មន្ត្រីរដ្ឋាភិបាលកម្ពុជា ឱ្យដឹងថា ប្រទេសបារាំងបានផ្ដល់ជំនួយ៤៥ម៉ឺនអឺរ៉ូ ឬស្មើជាង៥២ម៉ឺនដុល្លារ ដល់កម្ពុជា សម្រាប់ជួយផ្នែកបច្ចេកទេស និងពង្រឹងសមត្ថភាពអាកាសយានដ្ឋានកម្ពុជា ស្របពេលអាកាសយានដ្ឋានតារាសាគរ នៅខេត្តកោះកុង គ្រោងនឹងដាក់ដំណើរការសាកល្បងនៅដើមឆ្នាំ២០២២។
អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោក ស៊ី ចាន់សិរីវុត្ថា មានប្រសាសន៍នៅថ្ងៃពុធនេះថា ក្នុងពិធីចុះហត្ថលេខាកាលពីថ្ងៃម្សិលមិញ ប្រទេសបារាំងបានផ្ដល់ជំនួយនូវទឹកប្រាក់ជាង៥២ម៉ឺនដុល្លារ ដែលជំនួយនេះនឹងផ្ដោតលើការងារជាអាទិភាពចំនួន៤ រួមមាន ការកែលម្អបរិស្ថានអាកាសយានដ្ឋាន ការជួសជុលនិងថែទាំអាកាសយានដ្ឋាន ការកសាងសម្ថភាពនិងពង្រឹងផ្នែកពេទ្យ និងការពង្រឹងសុវត្ថិភាពនៅអាកាសយានដ្ឋាន។
លោកបន្តទៀតថា កិច្ចសហប្រតិបត្តិការបារាំងជាមួយកម្ពុជាចាប់ផ្តើមតាំងពីឆ្នាំ១៩៩៩មក ក្នុងនោះ បារាំងបានជួយដល់កម្ពុជាជាច្រើន ដូចជា ការផ្ដល់ជំនួយជាកញ្ចប់ថវិកា ផ្ដល់អាហារូបករណ៍ដល់និស្សិតកម្ពុជា និងផ្ដល់អ្នកជំនាញការមកកម្ពុជា ជាដើម។
លោក លោក ស៊ី ចាន់សិរីវុត្ថា បន្ថែមថា៖ «យើងស្នើសុំគេ ព្រោះយើងមានកិច្ចសហប្រតិបត្តិការជាមួយបារាំងយូរឆ្នាំហើយ តែកន្លងមកក៏វារយាលទៅតាំងពីឆ្នាំ១៩៩៩មក បារាំងបានផ្ដល់ឱ្យយើងដែរហ្នឹង ផ្ដល់អ្នករៀនទៅបារាំង ផ្ដល់ជំនាញការមកធ្វើការជាមួយយើង ធ្លាប់ផ្ដល់ការសិក្សាជាដើម»។
ចំណែក ការដាក់ដំណើរការអាកាសយានដ្ឋានតារាសាគរ នៅខេត្តកោះកុងវិញ លោក ស៊ី ចាន់សិរីវុត្ថា គូសបញ្ជាក់ថា បើមិនមានឧបសគ្គទេ អាកាសយានដ្ឋាននេះនឹងចាប់ផ្ដើមដំណើរការសាកល្បងនៅដើមឆ្នាំ២០២២ខាងមុខនេះ ហើយនឹងឈានទៅរកការបើកដំណើរការជាផ្លូវការឆាប់ៗនេះ។ លោកបន្តថា កន្លងមក មានបញ្ហាប្រឈមមួយចំនួនដែលធ្វើឱ្យការសាងសង់អាកាសយានដ្ឋាននេះ មានភាពយឺតយ៉ាវ ក្នុងនោះមានកត្តាធាតុអាកាស រួមមាន ខ្យល់ព្យុះ និងទឹកជំនន់ ក៏ដូចជាការរាតត្បាតជំងឺកូវីដ-១៩ នៅក្នុងការដ្ឋានសាងសង់ផងដែរ។
គួរបញ្ជាក់ថា អាកាសយានដ្ឋានអន្តរជាតិតារាសាគរ ត្រូវបានអភិវឌ្ឍដោយក្រុមហ៊ុនចិនមួយឈ្មោះ Chinese Firm Tianjin Union Development Group (UDG) ដែលទទួលបានដីសម្បទានសេដ្ឋកិច្ចពីរដ្ឋាភិបាល លើផ្ទៃដីជាង២១៨ហិកតា និងមានសមត្ថភាពអាចផ្ទុកយន្តហោះធុន Boeing 777 និង Airbus A340 បានផងដែរ៕
