ក្រុមស្ត្រីថ្ងៃសុក្រ បានអះអាងថា ពួកគេនឹងបន្តដើរដាក់ញត្តិនៅតាមស្ថានទូតប្រទេសប្រជាធិបតេយ្យនានា ដើម្បីស្វែងរកកិច្ចអន្តរាគមន៍ឱ្យតំណាងប្រទេសទាំងនោះជួយជំរុញទៅរដ្ឋាភិបាលកម្ពុជាងាកមកគោរពស្មារតីកិច្ចព្រមព្រៀងសន្តិភាពទីក្រុងប៉ារីស ថ្ងៃ២៣ តុលា ឆ្នាំ១៩៩១ និងអន្តរាគមន៍ដោះលែងស្វាមីរបស់ពួកគេឱ្យមានសេរីភាពឡើងវិញ។
ការប្ដេជ្ញាចិត្តរបស់ក្រុមស្ត្រីថ្ងៃសុក្រនេះ បានធ្វើឡើងបន្ទាប់ពីពួកគេនៅថ្ងៃនេះបានយកញត្តិទៅដាក់នៅស្ថានទូតអូស្ត្រាលីប្រចាំនៅកម្ពុជា។
ភរិយាអតីតជំទប់ទី១ ឃុំចន្ទ្រា ខេត្តស្វាយរៀង នៃអតីតគណបក្សសង្គ្រោះជាតិ អ្នកស្រី អ៊ុក ចន្ធី ថ្លែងថា នេះជាលើកទី៣ហើយដែលក្រុមអ្នកស្រីបានមកតវ៉ានៅពីមុខស្ថានទូតអូស្ត្រាលី។ អ្នកស្រីថា គោលបំណងនៃការដាក់ញត្តិនេះ គឺចង់ឱ្យស្ថានទូតអូស្ត្រាលីដែលជាប្រទេសហត្ថលេខីមួយក្នុងចំណោម១៨ នៃកិច្ចព្រមព្រៀងសន្តិភាពទីក្រុងប៉ារីស ២៣តុលា ជួយឱ្យកម្ពុជាមានការគោរពស្មារតីនៃកិច្ចព្រមព្រៀងនេះឡើងវិញ និងជួយជំរុញទៅរដ្ឋាភិបាលកម្ពុជាដោះលែងសមាជិកគ្រួសារពួកគេដែលកំពុងជាប់ពន្ធនាគារ។
អ្នកស្រីបន្តថា តំណាងស្ថានទូតបានទទួលញត្តិពីក្រុមគាត់ដោយភាពកក់ក្ដៅនិងឆ្លើយតបថាស្ថានទូតនឹងជំរុញឱ្យរដ្ឋាភិបាលកម្ពុជាគោរពសិទ្ធិមនុស្ស លទ្ធិប្រជាធិបតេយ្យ ក៏ដូចជាស្មារតីកិច្ចព្រមព្រៀងសន្តិភាពទីក្រុងប៉ារីស។
អ្នកស្រី អ៊ុក ចន្ធី លើកឡើងថា៖ «ខ្ញុំនឹងបន្តដាក់ញត្តិគ្រប់ស្ថានទូតប្រជាធិបតេយ្យទាំងអស់ ដើម្បីឱ្យគាត់ជួយអន្តរាគមន៍ទៅប្រទេសកម្ពុជា ព្រោះអីប្រទេសទាំង១៨ បានធានាថា នឹងគោរពលទ្ធិប្រជាធិបតេយ្យ ២៣ តុលា ទីក្រុងប៉ារីសហ្នឹង! ឱ្យគាត់ជួយឱ្យប្រទេសកម្ពុជាងាកមកគោរពស្មារតីនៃកិច្ចព្រមព្រៀង ២៣តុលា នេះឡើងវិញ។ កាលណាគាត់ងាកមកគោរពនូវសន្ធិសញ្ញា ២៣តុលាហ្នឹង ក្រុមគ្រួសារពួកខ្ញុំច្បាស់ជាមានសេរីភាពបរិបូណ៌»។
ភរិយារបស់អតីតក្រុមប្រឹក្សារាជធានីភ្នំពេញ នៃអតីតគណបក្សសង្គ្រោះជាតិ លោក កាក់ កុម្ភារ និងត្រូវជាម្ដាយរបស់ក្មេងប្រុស កាក់ សុវណ្ណច្ឆ័យ គឺអ្នកស្រី ព្រុំ ចាន់ថា បានប្រាប់ វីអូឌី នៅមុខស្ថានទូតអូស្ត្រាលីដែរថា ការបន្តដាក់ញត្តិនេះ ព្រោះតែពួកគាត់ចង់ឱ្យស្ថានទូតធ្វើយ៉ាងណាជួយជំរុញឱ្យរដ្ឋាភិបាលកម្ពុជាគោរពគោលការណ៍សិទ្ធិមនុស្ស សិទ្ធិនៃការបញ្ចេញមតិ ព្រមទាំងដោះលែងអ្នកទោសមនសិការដោយឥតលក្ខខណ្ឌ ខណៈអ្នកស្រីថា បច្ចុប្បន្ន រដ្ឋាភិបាលកម្ពុជាកំពុងរំលោភសិទិ្ធមនុស្សយ៉ាងធ្ងន់ធ្ងរ។
អ្នកស្រីនិយាយថា៖ «គួរគាត់ [រដ្ឋាភិបាល] គោរពសិទ្ធិមនុស្ស ហើយនិងលទ្ធិប្រជាធិបតេយ្យ កុំឱ្យប្រទេសនីមួយៗមើលឃើញគាត់មិនគោរពសិទ្ធិមនុស្ស កុំឱ្យខ្មាសគេ! ហើយដោះលែងអ្នកទោសមនសិការទាំងអស់ឱ្យមានសេរីភាព ដូចជាប្ដីពួកខ្ញុំទាំងអស់ ឱ្យពួកគាត់មានសេរីភាពឡើងវិញមក ព្រោះពួកគាត់ចាស់ៗអស់ហើយ ហើយយកពួកគាត់ឃុំអ៊ីចឹង?»
យ៉ាងណា ការដាក់ញត្តិរបស់ក្រុមស្ដី្រថ្ងៃសុក្រនេះ ក៏មានការតាមឃ្លាំមើលពីសំណាក់អាជ្ញាធរប្រមាណ១០នាក់ ខណៈក្រុមស្ត្រីដែលទៅដាក់ញត្តិនោះមានគ្នាប្រហែលជិត២០នាក់ផងដែរ។
នាយករងអង្គការការពារសិទ្ធិមនុស្សលីកាដូ លោក អំ សំអាត យល់ថា ការដែលអ្នកទាំងនោះពាំនាំនូវសំណើឬសំណូមពរអ្វីមួយទៅបណ្ដាស្ថានទូតពាក់ព័ន្ធកិច្ចព្រមព្រៀងសន្តិភាពទីក្រុងប៉ារីសនេះ គឺជាសេរីភាពរបស់ពួកគេ។
លោកថា ការដែលស្ត្រីទាំងនោះព្យាយាមស្វែងរកអន្តរាគមន៍ពីសហគមន៍អន្តរជាតិ ដោយសារពួកគាត់យល់ថា គ្រួសារបស់ពួកគាត់រងនូវភាពអយុត្តិធម៌ ដោយត្រូវបានអាជ្ញាធរចាប់ឃុំខ្លួន ខណៈដែលគ្រួសាររបស់ពួកគាត់គ្រាន់តែបំពេញនូវសិទ្ធិជាមូលដ្ឋានក្នុងការចូលរួមក្នុងជីវភាពនយោបាយ សេដ្ឋកិច្ច សង្គម និងវប្បធម៌ ដែលធានាដោយបទដ្ឋានអន្តរជាតិ និងទទួលស្គាល់ដោយរដ្ឋធម្មនុញ្ញកម្ពុជា។
លោក អំ សំអាត ថ្លែងថា៖ «អ្វីដែលរដ្ឋាភិបាលបានផ្ដល់សច្ចាប័ន និងទទួលស្គាល់បទដ្ឋានអន្តរជាតិស្ដីពីសិទ្ធិមនុស្ស រដ្ឋាភិបាលត្រូវតែមានកាតព្វកិច្ចនៅក្នុងការគោរពទៅតាមគោលការណ៍ជាបទដ្ឋានអន្តរជាតិស្ដីពីសិទ្ធិមនុស្សដែលយើងបានទទួលស្គាល់»។
យ៉ាងណាក្ដី អ្នកនាំពាក្យគណៈកម្មាធិការសិទ្ធិមនុស្សកម្ពុជា លោក កត្តា អ៊ន មានប្រសាសន៍ថា ការដាក់ញត្តិរបស់ក្រុមស្រ្តីថ្ងៃសុក្រនេះ ជាសេរីភាពរបស់ពួកគាត់ដែលបានធ្វើជាយូរមកហើយ។ លោកថា អ្នកទាំងនោះត្រូវប្រើសិទ្ធិសេរីភាពដោយមើលក្របខណ្ឌច្បាប់ អនុវត្តដោយមានព្រំដែន និងមិនត្រូវបំពានច្បាប់ឡើយ។
លោក កត្តា អ៊ន ថ្លែងថា៖ «ក្រុមស្រ្តីសុក្រនេះ ខ្ញុំមើលសកម្មភាពរបស់គាត់ហាក់បីដូចជាមិនសូវស៊ីសង្វាក់ទៅនឹងគោលបំណងពិតរបស់គាត់ទាល់តែសោះ។ […] ដូច្នេះហើយការដែលគាត់ធ្វើ ហាក់បីដូចជាពុំមានប្រសិទ្ធភាពអ្វីនោះទេ ការដែលយើងទៅអំពាវនាវទៅស្ថានទូតនេះ ស្ថានទូតនោះ វាគ្មានឥទ្ធិពលអ្វីដែលជះមកលើការអនុវត្តច្បាប់ ការអនុវត្តសិទ្ធិមនុស្សរបស់រដ្ឋាភិបាលទេ»។
ការបន្តដាក់ញត្តិរបស់ក្រុមស្ត្រីថ្ងៃសុក្រនៅថ្ងៃនេះ បានធ្វើឡើង ខណៈសាលាដំបូងរាជធានីភ្នំពេញ គ្រោងនឹងបើកសវនាការលើថ្នាក់ដឹកនាំនិងសកម្មជនអតីតគណបក្សប្រឆាំងចំនួន៤២នាក់ នៅថ្ងៃអង្គារ ទី៧ ខែធ្នូ ខាងមុខនេះ។ ពួកគេអំពាវនាវឱ្យតុលាការទម្លាក់ចោលការចោទប្រកាន់និងដោះលែងស្វាមីរបស់ពួកគេឱ្យមានសេរីភាពឡើងវិញ ខណៈពួកគេបានត្អូញត្អែរថា អាជ្ញាធរបានឃុំខ្លួនអ្នកទាំងនោះដោយអយុត្តិធម៌៕