អតីតនាយករដ្ឋមន្ត្រីជប៉ុន លោក ស៊ិនហ្សូ អាបេ បានឱ្យដឹងនៅថ្ងៃពុធនេះថា ប្រទេសជប៉ុន និងសហរដ្ឋអាមេរិក នឹងមិនអាចឈរឱបដៃមើលបាននោះទេ ក្នុងករណីដែលចិនវាយប្រហារកោះតៃវ៉ាន់ ហើយចិនចាំបាច់ត្រូវតែយល់ច្បាស់ពីរឿងនេះ។
ទីភ្នាក់ងារសារព័ត៌មាន Reuters បានស្រង់សម្ដីអតីតនាយករដ្ឋមន្ត្រីជប៉ុនរូបនេះ ដែលបានថ្លែងនៅក្នុងវេទិកាមួយធ្វើឡើងតាមរយៈប្រព័ន្ធវីដេអូ ថាកោះមួយចំនួនរបស់ប្រទេសជប៉ុន គឺមានចម្ងាយប្រមាណតែ១០០គីឡូម៉ែត្រប៉ុណ្ណោះពីតៃវ៉ាន់។
ទាក់ទិននឹងករណីនេះ លោកបន្ថែមថា រាល់ការលុកលុយប្រដាប់ដោយអាវុធណាមួយនៅលើកោះតៃវ៉ាន់នេះ នឹងក្លាយជាគ្រោះថ្នាក់យ៉ាងធ្ងន់ធ្ងរដល់ប្រទេសជប៉ុន។
លោក ស៊ិនហ្សូ អាបេ បន្តថា៖ «រាល់គ្រាអាសន្នណាមួយដែលកើតឡើងនៅតៃវ៉ាន់ ក៏ជាគ្រាអាសន្នរបស់ប្រទេសជប៉ុន និងសម្រាប់សម្ព័ន្ធភាពជប៉ុន-អាមេរិកផងដែរ។ ដូច្នេះហើយ ប្រជាជនចិន និងប្រធានាធិបតីចិន លោក ស៊ី ជីនពីង គួរតែទទួលស្គាល់លើរឿងនេះ»។
អតីតនាយករដ្ឋមន្ត្រីជប៉ុនដដែលបានឱ្យដឹងទៀតថា៖ «ប្រទេសជប៉ុន តៃវ៉ាន់ និងប្រជាជនទាំងអស់ដែលជឿជាក់លើលទ្ធិប្រជាធិបតេយ្យ ចាំបាច់ត្រូវបន្តជំរុញឱ្យប្រធានាធិបតី លោក ស៊ី ជីនពីង និងមេដឹកនាំបក្សកុម្មុយនីស្តចិនផ្សេងទៀត កុំឱ្យបន្តដើរលើផ្លូវខុសម្ដងហើយម្ដងទៀត»។
លោកបន្តថា៖ «តៃវ៉ាន់ដែលរឹងមាំ រីកចម្រើនជាងមុន និងតៃវ៉ាន់ដែលធានាសេរីភាពនិងសិទ្ធិមនុស្ស ក៏ជាផលប្រយោជន៍សម្រាប់ប្រទេសជប៉ុន និងពិភពលោកទាំងមូលផងដែរ»។
គួរបញ្ជាក់ថា ភាពតានតឹងរវាងតៃវ៉ាន់និងចិនបានកើនឡើងក្នុងរយៈពេលប៉ុន្មានខែថ្មីៗនេះ ខណៈដែលចិននៅតែបន្តអះអាងថា តៃវ៉ាន់គឺជាទឹកដីរបស់ខ្លួន។
ជាការឆ្លើយតប តៃវ៉ាន់ធ្លាប់បានលើកឡើងថា ខ្លួននឹងបន្តពង្រឹងការការពាររបស់ខ្លួន ដើម្បីធានាឱ្យបានថា គ្មាននរណាម្នាក់អាចបង្ខំឱ្យកោះនេះទទួលយកផ្លូវដែលចិនបានរៀបចំដោយមិនផ្ដល់សេរីភាព និងប្រជាធិបតេយ្យនោះទេ៕
