ស្នងការនគរបាលខេត្តព្រះសីហនុ អះអាងថា ខ្លួនមិនទាន់ទទួលបានបណ្ដឹងពីសាច់ញាតិជនរងគ្រោះ ដែលប្ដឹងរឿងបងប្អូនរបស់ពួកគេចំនួន៣នាក់ត្រូវបានគេលក់និងបង្ខំឱ្យធ្វើការងារនោះនៅឡើយទេ ប៉ុន្តែសមត្ថកិច្ចនឹងស្រាវជ្រាវរកបណ្ដឹងនោះនិងមានចំណាត់ការ។
សាច់ញាតិជនរងគ្រោះបានប្រាប់ វីអូឌី កាលពីថ្ងៃម្សិលមិញថា ពួកគាត់បានដាក់ពាក្យបណ្ដឹងមួយទៅស្នងការដ្ឋាននគរបាលខេត្តព្រះសីហនុ កាលពីថ្ងៃទី១ ខែវិច្ឆិកា ឆ្នាំ២០២១ ដើម្បីសុំអន្តរាគមន៍ពីសមត្ថកិច្ចឱ្យជួយប្អូនៗរបស់ពួកគេ ៣នាក់ ដែលត្រូវថៅកែជនជាតិចិនលក់និងបង្ខំឱ្យធ្វើការងារនៅក្នុងក្រុមហ៊ុនកាស៊ីណូមួយក្នុងខេត្តព្រះសីហនុ។
ស្នងការនគរបាលខេត្តព្រះសីហនុ លោក ជួន ណារិន ប្រាប់ វីអូឌី នៅព្រហស្បតិ៍នេះថា រហូតមកដល់ម៉ោង១១ព្រឹកថ្ងៃនេះ លោកមិនទាន់ទទួលបានព័ត៌មាននិងបណ្ដឹងពាក់ព័ន្ធរឿងលក់មនុស្សនិងបង្ខំឱ្យធ្វើការងារនេះនៅឡើយទេ។ លោកថា លោកនឹងឱ្យមន្ត្រីស្រាវជ្រាវករណីនេះ ដើម្បីមានចំណាត់ការបន្តទៀត។
ស្នងការរូបនេះបានស្នើដល់សាច់ញាតិជនរងគ្រោះ ត្រូវសហការជាមួយសមត្ថកិច្ចឱ្យបានលឿនបំផុត ដើម្បីឱ្យមន្ត្រីជំនាញមានចំណាត់ការលើរឿងនេះ ព្រោះបើសាច់ញាតិផ្ដល់ព័ត៌មានឱ្យតែខាងសារព័ត៌មាន នោះនឹងធ្វើឱ្យសមត្ថកិច្ចពិបាកធ្វើការ។
លោកបន្ថែមថា៖ «អ៊ីចឹងខ្ញុំអត់យល់គាត់ហ្នឹង! សុំសហការជាមួយសមត្ថកិច្ច ឬឱ្យខាងសាព័ត៌មានជួយសហការ ពីព្រោះយើងនឹងទទួលបណ្ដឹងគ្រប់រឿង ទោះរឿងពិតឬមិនពិត គឺត្រូវតែទទួល! ដើម្បីបែងចែកជំនាញចុះប្រតិបត្តិការ។ អ៊ីចឹងខ្ញុំសុំឱ្យដើមបណ្ដឹងហ្នឹងត្រូវសហការជាមួយសមត្ថកិច្ច»។
វីអូឌី មិនអាចសុំការបញ្ជាក់បន្ថែមពីសាច់ញាតិជនរងគ្រោះបានទេ នៅថ្ងៃព្រហស្បតិ៍នេះ ដោយទូរសព្ទចូលតែគ្មានអ្នកទទួល។
ក្នុងបណ្ដឹងដាក់ទៅស្នងការដ្ឋាននគរបាលខេត្តព្រះសីហនុ កាលពីថ្ងៃទី១ ខែវិច្ឆិកានេះ លោក ឃុត ហេង រស់នៅក្រុងប៉ោយប៉ែត ខេត្តបន្ទាយមានជ័យ បានប្ដឹងជនជាតិចិនម្នាក់ដែលមានឈ្មោះហៅក្រៅ «អាឡុង» និងក្រុមហ៊ុនកាស៊ីណូមួយ ស្ថិតនៅភូមិ១ សង្កាត់៣ ក្រុងព្រះសីហនុ ដោយចោទថា បានយកប្អូនស្រី២នាក់និងប្អូនប្រុសម្នាក់របស់លោក ទៅធ្វើការនៅក្រុមហ៊ុនរបស់ពួកគេដោយបង្ខំ ហើយបានលក់បន្តពីក្រុមហ៊ុនមួយទៅក្រុមហ៊ុនមួយ និងពីមនុស្សម្នាក់ទៅមនុស្សម្នាក់ទៀត រួមទាំងរឹតត្បិតសិទ្ធិរបស់ពួកគេគ្រប់យ៉ាងថែមទៀត។
លោក ឃុត ហេង បានលើកឡើងក្នុងបណ្ដឹងថា កាលពីថ្ងៃទី២៧ ខែតុលា ឆ្នាំ២០២១ លោកបានទទួលទូរសព្ទពីប្អូនស្រីរបស់លោក ដោយនាងបានរៀបរាប់ថា ពួកគេទាំង៣នាក់ត្រូវគេលក់ឱ្យទៅធ្វើការផ្នែកអនឡាញនៅក្រុមហ៊ុនមួយដែលពួកគេមិនដឹងឈ្មោះ និងសន្យាផ្ដល់ប្រាក់ឈ្នួលចំនួន១ ០០០ដុល្លារក្នុងមួយខែ។
បណ្ដឹងដដែលឱ្យដឹងទៀតថា ក្រោយប្អូនប្រុសស្រីរបស់លោកបម្រើការងារអស់រយៈពេលជាង២ខែ ពួកគេទទួលបានប្រាក់ឈ្នួលតែ៥០០ដុល្លារប៉ុណ្ណោះ ហើយក៏បានសុំឈប់ពីការងារ ប៉ុន្តែខាងក្រុមហ៊ុនមិនអនុញ្ញាតឱ្យឈប់ឡើយ ដោយបន្តឃុំឃាំងនិងបង្ខំឱ្យចុះកុងត្រាធ្វើការងាររយៈពេល១២ខែទៀត រួមទាំងគំរាមលក់បន្តទៅក្រុមហ៊ុនផ្សេងមួយទៀតផង។
ករណីនេះ មន្ត្រីសង្គមស៊ីវិលបានជំរុញដល់សមត្ថកិច្ចខេត្តព្រះសីហនុឱ្យ ធ្វើការស៊ីបអង្កេតដោយយកចិត្តទុកដាក់ទៅលើពាក្យបណ្ដឹងរបស់ជនរងគ្រោះ និងធ្វើការសិក្សាស្រាវជ្រាវអំពីប្រភពនៃប្រតិបត្តិការក្រុមហ៊ុនល្បែងស៊ីសងនេះផងដែរ។ ក្នុងករណីក្រុមហ៊ុននោះបើកល្បែងស៊ីសងខុសច្បាប់ និងធ្វើការបង្ខាំងមនុស្សខុសច្បាប់ លោកថា សមត្ថកិច្ចត្រូវវែកមុខរកជនល្មើសមកផ្ដន្ទាទោសទៅតាមច្បាប់ឱ្យខានតែបាន៕
