អាជ្ញាធរខេត្តសៀមរាប បានព្រមានចុះរុះរើផ្ទះប្រជាពលរដ្ឋចំនួន៧ខ្នងចេញពីដីចំណីស្ទឹងសៀមរាប បើពួកគេមិនរុះរើដោយខ្លួនឯងនៅក្នុងរយៈពេល៧ថ្ងៃ។
រដ្ឋបាលខេត្តសៀមរាប បានជូនដំណឹងកាលពីថ្ងៃទី៣ ខែវិច្ឆិកា ថាក្នុងចំណោមពលរដ្ឋចំនួន៧គ្រួសារនោះ គឺមានពលរដ្ឋចំនួន៥គ្រួសារបានទទួលយកសំណងតាមគោលនយោបាយរួចហើយ តែមិនទាន់បានរុះរើសំណងរបស់ខ្លួនចេញនៅឡើយ ខណៈមានប្រជាពលរដ្ឋចំនួន២គ្រួសារទៀតបានមកសាងសង់លើដីចំណីស្ទឹងដែលបានដោះស្រាយតាមគោលនយោបាយរួចហើយ។
រដ្ឋបាលខេត្តសៀមរាប សរសេរថា៖ «ក្នុងករណីបងប្អូនមិនអនុវត្តតាមសេចក្ដីជូនដំណឹងនេះ រដ្ឋបាលខេត្តនឹងដឹកនាំកម្លាំងចម្រុះចុះរុះរើ ដោយពុំទទួលខុសត្រូវលើការខូចខាតទ្រព្យសម្បត្តិរបស់បងប្អូនឡើយ»។
តាមរយៈសេចក្ដឹជូនដំណឹងដដែល រដ្ឋបាលខេត្តសៀមរាបបានប្រាប់ឱ្យស្នងការដ្ឋាននគរបាលខេត្ត បញ្ជាការដ្ឋានកងរាជអាវុធហត្ថខេត្ត រដ្ឋបាលក្រុងសៀមរាប រដ្ឋបាលសង្កាត់ ម្ចាស់សំណង់ទាំងអស់ ត្រូវសហការអនុវត្តសេចក្ដីជូនដំណឹងនេះតាមភារកិច្ចរៀងៗខ្លួន។
គួរជម្រាបជូនថា អាជ្ញាធរខេត្តសៀមរាបបាននិងកំពុងអនុវត្តគម្រោងស្ដារស្ទឹងសៀមរាបជំហាន២ (KHM-18) ក្រោមឥណទានរបស់ធនាគារសាធារណរដ្ឋកូរ៉េ ដើម្បីបញ្ចៀសទឹកលិចក្រុងសៀមរាប នាដូវវស្សា ចាប់ពីចំណុចស្ពានវាងក្រុងទៅប៉ែកខាងក្រោម រហូតដល់ភូមិអារញ្ញ ដែលមានប្រវែង៥គីឡូម៉ែត្រ ស្ថិតនៅក្នុងសង្កាត់សៀមរាប៕
