ប្រធានមន្ទីរធនធានទឹកខេត្តបាត់ដំបង និងពោធិ៍សាត់ លើកឡើងថា ជំនន់ទឹកភ្លៀងបានឡើងលើសកម្រិតប្រកាសអាសន្ននៅតាមស្រុកមួយចំនួន ប៉ុន្តែគិតមកទល់រសៀលថ្ងៃអង្គារម្សិលមិញនេះ ទឹកបានស្រកចុះវិញ។
ប្រធានមន្ទីរធនធានទឹក និងឧតុនិយមខេត្តបាត់ដំបង លោក ឡុង ផលគុណ ប្រាប់ វីអូឌី នៅថ្ងៃទី១៦ ខែវិច្ឆិកា ថាស្រុកចំនួន២ គឺស្រុកមោងឫស្សី និងស្រុករុក្ខគិរី រងផលប៉ះពាល់ពីជំនន់ទឹកភ្លៀងខ្លាំង ខណៈទីនោះជាទីតាំងជិតតំបន់ភ្នំ។ យ៉ាងណា លោកថា មកដល់ពេលនេះ ទឹកបានស្រកវិញអស់ហើយ នៅសល់កន្ទុយទឹកបន្តិចនៅស្រុកមោងឫស្សី ក្នុងនោះមានឃុំចំនួន២ រួមមាន ឃុំតាលាស់ និងឃុំជ្រៃ ដែលបន្តរងផលប៉ះពាល់។
លោក ឡុង ផលគុណ និយាយថា៖ «[កាលពីពេលទឹកឡើងខ្លាំង] ទឹកមានកំពស់៦ម៉ែត្រកន្លះ កម្ពស់ក្ដារលេខដែលបានកំណត់ក្នុងសំណង់ៗ ត្រឹមទឹក! ហើយទឹកហ្នឹង យើងអនុញ្ញាតឱ្យឡើងខ្ពស់បំផុតត្រឹម៥ម៉ែត្រកន្លះទេ អ៊ីចឹងវាឡើងលើសចំណុចហានិភ័យ ៧តឹក! ប៉ុន្តែដោយសារភ្លៀងនេះមានសភាពលឿន គឺមកលិចក្នុងរយៈពេលខ្ទង់កន្លះថ្ងៃ ហើយក៏ស្រកអស់ទៅវិញទៅ»។
ទោះយ៉ាងណា លោកពុំអាចសន្និដ្ឋានពីតួលេខទំហំនៃការខូចខាតទ្រព្យសម្បត្តិរបស់ពលរដ្ឋបានឡើយ ដោយថាមានតែអាជ្ញាធរមូលដ្ឋានទេដែលដឹង។
ចំណែកប្រធានមន្ទីរធនធានទឹក និងឧតុនិយមខេត្តពោធិ៍សាត់ លោក កែវ វ័យ មានប្រសាសន៍ថា នៅតាមដងស្ទឹងក្នុងស្រុកភ្នំក្រវាញ ក្រុងពោធិ៍សាត់ ស្រុកកណ្ដៀង និងមួយផ្នែកពីស្រុកបាកាន បានរងផលប៉ះពាល់ពីជំនន់ទឹកភ្លៀង ពោលគឺតំបន់ខ្លះឈានលើសកម្រិតប្រកាសអាសន្ន។
លោកថា៖ «បើយើងគិតទៅ ទឹកជន់ជោរតាំងពីព្រឹកម៉ោង៤ទៀបភ្លឺ [ថ្ងៃទី១៦ ខែវិច្ឆិកា] មក។ អ៊ីចឹងយើងបានប្រកាសអាសន្ន ហើយឱ្យបងប្អូនត្រៀមប្រុងប្រយ័ត្ន។ ទឹកឡើងលើសពីការប្រុងប្រយ័ត្ន ដែលចំណុចនៃប្រកាសអាសន្នគឺ ៥,០០ម៉ែត្រ តែឥលូវឡើងដល់៥,១០ម៉ែត្រ។ ប៉ុន្តែឥលូវ ស្ថានភាពនេះ ទឹកនៅផ្នែកខាងលើ គិតពីព្រឹកមក នៅភ្នំក្រវាញ វាបានស្រកហើយ ស្រកបាន៣តឹក ២ហ៊ុន ប៉ុន្តែនៅពោធិ៍សាត់ យើងនៅនឹង គឺ៥,១០ម៉ែត្រដដែល»។
លោកបន្តថា បើស្ថានភាពនៅខាងលើជួរភ្នំក្រវាញមិនមានភ្លៀងទេ ក្នុងរយៈពេល៦ម៉ោង ជំនន់ទឹកភ្លៀងនៅខេត្តពោធិ៍សាត់នឹងស្រកមកជាធម្មតាវិញ។ ប៉ុន្តែបើសិនជាមានភ្លៀងនៅខាងលើច្រើន នោះទឹកនឹងហក់ឡើងថែមទៀត។
លោកថា គិតត្រឹមថ្ងៃអង្គារម្សិលមិញនេះ ខេត្តពោធិ៍សាត់ មិនទាន់មានការប៉ះពាល់ធ្ងន់ធ្ងរនោះទេ ដោយសារនៅខាងក្រៅស្ទឹង ទឹកមានសភាពធម្មតា ប៉ុន្តែទឹកហក់ឡើងក្នុងស្ទឹង ខណៈមន្ត្រីធនធានទឹកមិនទាន់ហ៊ានបើកទឹកចេញពីស្ទឹងមកខាងក្រៅទេ ព្រោះប្រជាកសិករជិតប្រមូលផលស្រូវទុំ។
ប្រធានមន្ទីរធនធានទឹកខេត្តពោធិ៍សាត់រូបនេះថា មន្ត្រីគ្រប់គ្រងគ្រោះមហន្តរាយថ្នាក់ខេត្ត និងកងកម្លាំងបានត្រៀមរួចរាល់អស់ហើយ បើសិនកើតមានចំណុចប្រឈមណាមួយ អាជ្ញាធរនឹងជួយពលរដ្ឋជាអាទិភាព។
ដោយឡែក អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា ថ្លែងនៅថ្ងៃទី១៧ ខែវិច្ឆិកានេះថា ជំនន់ទឹកភ្លៀងបានកើតឡើងនៅស្រុករុក្ខគិរី និងស្រុកមោងឫស្សី ក្នុងខេត្តបាត់ដំបង ដោយសារភ្លៀងធ្លាក់ជាបន្តបន្ទាប់។
លោកថា កាលពីយប់ថ្ងៃទី១៣ ខែវិច្ឆិកា ទឹកភ្លៀងបានបន្ថែម៧០មីលីម៉ែត្រទៀត ធ្វើឱ្យទឹកហក់ឡើងខ្ពស់ ហើយប៉ះពាល់ដល់ផ្ទះប្រជាពលរដ្ឋនៅស្រុកទាំង២នៃខេត្តពោធិ៍សាត់។ យ៉ាងណា លោកថា ពលរដ្ឋដែលរងផលប៉ះពាល់នៅស្រុករុក្ខគិរី បានវិលទៅលំនៅស្ថានវិញហើយ តាំងពីថ្ងៃទី១៥ ខែវិច្ឆិកា ខណៈទឹកនៅឃុំចំនួន២នៃស្រុកមោងឫស្សី ក៏ស្រកអស់ដែរ។
លោកបន្តថា ដោយឡែក ស្ទឹងពោធិ៍សាត់ នៅខេត្តពោធិ៍សាត់ កាលពីថ្ងៃអង្គារម្សិលមិញ ទឹកបានឡើងលើសពីកម្រិតត្រូវប្រុងប្រយ័ត្ន តែមិនមែនដល់កម្រិតប្រកាសអាសន្នទេ។ លោកថា កម្រិតប្រកាសអាសន្នលុះត្រាតែជិត៦ម៉ែត្រ។ យ៉ាងណា លោកថា គិតមកដល់ព្រឹកថ្ងៃពុធនេះ ទឹកស្ទឹងបានស្រកបណ្ដើរៗហើយ។
លោក ចាន់ យុត្ថា មានប្រសាសន៍ថា៖ «ញែកឱ្យដាច់ពាក្យ២ហ្នឹង រវាងការប្រកាសអាសន្ន និងការប្រកាសឱ្យប្រុងប្រយ័ត្ន។ ប្រកាសអាសន្ន មានន័យថា លិចទប់លែងជាប់ហើយ រត់ជាន់ជើងគ្នា។ ម្សិលមិញហ្នឹង ៥,១០ ម៉ែត្រ ហើយកម្រិតប្រកាសឱ្យប្រុងប្រយ័ត្នគឺ៥ម៉ែត្រគត់ [សម្រាប់ស្ទឹងពោធិ៍សាត់]។ ហើយម្សិលមិញ ហូរស្រកយឺតតិច ដោយសារយើងឱ្យទៅហូរទៅតែក្នុងស្ទឹងទេ មិនឱ្យទៅចេញតាមប្រឡាយឬដៃរបស់ស្ទឹង ដោយសារស្រូវរបស់បងប្អូនកំពុងជិតប្រមូលផលហើយ»។
ទីប្រឹក្សាឯករាជ្យផ្នែកធនធានធម្មជាតិ លោក ហែម ឧត្ដម យល់ថា ជារឿងស្មុគស្មាញក្នុងការគិតគូរនូវអនុសាសន៍ ដើម្បីដោះស្រាយឬបញ្ចៀសបញ្ហាទឹកជំនន់នៅខេត្តពោធិ៍សាត់និងបាត់ដំបង ខណៈរឿងនេះបានកើតឡើងជារឿយៗទៅហើយនៅខេត្តទាំង២នេះ។
យ៉ាងណា លោកបង្ហាញសុទិដ្ឋិនិយមថា មន្ត្រីពាក់ព័ន្ធប្រហែលជាបានគិតគូរពីបញ្ហាទាំងអស់នេះហើយ។
លោកបន្តថា៖ «ប៉ុន្តែនៅពេលដែលយើងមានព្រៃ នៅសល់ព្រៃឈើច្រើនអីចឹងទៅ វាអាចជួយកាត់បន្ថយផលប៉ះពាល់ហ្នឹង វាទាក់ទងនឹងធម្មជាតិ។ និងមួយទៀត ទាក់ទងនឹងកត្តាសង្គម ហេដ្ឋារចនាសម្ព័ន្ធដែលជួយទប់ទល់នឹងទឹកជំនន់ តើយើងមានរឹងមាំប៉ុនណា? យើងបានត្រៀមប៉ុនណា? ព្រោះមិនមែនជាលើកទីមួយដែលយើងលិចនោះទេ ដូចយើងដឹងអ៊ីចឹង វាលិចប៉ុន្មានឆ្នាំជាប់គ្នាហើយ»។
លោកថា រដ្ឋបានដឹងពីដើមចមដែលបង្កឱ្យមានគ្រោះទឹកជំនន់ ដូច្នេះវាទាក់ទងនឹងការវិនិយោគរបស់រដ្ឋាភិបាលថាតើរដ្ឋាភិបាលអាចដាក់ទុនឬចំណាយថវិកាជាតិសម្រាប់បង្កើតហេដ្ឋារចនាសម្ព័ន្ធ ដើម្បីទប់ទល់ និងមានប្រព័ន្ធប្រកាសអាសន្ន ជាដើម៕
