ជំនួយការកំពូលមួយរូបរបស់ប្រធានាធិបតីហ្វីលីពីន លោក រ៉ូឌ្រីហ្គោ ឌុយទែរតេ (Rodrigo Duterte) បានឱ្យដឹងនៅថ្ងៃចន្ទនេះថា ប្រធានាធិបតីរូបនេះនឹងប្រកួតប្រជែងដណ្ដើមយកអាសនៈក្នុងព្រឹទ្ធសភារបស់ប្រទេសនេះ នៅក្នុងការបោះឆ្នោតនៅឆ្នាំក្រោយ ខណៈដែលលោកនឹងមិនឈរឈ្មោះជាអនុប្រធានាធិបតី ដើម្បីប្រជែងជាមួយនឹងកូនស្រីរបស់ខ្លួននោះទេ។
លោក គ្រីស្តូហ្វ័រ បុង ហ្គោ (Christopher “Bong” Go) ដែលជាជំនួយការស្និទ្ធនឹងលោក ឌុយទែរតេ ហើយក៏កំពុងតែឈរឈ្មោះជាប្រធានាធិបតីផងដែរនោះ បានបញ្ជាក់ឱ្យដឹងតាមរយៈសារជាអក្សរមកកាន់ទីភ្នាក់ងារសារព័ត៌មាន Reuters ថាប្រធានាធិបតីរូបនេះនឹងប្រកួតប្រជែងសម្រាប់កៅអីព្រឹទ្ធសភាក្នុងការបោះឆ្នោតឆ្នាំ២០២២ ខាងមុខ។
ការបញ្ជាក់នេះត្រូវបានធ្វើឡើងបន្ទាប់ពីមានការលើកឡើងមួយកាលពីថ្ងៃសៅរ៍កន្លងទៅ ដែលថាលោក ឌុយទែរតេ គ្រោងនឹងឈរឈ្មោះជាអនុប្រធានាធិបតី ហើយត្រូវប្រកួតប្រជែងជាមួយកូនស្រីរបស់ខ្លួន គឺលោកស្រី Sara Duterte-Carpio ក្នុងតំណែងនេះ។
អ្នកនាំពាក្យប្រធានាធិបតីហ្វីលីពីន លោក Harry Roque ក៏បានច្រានចោលការលើកឡើងនេះ នៅព្រឹកថ្ងៃចន្ទផងដែរ។
លោកថ្លែងថា៖ «អ្វីដែលខ្ញុំអាចនិយាយបាន គឺថាលោកប្រធានាធិបតី និងកូនស្រីរបស់លោកដែលកំពុងតែឈរឈ្មោះជាតំណែងអនុប្រធានាធិបតីនេះ ពិតជាស្រឡាញ់គ្នាខ្លាំងណាស់»។
លោកបន្តថា៖ «ពួកគេទាំងពីរនាក់នឹងមិនប្រកួតប្រជែងគ្នាក្នុងតំណែងដូចគ្នាណាមួយឡើយ»។
គួរបញ្ជាក់ថា ប្រជាជនហ្វីលីពីនជាង៦០លាននាក់នឹងចូលរួមការបោះឆ្នោតនៅខែឧសភា ឆ្នាំក្រោយ សម្រាប់ជ្រើសរើសតំណែងប្រធានាធិបតីថ្មី អនុប្រធានាធិបតី ក៏ដូចជាសមាជិកសភា និងមន្រ្តីរដ្ឋាភិបាលក្នុងតំបន់ជាង១៨ ០០០នាក់៕
