធនាគារនឹងបញ្ជូនអ្នកជាប់ឃុំទាំងនោះទៅតុលាការកាត់សេចក្ដីជាថ្មីវិញផងដែរ។
លោកមានប្រសាសន៍ថា៖ «យើងស្នើសុំពន្យារពេលការជម្រះក្ដី! ពីមុន មន្ត្រីយើងក្អក ផ្តាសាយឈឺកសឹងគ្រប់គ្នា តែឥលូវស្ថានភាពមន្ត្រីខ្ញុំ យើងតេស្តទៅ អត់មានអ្នកឆ្លងបន្តទេ។ អ៊ីចឹងវាអាចធូរស្រាលវិញ មួយសប្ដាហ៍នេះ យើងផុតការស្នើសុំពន្យារពេលហើយ ដូចជាថ្ងៃចន្ទសប្ដាហ៍ក្រោយនេះ ដល់ពេលដែលយើងនាំគាត់ទៅជំនុំជម្រះវិញហើយ»។
គួររំឮកថា លោក ឆន ផល្លា ត្រូវបានសមត្ថកិច្ចចាប់ខ្លួនកាលពីថ្ងៃចន្ទ ទី២០ ខែកញ្ញា ឆ្នាំ២០២១ ក្រោមការចោទប្រកាន់ថា សកម្មជនរូបនោះមិនព្រមចូលទៅបំភ្លឺតាមដីកាកោះរបស់ចៅក្រមស៊ើបសួរ ឈ្មោះ នៅ យ៉ារ័ត្ន ចុះថ្ងៃទី៩ ខែកុម្ភៈ ឆ្នាំ២០២១ ពាក់ព័ន្ធនឹងសំណុំរឿង «កាប់គាស់ រុករាន ឆ្ការដុត និងឈូសឆាយដីព្រៃយកធ្វើជាកម្មសិទ្ធិ»។
លោក ឆន ផល្លា ដែលមានវ័យ៤២ឆ្នាំ ធ្លាប់បានប្រាប់ វីអូឌី នាពេលកន្លងមកថា រូបលោកបានចូលរួមការពារព្រៃឈើតាំងពីឆ្នាំ២០១៦ ប៉ុន្តែចាប់តាំងពីឆ្នាំ២០១៧មក លោកធ្លាប់បានដាក់ពាក្យប្តឹងចំនួន៨ករណីទៅតុលាការប្រឆាំងនឹងមន្ត្រីមូលដ្ឋាននិងពលរដ្ឋមួយចំនួនទៀត ពាក់ព័ន្ធនឹងបទល្មើសព្រៃឈើនិងការទន្រ្ទានដីសហគមន៍ ប៉ុន្តែលោកថា ប្រមាណ៤ឆ្នាំមកនេះគ្មានបណ្ដឹងណាមួយរបស់លោកត្រូវបានចាត់ការនោះឡើយ។
មិនតែប៉ុណ្ណោះ លោកថា កាលពីខែកក្កដា ឆ្នាំ២០២០ លោកធ្លាប់ត្រូវបានមនុស្សមួយក្រុមព្រួតគ្នាវាយដំយ៉ាងធ្ងន់ធ្ងរនៅចំពោះមុខអាជ្ញាធរមូលដ្ឋានក្នុងវេទិកាសាធារណៈមួយ នៅពេលដែលលោកបានចោទសួរទៅកាន់អាជ្ញាធរពាក់ព័ន្ធនឹងការបណ្ដែតបណ្ដោយឱ្យមានបទល្មើសព្រៃឈើកើតឡើងនៅក្នុងតំបន់គ្រប់គ្រងរបស់ខ្លួន៕
