បញ្ហាទឹកជំនន់ដែលបន្តអូសបន្លាយរយៈពេលយូរ និងអត្រានៃការនាំចេញស្រូវថយចុះ បានធ្វើឱ្យតម្លៃនៃដំណាំមួយនេះក្នុងប្រទេសថៃ ធ្លាក់ចុះយ៉ាងគំហុកមកនៅត្រឹម៥បាតក្នុងមួយគីឡូក្រាម ខណៈដែលមីមួយកញ្ចប់មានតម្លៃ៧បាត។
តម្លៃស្រូវធ្លាក់ចុះយ៉ាងគំហុកនេះក៏បានដាក់ជាសម្ពាធបន្ថែមទៀតដល់រដ្ឋាភិបាលផងដែរ ដោយត្រូវផ្ដល់ជំនួយជាសាច់ប្រាក់សរុបចំនួន៨៩លានបាត ដល់ពលរដ្ឋជាង៤លានគ្រួសារដែលរងផលប៉ះពាល់។
ទាក់ទិននឹងករណីនេះ រដ្ឋាភិបាលបានចាប់ផ្ដើមផ្ដល់ជំនួយជាសាច់ប្រាក់រួចហើយក្នុងទំហំទឹកប្រាក់ចំនួន១១លានបាតក្នុងដំណាក់កាលទីមួយដល់កសិករ កាលពីថ្ងៃទី៩ ខែវិច្ឆិកា កន្លងទៅ។
ថ្លែងប្រាប់សារព័ត៌មាន A24 News ជំនួយការប្រធានសាខាធនាគារកសិកម្ម និងសហករណ៍កសិកម្ម (Bank of Agriculture and Agricultural Cooperatives) ក្នុងខេត្តណាខនណាយុគ លោក Kittipon Panchan បានឱ្យដឹងថា៖ «កសិករដែលរងផលប៉ះពាលមានចំនួនច្រើនណាស់ ដែលមានរហូតដល់រាប់ម៉ឺននាក់ឯណោះ។ ហើយសម្រាប់អ្នកដែលបានទទួលប្រាក់កាលពីថ្ងៃទី៩ ខែវិច្ឆិកា កន្លងទៅ ពីសាខាធនាគាររបស់យើងក្នុងខេត្តណាខនណាយុគ គឺមានចំនួន៨១០គណនី ដែលគិតជាទំហំទឹកប្រាក់សរុបចំនួន១៩,៨លានបាត [ប្រមាណ៦០ម៉ឺនដុល្លារ]»។
លោកបន្តថា៖ «ការផ្ដល់ជូនក្នុងដំណាក់កាលទី១នេះ គឺសម្រាប់អ្នកដែលបានប្រមូលផលដំណាំមុនថ្ងៃទី១៥ ខែតុលា ឆ្នាំ២០២១ ខណៈដែលការផ្ដល់ជូននេះនឹងត្រូវធ្វើឡើងតាមដំណាក់កាលផ្សេងៗ ដោយផ្នែក លើរយៈពេលនៃការប្រមូលផលរបស់កសិករ»។
ជាមួយគ្នានេះ កសិករមួយរូបមកពីស្រុកមឿង ខេត្តណាខនណាយុគ លោកស្រី Boonmee Mangsa បានឱ្យដឹងថា៖ «ខ្ញុំមកកាន់ទីនេះ ដើម្បីធ្វើបច្ចុប្បន្នភាពសៀវភៅគណនីរបស់ខ្ញុំ និងពិនិត្យមើលថាតើប្រាក់ដែលផ្ដល់ជូននេះត្រូវបានផ្ទេរមកកាន់គណនីរបស់ខ្ញុំហើយឬយ៉ាងណា។ តម្លៃស្រូវនាពេលបច្ចុប្បន្នធ្លាក់ចុះខ្លាំង ខណៈដែលការចំណាយរបស់យើងច្រើន»។
កសិករដដែលបន្តថា៖ «កាលពីឆ្នាំមុន ស្រូវមានតម្លៃ៨០បាតក្នុងមួយធុង [ប្រមាណ២,៤ ដុល្លារ] ប៉ុន្តែតម្លៃបានធ្លាក់មកនៅជាង៦០បាត [ប្រមាណ១,៨ ដុល្លារ] ប៉ុណ្ណោះក្នុងឆ្នាំនេះ។ តម្លៃស្រូវមានការថយចុះច្រើន ខណៈដែលតម្លៃជីកសិកម្មកើនឡើង។ ការផ្ដល់ជូននេះអាចជួយដល់ជីវភាពរបស់យើងបានបន្តិចបន្តួច ដែលប្រសើរជាងមិនទទួលបានអ្វីទាល់តែសោះដែរ»។
កសិករមួយរូបទៀតមកពីស្រុកមឿង ខេត្តណាខនណាយុគ លោក Witoon Puttapanya បានលើកឡើងថា៖ «ខ្ញុំបានទទួលជំនួយជាសាច់ប្រាក់នេះហើយ ក្នុងចំនួនដ៏ត្រឹមត្រូវ ដូចអ្វីដែលពួកគេបានជូនដំណឹង។ ខ្ញុំនឹងប្រើប្រាស់ប្រាក់នេះ ដើម្បីចំណាយលើដំណាំថ្មីរបស់ខ្ញុំ។ បច្ចុប្បន្ន យើងបានបូមទឹកចេញរួចរាល់ហើយ ដើម្បីចាប់ផ្ដើមដាំដំណាំស្រូវសារជាថ្មីម្ដងទៀត»។
លោក Kittipon Panchan បន្ថែមថា៖ «សម្រាប់ការផ្ដល់ជូននេះ ប្រាក់នឹងត្រូវផ្ទេរទៅកាន់គណនីធនាគារ BAAC របស់កសិករទាំងឡាយ។ ហើយដើម្បីអាចដកយកប្រាក់នេះបាន ពួកគេអាចទៅកាន់បញ្ជរនានារបស់ធនាគារ BAAC ដោយប្រើប្រាស់សៀវភៅគណនី និងអត្តសញ្ញាណបណ្ណរបស់ពួកគេ ឬនៅតាមម៉ាស៊ីនដកប្រាក់ស្វ័យប្រវត្តិ [ATM] របស់ធនាគារណាមួយ»៕