ព្រះមហាក្សត្រ ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី បានយាងទៅកាន់ប្រទេសបារាំង នៅព្រឹកមិញនេះ ដើម្បីចូលរួមមហាសន្និបាតលើកទី៤១ របស់អង្គការយូណេស្កូ ដែលនឹងប្រព្រឹត្តទៅចាប់ពីថ្ងៃទី១០ ដល់ថ្ងៃទី១៤ ខែវិច្ឆិកា ឆ្នាំ២០២១។
នៅក្នុងការយាងព្រះរាជដំណើរព្រះមហាក្សត្រទៅកាន់ប្រទេសបារាំង នៅឯអាកាសយានដ្ឋានអន្តរជាតិភ្នំពេញ ក៏មានការចូលរួមពីសំណាក់លោក សាយ ឈុំ ប្រធានព្រឹទ្ធសភា, លោក ហេង សំរិន ប្រធានរដ្ឋសភា, លោកនាយករដ្ឋមន្ត្រី ហ៊ុន សែន, លោកឧបនាយករដ្ឋមន្ត្រី គង់ សំអុល រដ្ឋមន្ត្រីក្រសួងព្រះបរមរាជវាំង និងលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ជាដើម។
សេចក្ដីប្រកាសព័ត៌មានរបស់ក្រសួងការបរទេសកម្ពុជា ចុះថ្ងៃទី៨ ខែវិច្ឆិកានេះ បានលើកឡើងថា ការយាងចូលរួមមហាសន្និបាតរបស់អង្គការយូណេស្កូនេះ ធ្វើឡើងតបតាមការយាងរបស់លោកស្រី អូដ្រេយ អាហ្សូឡេយ (Audrey Azoulay) អគ្គនាយិកានៃអង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (យូណេស្កូ)។
ប្រភពដដែលបន្តថា នៅថ្ងៃទី១២ ខែវិច្ឆិកា ឆ្នាំ២០២១ ជាមួយនឹងវត្តមានរបស់ប្រមុខរដ្ឋនិងរដ្ឋាភិបាលជាច្រើនរូប ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី នឹងថ្លែងព្រះរាជសុន្ទរកថានៅក្នុងពិធីបើកសម័យប្រជុំជាផ្លូវការនៃមហាសន្និបាតនេះ ដោយផ្ដោតលើសមិទ្ធផលសំខាន់ៗនៃអង្គការយូណេស្កូនៅក្នុងប្រទេសកម្ពុជា។
បើតាមក្រសួងការបរទេសកម្ពុជា ចាប់តាំងពីអង្គការយូណេស្កូបង្កើតឡើងនៅឆ្នាំ១៩៤៥ អង្គការនេះ បានរួមចំណែកយ៉ាងសំខាន់ដល់ការលើកតម្កើងវិស័យអប់រំ វិទ្យាសាស្រ្ត វប្បធម៌ និងការប្រាស្រ័យទាក់ទងគ្នានៅក្នុងពិភពលោក តាមរយៈកម្មវិធីកិច្ចសហប្រតិបត្តិការពហុភាគី៕