រដ្ឋមន្ត្រីក្រសួងការបរទេសសហរដ្ឋអាមេរិក លោក អេនតូនី ប្លីនខេន (Antony Blinken) បានធ្វើដំណើរមកដល់ប្រទេសឥណ្ឌូនេស៊ីហើយ នៅថ្ងៃចន្ទនេះ ក្នុងដំណើរទស្សនកិច្ចមកកាន់តំបន់អាស៊ីអាគ្នេយ៍ ក្នុងគោលបំណងដើម្បីពង្រឹងទំនាក់ទំនងនៅក្នុងតំបន់ដែលបានក្លាយជាសមរភូមិយុទ្ធសាស្ត្ររវាងអាមេរិក និងចិន។ នេះបើតាមការផ្សព្វផ្សាយដោយទីភ្នាក់ងារសារព័ត៌មាន Reuters។
ក្នុងដំណើរទស្សនកិច្ចនៅអាស៊ីអាគ្នេយ៍ជាលើកដំបូងរបស់ខ្លួន គិតចាប់តាំងពីប្រធានាធិបតីសហរដ្ឋអាមេរិក លោក ចូ បៃឌិន ឡើងកាន់តំណែងក្នុងខែមករា លោក អេនតូនី ប្លីនខេន នឹងត្រូវបន្តដំណើរទៅកាន់ប្រទេសម៉ាឡេស៊ី និងប្រទេសថៃក្នុងសប្ដាហ៍នេះ បន្ទាប់ពីបំពេញទស្សនកិច្ចក្នុងទីក្រុងហ្សាកាតា ប្រទេសឥណ្ឌូនេស៊ី ជាកន្លែងដែលលោកនឹងជួបជាមួយប្រធានាធិបតីឥណ្ឌូនេស៊ី លោក ចូកូ វីដូដូ (Joko Widodo) និងថ្លែងសុន្ទរកថាស្ដីពីយុទ្ធសាស្ត្រឥណ្ឌូ-ប៉ាស៊ីហ្វិករបស់សហរដ្ឋអាមេរិកនៅថ្ងៃអង្គារ។
ជាមួយគ្នានេះ រដ្ឋមន្ត្រីការបរទេសរូបនេះក៏នឹងបញ្ជាក់ពីគោលបំណងរបស់លោក ចូ បៃឌិន ក្នុងការបង្កើនការចូលរួមជាមួយសមាគមប្រជាជាតិអាស៊ីអាគ្នេយ៍ (អាស៊ាន) និងពិភាក្សាអំពីចក្ខុវិស័យរបស់ប្រធានាធិបតីរូបនេះ សម្រាប់ក្របខណ្ឌសេដ្ឋកិច្ចឥណ្ឌូប៉ាស៊ីហ្វិកផងដែរ។
រដ្ឋបាលលោក ចូ បៃឌិន បានចាត់ទុកថា ការចូលរួមកាន់តែជិតស្និទ្ធនៅក្នុងតំបន់អាស៊ីអាគ្នេយ៍ គឺមានសារៈសំខាន់ចំពោះកិច្ចខិតខំប្រឹងប្រែងរបស់ខ្លួនក្នុងការរុញច្រានប្រឆាំងនឹងអំណាចដែលកំពុងកើនឡើងរបស់ប្រទេសចិន។
ទោះជាយ៉ាងណា រដ្ឋបាលរបស់លោកមិនទាន់បញ្ជាក់លម្អិតថាតើក្របខណ្ឌសេដ្ឋកិច្ចដែលលោក ចូ បៃឌិន បានរំពឹងទុកមានអ្វីខ្លះនោះទេ៕
The #G7 is a key venue for us to address today’s global challenges. I am grateful to the United Kingdom and Liverpool for hosting us. It was great to spend time in the hometown of one of my favorite bands, @TheBeatles. Onward to Jakarta. pic.twitter.com/VfIK0pFj4e
— Secretary Antony Blinken (@SecBlinken) December 13, 2021
