ប្រធានាធិបតីចិន លោក ស៊ី ជីនពីង ត្រូវបានរំពឹងថា នឹងប្រើប្រាស់កិច្ចប្រជុំតាមរយៈប្រព័ន្ធវីដេអូរបស់ខ្លួនជាមួយប្រធានាធិបតី លោក ចូ បៃឌិន ដើម្បីព្រមានសហរដ្ឋអាមេរិកឱ្យថយក្រោយ ឬដកខ្លួនចេញពីបញ្ហាកោះតៃវ៉ាន់។ នេះបើយោងតាមការចេញផ្សាយរបស់ប្រព័ន្ធផ្សព្វផ្សាយរដ្ឋចិននៅថ្ងៃចន្ទនេះ។
មេដឹកនាំនៃប្រទេសទាំងពីរគ្រោងនឹងជួបពិភាក្សាគ្នាតាមរយៈប្រព័ន្ធវីដេអូ នៅព្រឹកថ្ងៃអង្គារ ម៉ោងនៅក្នុងប្រទេសចិន ឬល្ងាចថ្ងៃចន្ទម៉ោងនៅសហរដ្ឋអាមេរិក ខណៈដែលភាពមិនចុះសម្រុងគ្នារវាងពួកគេនៅតែបន្តកើតមានឡើង រួមមានទាំងបញ្ហាពាណិជ្ជកម្ម បច្ចេកវិទ្យា និងជាពិសេសកោះតៃវ៉ាន់ ដែលចិនកំពុងតែទាមទារយកមកគ្រប់គ្រង។
ទោះជាយ៉ាងណា ប្រធានាធិបតីចិន ធ្លាប់បានឱ្យដឹងកាលពីពេលកន្លងទៅថា ប្រទេសរបស់លោកបានត្រៀមខ្លួនរួចជាស្រេចក្នុងការដោះស្រាយការខ្វែងគំនិតគ្នាឱ្យបានត្រឹមត្រូវជាមួយសហរដ្ឋអាមេរិក មុនពេលជំនួបពិភាក្សាតាមរយៈប្រព័ន្ធវីដេអូនេះជាមួយប្រធានាធិបតីសហរដ្ឋអាមេរិក។
គួរបញ្ជាក់ថា ភាពតានតឹងរវាងតៃវ៉ាន់និងចិនបានកើនឡើងក្នុងរយៈពេលប៉ុន្មានខែថ្មីៗនេះ ខណៈដែលចិននៅតែបន្តព្យាយាមដាក់សម្ពាធយោធាមួយចំនួន ដែលរួមមានសកម្មភាពពីសំណាក់កងទ័ពអាកាសរបស់ខ្លួនម្តងហើយម្តងទៀតនៅក្នុងដែនអាកាសតៃវ៉ាន់ ដែលខ្លួនអះអាងថាជាទឹកដីរបស់ខ្លួន។
ទាក់ទិននឹងករណីនេះ លោក ចូ បៃឌិន ធ្លាប់បានឱ្យដឹងកាលពីពេលកន្លងទៅថា សហរដ្ឋអាមេរិកនឹងគិតគូរអំពីការការពារកោះតៃវ៉ាន់ និងមានការប្តេជ្ញាចិត្តដើម្បីការពារកោះដែលចិនអះអាងថាជាទឹកដីរបស់ខ្លួនមួយនេះ៕
