កម្មករ-កម្មការិនីរោងចក្រមួយនៅរាជធានីភ្នំពេញ ទាមទារឱ្យរោងចក្រ ស៊ីនហាវស៊ុន ស្ថិតនៅភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ ទទួលយកតំណាងរបស់ពួកគេចូលធ្វើការវិញ និងគោរពតាមច្បាប់ការងារឱ្យបានត្រឹមត្រូវ។
កម្មការិនីម្នាក់ឈ្មោះ ពៅ ធំដា ប្រាប់ពលរដ្ឋអ្នកសារព័ត៌មាន CCIM ថា ដើមហេតុនាំឱ្យមានការទាមទារនេះ បន្ទាប់ពីភាគីរោងចក្របានបញ្ឈប់តំណាងសហជីពរបស់ពួកគេ ក្រោយកម្មករ-កម្មការិនីបាននាំគ្នាផ្ដួចផ្ដើមបង្កើតឱ្យមានសហជីពក្នុងរោងចក្រនេះ ដើម្បីការពារផលប្រយោជន៍របស់កម្មករ។
អ្នកស្រីបន្ដថា៖ «យើងតវ៉ាឱ្យមានសហជីព លុយដំណាច់ឆ្នាំ លុយ៥ភាគរយ លុយសម្រាលកូន។ ហើយទាមទារពេលយើងឈប់អ៊ីចឹង ឱ្យច្បាប់មានទម្លាប់នេះ សូម្បីចាក់វ៉ាក់សាំង ក៏អត់ឱ្យយើងឈប់ដែរ។ និយាយរួម បិទសិទ្ធិយើងគ្រប់យ៉ាង យើងឈឺ ក៏អត់ឱ្យយើងឈប់»។
កម្មការិនីម្នាក់ទៀតដែលធ្វើការនៅរោងចក្រ ស៊ីនហាវស៊ុន អ្នកស្រី ធឿន សិរីរ័ត្ន អាយុ២៨ឆ្នាំ បានឱ្យពលរដ្ឋអ្នកសារព័ត៌មានដឹងថា រយៈពេលប្រមាណ៣ទៅ៤ឆ្នាំដែលអ្នកស្រីបានធ្វើការនៅទីនេះ ពុំដែលបានទទួលប្រាក់ដំណាច់ឆ្នាំ លុយប្រាំភាគរយ និងប្រាក់លំហែមាតុភាពឡើយ។
អ្នកស្រីស្នើថា រោងចក្រត្រូវគិតគូរពីសិទ្ធិរបស់កម្មករ និងផ្ដល់ប្រាក់ឧបត្ថម្ភផ្សេងៗដល់កម្មករ និងអនុញ្ញាតឱ្យសហជីពអាចធ្វើការតំណាងឱ្យផលប្រយោជន៍របស់កម្មករ។
ពលរដ្ឋអ្នកសារព័ត៌មាន CCIM មិនអាចស្វែងរកការឆ្លើយតបពីខាងភាគីរោងចក្រ ស៊ីនហាវស៊ុន បាននោះឡើយ ខណៈលោក ប៊ូ វ៉ាន់ដា តំណាងប្រធានសហជីពដែលត្រូវបានភាគីរោងចក្របញ្ឈប់នោះ ទូរសព្ទចូលតែពុំមានអ្នកលើកទទួល។
អ្នកនាំពាក្យក្រសួងការងារ លោក ហេង សួរ បានថ្លែងថា មន្ត្រីនៃក្រសួងការងារកំពុងស៊ើបអង្កេតនិងរកដំណោះស្រាយជុំវិញករណីនេះ ហើយគ្រប់ភាគីត្រូវអនុវត្តតាមនីតិវិធីដោះស្រាយវិវាទការងារ។
លោកបន្ដថា៖ «យើងមិនអាចធ្វើបុរេវិនិច្ឆយថាអ្នកណាខុសឬត្រូវនោះទេ។ ក្នុងករណីមិនសះជា គឺយើងអាចរុញទៅក្រុមប្រឹក្សាអាជ្ញាកណ្ដាលឬតុលាការជាបន្ត»។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ភាគីរោងចក្រទំនងមានការចន្លោះប្រហោងណាមួយជុំវិញការអនុវត្តច្បាប់ការងារ ទើបព្យាយាមទប់ស្កាត់មិនឱ្យមានការបង្កើតសហជីពឡើង។
លោកបន្ដថា៖ «វាជាអំពើរំលោភច្បាប់ធ្ងន់ធ្ងរ ពេលកម្មករបង្កើតសហជីព ហើយត្រូវគេបញ្ឈប់ មានន័យថា គាត់ចង់ផ្ដាច់មិនឱ្យមានសហជីពតែម្ដង»។
កាពីថ្ងៃទី២៥ ខែវិច្ឆិកា ឆ្នាំ២០២១ កន្លងទៅ កម្មករ-កម្មការិនីប្រមាណជាង២០០នាក់បានធ្វើការតវ៉ានៅពីមុខរោចក្រ ស៊ីនហាវស៊ុន ដោយទាមទារឱ្យភាគីរោងចក្រទទួលយកតំណាងសហជីពពួកគេដែលគ្រោងបង្កើតឡើង ឱ្យត្រលប់ចូលធ្វើការវិញ រួមទាំងទាមទារប្រាក់ដំណាច់ឆ្នាំ ប្រាក់អតីតភាពការងារ និងការអនុវត្តច្បាប់ការងារឱ្យបានពេញលេញ និងធានាសិទ្ធិដល់ក្រុមកម្មករ៕
ពលរដ្ឋអ្នកសារព័ត៌មាន CCIM លោក វ៉ា សុភានុត
