អតីតប្រធានគណបក្សសង្គ្រោះជាតិ លោក កឹម សុខា កាលពីថ្ងៃអាទិត្យ បានចេញសារនយោបាយដ៏កម្រមួយរិះគន់សម្ព័ន្ធមិត្តរបស់ខ្លួនថា មិនគោរពគោលការណ៍រួបរួម ដែលការណ៍នេះ លោកអំពាវនាវឱ្យឈប់យករូបថតរបស់លោកភ្ជាប់ទៅនឹងសកម្មភាពនយោបាយ ខណៈលោកជាប់បម្រាមតុលាការនៅឡើយ។
លោក កឹម សុខា កាលពីថ្ងៃទី២៨ ខែវិច្ឆិកានេះ បានលើកឡើងតាមរយៈបណ្ដាញសង្គមហ្វេសប៊ុករបស់លោកថា រហូតមកដល់ពេលនេះ លោកនៅតែសង្កេតឃើញលោក សម រង្ស៊ី និងសហការី នៅតែបន្តយកឈ្មោះនិងរូបថតរបស់លោកទៅប្រើប្រាស់ភ្ជាប់ជាមួយនឹងសកម្មភាពនានា ដោយពុំមានការអនុញ្ញាតឬគាំទ្រពីលោក។ លើសពីនេះ លោកថា លោក សម រង្ស៊ី និងសហការី បានដើរចេញពីគោលការណ៍និងស្មារតីដើមនៃការរួបរួម រួមទាំងត្រលប់ទៅគាំទ្រដោយចំហ ឬនៅពីក្រោយការដឹកនាំគណបក្សនយោបាយចាស់ នោះគឺ «គណបក្សភ្លើងទៀន»។
លោក កឹម សុខា បញ្ជាក់ក្នុងសារនោះថា៖ «ទង្វើរបស់ពួកគេសបញ្ជាក់ឱ្យឃើញថា សម រង្ស៊ី និង កឹម សុខា មិនមែនជាមនុស្សតែមួយទេ ព្រោះសកម្មភាពទាំងអស់នេះមិនមានការគាំទ្រឬជាជំហររបស់ខ្ញុំឡើយ»។
បញ្ហានេះ លោក កឹម សុខា អំពាវនាវឱ្យភាគីលោក សម រង្ស៊ី ឈប់យករូបថតលោកទៅភ្ជាប់នឹងសកម្មភាពនានា ដែលលោកគិតថា ដើម្បីកុំឱ្យសាធារណមតិជាតិនិងអន្តរជាតិមានការភ័ន្តច្រឡំ និងមិនទទួលខុសត្រូវចំពោះសកម្មភាពរបស់ក្រុមលោក សម រង្ស៊ី។
សារនេះបានជំរុញឱ្យមានប្រតិកម្មជាច្រើនលើបណ្ដាញសង្គម ដែលខ្លះគាំទ្រ និងខ្លះទៀតធ្វើការរិះគន់ ដោយបញ្ចេញទស្សនៈថា លោក កឹម សុខា បានប្រកាសបែកពីលោក សម រង្ស៊ី។
ភ្លាមៗ លោក សម រង្ស៊ី ដែលកំពុងនិរទេសខ្លួននៅក្រៅប្រទេស បានផ្ញើសារលើហ្វេសប៊ុកតបវិញថា សាររបស់លោក កឹម សុខា ធ្វើឡើងដោយសារមានការគំរាមកំហែងពីមេដឹកនាំបក្សកាន់អំណាច។
លោក សម រង្ស៊ី បានគូសបញ្ជាក់ថា៖ «លោក ហ៊ុន សែន ភ័យខ្លាចជាទីបំផុតចំពោះឯកភាពនៃអ្នកប្រជាធិបតេយ្យខ្មែរ ហើយដែលចាប់យកលោក កឹម សុខា ធ្វើជាចំណាប់ខ្មាំងរបស់គាត់»។
ភាពចម្រូងចម្រាសនេះបង្កើតជាសំណួរថា តើសាររបស់លោក កឹម សុខា នឹងជំរុញឱ្យមានអ្វីប្រែប្រួលខ្លះនៅមុនការបោះឆ្នោត?
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មើលឃើញថា សាររបស់លោក កឹម សុខា មិនមែនជាការសុំបែកពីសម្ព័ន្ធមិត្តនោះទេ តែជាសារក្រើនរម្លឹកបែបការទូត ឱ្យសម្ព័ន្ធមិត្តពិចារណាឡើងវិញទៅលើការដែលដើរជ្រុលជើងចេញពីស្មារតីនៃគោលការណ៍រួម។
មួយវិញទៀត ជាទស្សនៈ លោកមើលឃើញថា ការដែលលោក កឹម សុខា ទាមទារឱ្យឈប់ប្រើរូបថតភ្ជាប់នឹងការធ្វើសកម្មភាពនយោបាយនេះ អាចជាជម្រើសសមហេតុផលមួយទប់ស្កាត់ការប្រតិដ្ឋភស្តុតាងថ្មីណាមួយ ដើម្បីដាក់បន្ទុកការចោទប្រកាន់ទៅលើគាត់។
លោកថា៖ «ការដែលគាត់មិនឱ្យដាក់រូបគាត់ចូលទៅក្នុងសកម្មភាពនយោបាយ ជារឿងត្រឹមត្រូវមួយ ពីព្រោះគាត់កំពុងតែមានបញ្ហាស្រាប់ផង ខ្លាចគេយកទៅ អាទោសដែលតុលាការរកមិនទាន់ឃើញពីទោសក្បត់ជាតិរបស់គាត់ហ្នឹង»។
យ៉ាងណា លោក សុជាតិ យល់ថា សាររបស់លោក កឹម សុខា អាចធ្វើឱ្យលោក កឹម សុខា និងលោក សម រង្ស៊ី ដើរដល់ផ្លូវបំបែក បើភាគីលោក សម រង្ស៊ី មិនព្រមធ្វើតាមការទាមទារនោះ ដែលការណ៍នេះជាការឆ្លើយតបទៅនឹងការចង់បានរបស់បក្សកាន់អំណាចដែរ។
ចំណែកអ្នកស្រាវជ្រាវសង្គម លោកបណ្ឌិត សេង សារី យល់ឃើញថា សាររបស់លោក កឹម សុខា អាចមកពីមានការគំរាមកំហែងពីបក្សកាន់អំណាច ព្រោះសារនេះថ្លែងបានអំឡុងពេលលោក កឹម សុខា កំពុងជាប់បម្រាមតុលាការ ហើយមួយទៀត អាចជាការត្រូវរ៉ូវណាមួយជាថ្នូរបានចូលប្រឡូកក្នុងឆាកនយោបាយឡើងវិញ តាមរយៈការបិទច្រកក្រុមលោក សម រង្ស៊ី។
យ៉ាងណា លោក សារី វិភាគថា សារនេះអាចនឹងជំរុញឱ្យមានប៉ូលគណបក្សនយោបាយចំនួន៣ សម្រាប់ដំណើរឆ្ពោះទៅកាន់ការបោះឆ្នោត ក្នុងនោះ ប៉ូលទី១ គឺគណបក្សកាន់អំណាច ទី២ គណបក្សភ្លើងទៀន និងទី៣ គណបក្សសិទ្ធិមនុស្ស អាចនឹងចេញដំណើរដែរ ដោយស្វែងរកការចូលរួមពីក្រុមអ្នកនយោបាយដែលស្និទ្ធនឹងលោក កឹម សុខា ហើយចេញមកបង្កើតគណបក្សថ្មី។
លោកថា៖ «សម្រាប់ខ្ញុំ បើប៉ូលនយោបាយ៣កើតឡើងមែន វាដូចលេងល្បែងនយោបាយរបស់លោក ហ៊ុន សែន ក៏ប៉ុន្តែវាអាចជួយដល់អង្គការសង្គមស៊ីវិលមួយចំនួនដែរ យ៉ាងហោចណាស់ វារុញឱ្យសង្គមស៊ីវិលលែងជាអ្នកជួរមុខក្នុងការប្រយុទ្ធប្រឆាំងជាមួយការរំលោភបំពានសិទ្ធិមនុស្ស ពីព្រោះកន្លងមក យើងឃើញអវត្តមានសង្គ្រោះជាតិ អង្គការសង្គមស៊ីវិលបានក្លាយជាអ្នកប្រឈមមុខផ្ទាល់ នៅជួរមុខគេជាមួយគណបក្សកាន់អំណាច»។
តែយ៉ាងណា សហមេធាវីការពារក្ដីឱ្យលោក កឹម សុខា គឺលោកស្រី ម៉េង សុធារី កាលពីថ្ងៃទី២៩ ខែវិច្ឆិកានេះ បានបង្ហោះសារបញ្ជាក់ឡើងវិញទៅលើខ្លឹមសារនៃសារនយោបាយរបស់កូនក្ដីខ្លួន ដោយស្នើកុំបកស្រាយបន្លំចំពោះខ្លឹមសារអត្ថបទរបស់លោក កឹម សុខា។
លោកស្រីបន្តថា ខ្លឹមសារនេះ លោក កឹម សុខា មិនមែនប្រកាសបំបែកទេ តែជាការនិយាយការពិត ការដែល «គណបក្សភ្លើងទៀន» ដើរចេញជាឯកតោភាគីជាចំហនៅពេលនេះ ដោយមិនមានការគាំទ្រពីលោក កឹម សុខា ហើយករណីនេះបានបង្ហាញឱ្យឃើញច្បាស់ថា លោក សម រង្ស៊ី និងក្រុមរបស់គាត់ បានចុះចោលស្មារតីរួបរួមជាមួយលោក កឹម សុខា។ មេធាវីរូបនេះបញ្ជាក់ថា សាររបស់កូនក្ដី គ្រាន់តែប្រើសិទ្ធិការពារខ្លួន ដើម្បីកុំឱ្យពាក់ព័ន្ធចំពោះសកម្មភាពលោក សម រង្ស៊ី និងក្រុមរបស់គាត់ ដែលប្រើរូបថតរបស់លោក កឹម សុខា ទៅប្រើជាប្រយោជន៍ក្នុងសកម្មភាពនយោបាយប៉ុណ្ណោះ។
សាស្ត្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណរ៉ា មើលឃើញថា សារលោក កឹម សុខា អាចការពារខ្លួនឯងនៅក្នុងផ្លូវច្បាប់ ខណៈមេបក្សរូបនោះកំពុងជាប់បម្រាមនៅតុលាការ ។
លោកថា៖ «បើផ្អែកទៅលើទស្សនៈនយោបាយបច្ចុប្បន្ន គឺគណបក្សកាន់អំណាចគេចង់ឱ្យលោក កឹម សុខា ចូលមកក្នុងឆាកនយោបាយ ហើយទុកឱ្យលោក សម រង្ស៊ី នៅក្រៅឆាកនយោបាយ។ ក៏ប៉ុន្តែ កម្លាំងនយោបាយពិតប្រាកដមិនមែននៅលើលោក កឹម សុខា ទេ [គឺស្ថិត]នៅលើលោក សម រង្ស៊ី។ ហើយចរន្តហ្នឹង បើសិនជានៅតែដូចលោក កឹម សុខា លើកឡើង ខ្ញុំគិតថា បក្សទាំងពីរនឹងអាចបែកគ្នាទៅវិញ។ ក៏ប៉ុន្តែការបែកនេះ លោក កឹម សុខា ហាក់មិនបានយកកម្លាំងរបស់សង្គ្រោះជាតិដែលរួមគ្នាបានទាំងស្រុងទេ»។
ជាការផ្ដល់យោបល់រួម លោកបណ្ឌិត សេក សុជាតិ ចង់ឃើញអ្នកនយោបាយខ្មែរងាកមកប្រកួតអំណាចដោយភាពស្មោះត្រង់ តាមគន្លងប្រជាធិបតេយ្យ ដើម្បីតម្កល់ប្រយោជន៍ជាតិ និងការពារសិទ្ធិពលរដ្ឋគ្រប់និន្នាការ ដូចមានចែងក្នុងរដ្ឋធម្មនុញ្ញ។
លោកថា៖ «គោលដៅធំរបស់អ្នកនយោបាយ គឺស្វែងរកសុខសន្តិភាព ហើយនិងការអភិវឌ្ឍជូនប្រទេសជាតិ និងប្រជាពលរដ្ឋ មិនប្រាសចាកពីការពិត ហើយធ្វើតាមកម្រិតដែលខ្លួនឯងបានសន្យាជាមួយនឹងមហាជន ជាមួយភាគីពាក់ព័ន្ធរបស់ខ្លួន»៕