រដ្ឋមន្រ្តីសេដ្ឋកិច្ច-ពាណិជ្ជកម្មជប៉ុន លោក Koichi Hagiuda បានថ្លែងប្រាប់អ្នកយកព័ត៌មាននៅថ្ងៃពុធនេះថា ប្រទេសជប៉ុននឹងបញ្ចេញប្រេងមួយចំនួនពីស្តុកបម្រុងជាតិរបស់ខ្លួន ដើម្បីជួយចូលរួមទប់ស្កាត់ការកើនឡើងនៃតម្លៃប្រេងនៅលើពិភពលោក។
ទោះជាយ៉ាងណា រដ្ឋមន្រ្តីរូបនេះមិនបានធ្វើការបញ្ជាក់ពីពេលវេលាច្បាស់លាស់នៃការបញ្ចេញប្រេងបម្រុងរបស់ខ្លួននេះនោះទេ។
នាយករដ្ឋមន្ត្រីជប៉ុន លោក Fumio Kishida បានឱ្យដឹងកាលពីពេលថ្មីៗនេះថា រដ្ឋាភិបាលរបស់លោកនឹងបញ្ចេញប្រេងក្នុងស្តុកបម្រុងមួយចំនួន បន្ទាប់ពីមានសំណើដោយសហរដ្ឋអាមេរិក ក្នុងលក្ខខណ្ឌមួយដែលមិនបំពានដល់ច្បាប់ប្រទេសរបស់ខ្លួន។
លោកបន្ថែមថា ប្រទេសជប៉ុនក៏នឹងបន្តបញ្ចុះបញ្ចូលដល់ប្រទេសផលិតប្រេងទាំងឡាយ ដើម្បីចូលរួមប្រយុទ្ធប្រឆាំងទៅនឹងការប្រែប្រួលនៃតម្លៃប្រេងយ៉ាងខ្លាំងផងដែរ។
យោងតាមការរាយការណ៍ដោយសារព័ត៌មាន Nikkei ប្រទេសជប៉ុនគ្រោងនឹងបញ្ចេញប្រេងក្នុងចំនួនប្រមាណជា៤,២លានបារ៉ែល (ធុង) ខណៈដែលស្តុកបម្រុងជាតិរបស់ខ្លួនទាំងអស់មានប្រមាណជា៤៩០លានបារ៉ែល៕
