កម្ពុជាទទួលបានប្រាក់ចំណូលចំនួនជាង១ ១១៦លានដុល្លារសហរដ្ឋអាមេរិក លើការនាំចេញស្រូវនិងអង្ករទៅកាន់ទីផ្សារអន្តរជាតិនិងប្រទេសជិតខាង ក្នុងរយៈពេល១១ខែ ឆ្នាំ២០២១។
យោងតាមរបាយការណ៍របស់សហព័ន្ធស្រូវអង្ករកម្ពុជា កាលពីថ្ងៃទី៤ ខែធ្នូ បានបញ្ជាក់ថា ក្នុងរយៈពេល១១ខែ ឆ្នាំ២០២១នេះ កម្ពុជាបាននាំចេញស្រូវអង្ករទៅកាន់ទីផ្សារ និងឆ្លងកាត់ព្រំដែនជាមួយប្រទេសជិតខាងនូវអង្ករចំនួន៥៣២ ១៧៩តោន ដែលគិតជាទឹកប្រាក់មានចំនួនជាង៣០០លានដុល្លារ (៣៦៦ ៤១៤ ៧៩០,៤៦ដុល្លារ) និងស្រូវចំនួនជាង៣លានតោន (៣ ១២៣ ២៤២តោន) គិតជាទឹកប្រាក់ជាង៧០០លានដុល្លារ (៧៤៩ ៧៦០ ៣០៨,៩៨ដុល្លារ)។
របាយការណ៍ដដែលបានបន្ថែមថា ប្រទេសចិនជាប្រទេសដែលកម្ពុជាបាននាំអង្ករទៅច្រើនជាងគេដែលមានចំនួន ៤៩,៨៥% នៃការនាំចេញសរុបដែលមានកំណើនកើនឡើងចំនួន ១២,៩០% ខណៈដែលការនាំចេញទៅគោលដៅផ្សេងៗមានការធ្លាក់ចុះ។
សម្រាប់ខែវិច្ឆិកាកន្លងទៅ ការនាំចេញមានកំណើន ១១,២៣% បើប្រៀបធៀបទៅនឹងខែវិច្ឆិកា ឆ្នាំ២០២០ ដែលមានបរិមាណចំនួន៧២ ០១០តោន ដែលគិតជាទឹកប្រាក់មានចំនួន៤២ ៩៤៦ ៨៨៥,២០ដុល្លារសហរដ្ឋអាមេរិក ហើយស្រូវបានធ្វើការនាំចេញចំនួន១៨ ៥៣០ឡាន ឬស្មើនឹង ៤៦៣ ២៥២តោន ដែលគិតជាទឹកប្រាក់ប្រហែល១១៥,៨១លានដុល្លារសហរដ្ឋអាមេរិក៕