ក្រសួងការបរទេសចិន បានកោះហៅឯកអគ្គរាជទូតជប៉ុនប្រចាំនៅប្រទេសចិន ឱ្យមកចូលរួមក្នុងកិច្ចប្រជុំបន្ទាន់មួយកាលពីថ្ងៃពុធ បន្ទាប់ពីអតីតនាយករដ្ឋមន្ត្រីជប៉ុន លោក ស៊ិនហ្សូ អាបេ បានលើកឡើងនៅក្នុងវេទិកាមួយថា ប្រទេសជប៉ុន និងសហរដ្ឋអាមេរិក នឹងមិនអាចឈរឱបដៃមើលបាននោះទេ ប្រសិនបើចិនវាយប្រហារកោះតៃវ៉ាន់។
នៅក្នុងជំនួបជាមួយឯកអគ្គរាជទូតជប៉ុន លោក ហ៊ិដេអុ តារូមិ (Hideo Tarumi) ឧបការីរដ្ឋមន្ត្រីការបរទេសចិន លោកស្រី ហ្វ័រ ឈុនយីង (Hua Chunying) បានចាត់ទុកការថ្លែងរបស់អតីតនាយករដ្ឋមន្ត្រីជប៉ុនរូបនេះថាជារឿងខុសឆ្គង និងជាការរំលោភលើបទដ្ឋានជាមូលដ្ឋាននៃទំនាក់ទំនង រវាងចិននិងជប៉ុន។ នេះបើយោងតាមសេចក្ដីថ្លែងការណ៍របស់ក្រសួងការបរទេសចិន។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់លោកស្រី ហ្វ័រ ឈុនយីង យកមកចុះផ្សាយថា៖ «ការថ្លែងរបស់លោក ស៊ិនហ្សូ អាបេ នេះ គឺជាការប្រឆាំងដោយបើកចំហចំពោះអធិបតេយ្យភាពរបស់ប្រទេសចិន និងបានផ្ដល់ការគាំទ្រយ៉ាងមុតមាំដល់កងកម្លាំងឯករាជ្យតៃវ៉ាន់»។
លោកស្រីបន្តថា៖ «ប្រទេសចិនប្រឆាំងយ៉ាងដាច់ខាតចំពោះការថ្លែងបែបនេះ»។
គួរបញ្ជាក់ថា នៅក្នុងវេទិកាមួយដែលធ្វើឡើងតាមរយៈប្រព័ន្ធវីដេអូ កាលពីថ្ងៃពុធម្សិលមិញនេះ លោក ស៊ិនហ្សូ អាបេ បានថ្លែងឱ្យដឹងថា រាល់ការលុកលុយប្រដាប់ដោយអាវុធណាមួយដែលធ្វើឡើងនៅលើកោះតៃវ៉ាន់ នឹងក្លាយជាគ្រោះថ្នាក់យ៉ាងធ្ងន់ធ្ងរដល់ប្រទេសជប៉ុន។
អតីតនាយករដ្ឋមន្ត្រីជប៉ុនរូបនេះបន្តថា៖ «រាល់គ្រាអាសន្នណាមួយដែលកើតឡើងនៅតៃវ៉ាន់ ក៏ជាគ្រាអាសន្នរបស់ប្រទេសជប៉ុន និងសម្រាប់សម្ព័ន្ធភាពជប៉ុន-អាមេរិកផងដែរ។ ដូច្នេះហើយ ប្រជាជនចិន និងប្រធានាធិបតីចិន លោក ស៊ី ជីនពីង គួរតែទទួលស្គាល់លើរឿងនេះ»។
ភាពតានតឹងរវាងតៃវ៉ាន់ និងចិន បានកើនឡើងក្នុងរយៈពេលប៉ុន្មានខែថ្មីៗនេះ ខណៈដែលចិននៅតែបន្តអះអាងថាតៃវ៉ាន់គឺជាទឹកដីរបស់ខ្លួន។
ជាការឆ្លើយតប តៃវ៉ាន់ធ្លាប់បានលើកឡើងថា ខ្លួននឹងបន្តពង្រឹងការការពាររបស់ខ្លួន ដើម្បីធានាឱ្យបានថាគ្មាននរណាម្នាក់អាចបង្ខំឱ្យកោះនេះទទួលយកផ្លូវដែលចិនបានរៀបចំដោយមិនផ្ដល់សេរីភាព និងប្រជាធិបតេយ្យនោះទេ៕