រដ្ឋាភិបាល​ណែនាំ​ឱ្យ​ធ្វើ​ពិធីបុណ្យ​រំឭកគុណ​អង្គរ​ជា​រៀងរាល់ឆ្នាំ​ដោយ​ចាប់​ពី​ឆ្នាំ២០២២​នេះទៅ

ភ្ញៀវទេសចរជាតិនិងអន្តរជាតិ មកកម្សាន្តនៅរមណីយដ្ឋានអង្គរវត្ត ខេត្តសៀមរាប ថ្ងៃទី១៣ ខែមីនា ឆ្នាំ២០២២។ (គួយ ឡង់ឌី)

​រដ្ឋាភិបាលបានតម្រូវឱ្យធ្វើពិធីបុណ្យ «រំឭកគុណអង្គរ» នៅរមណីយដ្ឋានអង្គរ ក្នុង​ខេត្ត​សៀមរាប រយៈពេល៣​ថ្ងៃ​ នៅ​ថ្ងៃ​ទី១៤​ ដល់​១៦​ ខែធ្នូ ជា​រៀង​រាល់​ឆ្នាំ ដោយ​គិត​ចាប់​ពី​ឆ្នាំ២០២២​នេះ​ត​ទៅ ដើម្បី​ចូល​រួម​ថែ​រក្សា​ការ​ពារ និង​លើក​តម្លៃបេតិកភណ្ឌ​ជាតិ។

កាលពីថ្ងៃទី​២៤ ខែវិច្ឆិកា ឆ្នាំ​២០២២ ក្រសួង​វប្បធម៌ និង​វិចិត្រ​សិល្បៈ បាន​ចេញ​សារាចរ​ណែនាំ​មួយ ​ស្តីពី «ការរៀបចំពិធីបុណ្យរំឭកគុណអង្គរ» ដោយក្នុងនោះ ក្រសួងបានណែនាំ​ដល់​អាជ្ញាធរ​ជាតិ​អប្សរា ឱ្យរៀបចំកម្មវិធីតាមថ្ងៃនីមួយៗ មាន​ទីតាំង​ប្រារព្ធ​ពិធី សមាសភាព​ចូល​រួម លិខិ​ត​អញ្ជើញ ខ្លឹម​សារ​បដា សុន្ទរកថាថ្នាក់ដឹកនាំ និងលទ្ធភាពថវិកា ជាដើម។

ក្រសួងក៏បាន​ណែនាំដល់អាជ្ញាធរជាតិអប្សរា ឱ្យរៀបចំសេចក្តីជូនដំណឹង និងការសម្ភាសឥស្សរជន អ្នក​ជំនាញ​ការ​ជាតិនិង​អន្តរជាតិ ថ្នាក់​ដឹកនាំពាក់ព័ន្ធ វិស័យឯកជន និងសាធារណជន ដើម្បីបង្ហាញសារសំខាន់ និងគុណប្រយោជន៍ នៃការរៀប​ចំ​ពិធីបុណ្យ​សម្រាប់​ផ្សព្វ​ផ្សាយ​តាម​គ្រប់​មធ្យោបាយ​ដល់​សាធារណជនបានដឹង ជាពិសេសយុវជនឱ្យកាន់តែមានស្មារតីក្នុងការចូលរួមថែរក្សា និងលើកតម្លៃបេតិកភណ្ឌជាតិ។

មួយទៀតនោះ កម្ម​វិធីនេះក៏តម្រូវ​ឱ្យអាជ្ញាធរជាតិ​អប្សរាដាក់តាំង​បង្ហាញ​នូវ​សមិទ្ធផល​សម្រេច​បាន​នានារបស់​ខ្លួន​ ជាពិសេស​សមិទ្ធផល​សម្រេចបានជាមួយដៃគូជាតិនិងអន្តរជាតិនៅតាមទីតាំងសំខាន់ៗ ដើម្បីបង្ហាញឱ្យឃើញពីការចូលរួមចំណែក​ដ៏មា​ន​តម្លៃក្នុងកិច្ចថែរក្សាការពារនិងអភិរក្សឱ្យបានគង់វង្សនៃបេតិកភណ្ឌជាតិ។

តំបន់​រមណីយដ្ឋានអង្គរ ត្រូវបានដាក់​ប​ញ្ចូល​ក្នុងបញ្ជីសម្បត្តិបេតិកភណ្ឌពិ​ភព​លោក​របស់​អង្គការយូណេស្កូ នៅ​ថ្ងៃ​ទី​១៤ ខែ​ធ្នូ ឆ្នាំ​១៩៩២ នាទី​ក្រុង​សាន់​តាហ្វេ សហរដ្ឋអាមេរិក ក្រោមព្រះរាជតម្រិះដ៏ថ្លៃថ្លា និង​ឈ្លាសវៃបំផុត នៃ​ព្រះក​រុណា ព្រះបាទ​សម្តេច​ព្រះ​នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពដែនដី និងឯកភាពជាតិខ្មែរ ព្រះបរមរតនកោដ្ឋ ដែលព្រះអង្គបានអំពាវនាវទៅកាន់អង្គការយូណេស្កូ សុំឱ្យជួយស្រោចស្រង់ និងការពារក្រុមប្រាសាទ​អង្គរ ដែល​បច្ចុប្បន្នជា​តំបន់រមណីយដ្ឋានអង្គរ​ ស្ថិតក្រោមការគ្រប់គ្រងរបស់អាជ្ញាធរជាតិអប្សរា៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered