តុលាការខេត្តរតនគិរី បានសម្រេចផ្ដន្ទាទោសសកម្មជនបរិស្ថាននិងដីធ្លី លោក ឆន ផល្លា ដាក់ពន្ធនាគាររយៈពេល៥ឆ្នាំ កាលពីថ្ងៃពុធម្សិលមិញ ពីបទ«កាប់បំផ្លាញព្រៃឈើដោយខុសច្បាប់»។
សកម្មជនរូបនេះ កាលពីពេលកន្លងទៅ ធ្លាប់បានប្ដឹងមន្ត្រីមួយចំនួនទៅកាន់តុលាការ ពាក់ព័ន្ធការរំលោភដីសាធារណៈរបស់រដ្ឋ និងបទល្មើសព្រៃឈើនៅតំបន់នោះ ហើយក្រោយមក លោកក៏ត្រូវបានគេព្រួតវាយយ៉ាងធ្ងន់ធ្ងរនៅចំពោះមុខអាជ្ញាធរមូលដ្ឋានក្នុងវេទិកាសាធារណៈមួយផងដែរ។
កាលពីថ្ងៃទី២០ ខែកញ្ញា កន្លងទៅ លោកក៏ត្រូវបានចាប់ខ្លួន បន្ទាប់ពីមន្ត្រីប៉ុស្តិ៍នគរបាលឃុំសេដា បានជូនដំណឹងឱ្យរូបលោកទៅកាន់ប៉ុស្តិ៍នគរបាល ដើម្បីកែសម្រួលអត្តសញ្ញាណបណ្ណត្រៀមខ្លួនបោះឆ្នោតនៅពេលខាងមុខ។ ការចាប់ខ្លួននេះធ្វើឡើងតាមដីកាកោះរបស់ចៅក្រមស៊ើបសួរ កាលពីខែកុម្ភៈ ពាក់ព័ន្ធនឹងសំណុំរឿង «កាប់គាស់ រុករាន ឆ្ការដុត និងឈូសឆាយដីព្រៃយកធ្វើជាកម្មសិទ្ធិ» កាលពីឆ្នាំ២០១៩ និង២០២០ ក្នុងស្រុកលំផាត់។
ព្រះរាជអាជ្ញារងអមសាលាដំបូងខេត្តរតនគិរី លោក កែវ ភក្ដី បានឱ្យដឹងនៅថ្ងៃទី១០ ខែវិច្ឆិកា ថាលោក ឆន ផល្លា ត្រូវបានចៅក្រម លោក ឈុន ច័ន្ទសីហា ផ្ដន្ទាទោសដាក់ពន្ធនាគាររយៈពេល៥ ឆ្នាំ តាមបញ្ញត្តិមាត្រា៦២ នៃច្បាប់ស្ដីពីតំបន់ការពារធម្មជាតិ ពាក់ព័ន្ធនឹងសំណុំរឿង «កាប់គាស់ រុករាន ឆ្ការដុត និងឈូសឆាយដីព្រៃយកធ្វើជាកម្មសិទ្ធិ»។
ទោះជាយ៉ាងណា លោកថា៖ «លោក ឆន ផល្លា មានសិទ្ធិប្ដឹងឧទ្ធរណ៍ទៅតាមច្បាប់»។
ទាក់ទិននឹងករណីនេះ លោក សំ ទិត្យសីហា មេធាវីការពារក្ដីឱ្យលោក ឆន ផល្លា បានលើកឡើងថា ការកាត់ទោសនេះជារឿងអយុត្តិធម៌មួយ។
លោកថ្លែងថា៖ «វាពិតជាអយុត្តិធម៌ខ្លាំងណាស់សម្រាប់កូនក្ដីរបស់ខ្ញុំ។ លោក ឆន ផល្លា គឺជាសកម្មជនមួយរូបដែលជួយការពារព្រៃឈើ ដីព្រៃ និងសហគមន៍ សម្រាប់ផលប្រយោជន៍រួម ប៉ុន្តែបែរជាត្រូវបានចោទប្រកាន់ទៅវិញ ខណៈដែលអ្នកកាប់បំផ្លាញព្រៃឈើត្រូវបានរួចទោស»។
លោក សំ ទិត្យសីហា បន្ថែមថា លោកក៏កំពុងតែរៀបចំប្ដឹងឧទ្ធរណ៍សម្រាប់ករណីនេះផងដែរ។
លោកបន្តថា៖ «ខ្ញុំបានរៀបចំឯកសារ ដើម្បីដាក់ទៅកាន់សាលាឧទ្ធរណ៍រួចរាល់ហើយ។ បច្ចុប្បន្ន ខ្ញុំកំពុងតែរង់ចាំមើលពីចំណាត់ការរបស់សាលាឧទ្ធរណ៍ថានឹងធ្វើអ្វីបន្ទាប់ទៀត»៕
បកប្រែនិងកែសម្រួលពីអត្ថបទដើមជាភាសាអង់គ្លេសដោយលោក ភុន ច័ន្ទឧសភា
