រដ្ឋាភិបាលកម្ពុជាបានសម្រេចបង្កើតក្រុមការងារចំពោះកិច្ច ដើម្បីទទួលយកជនភៀសខ្លួនពលរដ្ឋអាហ្វហ្គានីស្ថានដែលជាបុគ្គលិកអង្គការមូលនិធិអាស៊ី និងក្រុមគ្រួសារ មកស្នាក់នៅបណ្ដោះអាសន្នក្នុងប្រទេសកម្ពុជា។
ផ្អែកតាមសេចក្ដីសម្រេចរបស់រដ្ឋាភិបាលកម្ពុជា កាលពីថ្ងៃទី១៥ ខែវិច្ឆិកា ឆ្នាំ២០២១នេះ បានឱ្យដឹងថា ក្រុមការងារនេះមានលោក សុខ ផល រដ្ឋលេខាធិការក្រសួងមហាផ្ទៃ ជាប្រធាន, លោកនាយឧត្ដមសេនីយ៍ គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ ជាអនុប្រធានអចិន្ត្រៃយ៍ អមដោយអនុប្រធានពីររូប និងសមាជិកចំនួន៩រូប។
ក្រុមការងារនេះមានតួនាទីនិងភារកិច្ចពិនិត្យនិងសម្របសម្រួលផ្ដល់ការអនុញ្ញាតឱ្យពលរដ្ឋអាហ្វហ្គានីស្ថានដែលជាបុគ្គលិកអង្គការមូលនិធិអាស៊ី និងក្រុមគ្រួសារ មកស្នាក់នៅបណ្ដោះអាសន្នក្នុងប្រទេសកម្ពុជា ស្របតាមច្បាប់ស្ដីពីអន្តោប្រវេសន៍ និងគោលការណ៍សម្រេចរបស់រដ្ឋាភិបាលកម្ពុជា និងមានតួនាទីចាំបាច់មួយចំនួនទៀត។
កាលពីថ្ងៃទី២៨ ខែសីហា ឆ្នាំ២០២១ លោកនាយករដ្ឋមន្ត្រី ហ៊ុន សែន បានប្រកាសយល់ព្រមទទួលយកជនភៀសខ្លួនអាហ្វហ្គានីស្ថានចំនួន៣០០នាក់ ដែលជាបុគ្គលិកអង្គការមូលនិធិអាស៊ី និងក្រុមគ្រួសារ ឱ្យមកស្នាក់នៅក្នុងប្រទេសកម្ពុជាជាបណ្ដោះអាសន្ន មុននឹងសម្រេចបញ្ជូនទៅកាន់ប្រទេសទី៣។
ការសម្រេចនេះធ្វើឡើងតាមសំណើរបស់អង្គការមូលនិធិអាស៊ី បន្ទាប់ពីប្រទេសអាហ្វហ្គានីស្ថានបានធ្លាក់ក្នុងកណ្ដាប់ដៃរបស់ក្រុមតាលីបង់ កាលពីខែសីហា ឆ្នាំ២០២១៕
