ប្រធានាធិបតីរុស្ស៊ី លោក វ្លាឌីមៀរ ពូទីន និងសមភាគីអាមេរិក លោក ចូ បៃឌិន បានយល់ព្រមក្នុងការមានកិច្ចចរចាជាមួយគ្នាបន្ថែមទៀត ស្របពេលដែលភាពតានតឹងជុំវិញចលនាទ័ពរបស់រុស្ស៊ីនៅក្បែរព្រំដែនអ៊ុយក្រែនកើនឡើង។ នេះបើតាមការផ្សព្វផ្សាយដោយទីភ្នាក់ងារសារព័ត៌មាន Reuters។
ការយល់ព្រមរបស់មេដឹកនាំនៃប្រទេសទាំងពីរ ក្នុងការមានកិច្ចចរចាជាមួយគ្នាបន្ថែមទៀតនេះ ត្រូវបានធ្វើឡើងក្នុងជំនួបតាមរយៈប្រព័ន្ធវីដេអូមួយកាលពីថ្ងៃទី៧ ខែធ្នូ ដែលផ្ដោតលើទំនាក់ទំនងនៃតំបន់លោកខាងកើត និងខាងលិច ដែលបច្ចុប្បន្នមានការធ្លាក់ចុះ។
តាមរយៈជំនួបនេះ លោក ចូ បៃឌិន ក៏បានព្រមានលោក ពូទីន ផងដែរថា លោកខាងលិចនឹងដាក់ «វិធានការសេដ្ឋកិច្ចធ្ងន់ធ្ងរ និងចំណាត់ការផ្សេងទៀត» លើរុស្ស៊ី ក្នុងករណីដែលប្រទេសមួយនេះឈ្លានពានអ៊ុយក្រែន។
នៅក្នុងវីដេអូមួយដែលបានចេញផ្សាយតាមរយៈទូរទស្សន៍រដ្ឋរុស្ស៊ី អ្នកនាំពាក្យវិមានក្រឹមឡាំង លោក Dmitry Peskov ថ្លែងថា លោក វ្លាឌីមៀរ ពូទីន មិនមានជាសុទិដ្ឋិនិយមណាមួយនោះទេ បន្ទាប់ពីជំនួបជាមួយលោក ចូ បៃឌិន ដោយសារតែប្រទេសទាំងពីរនៅតែបន្តមានភាពខ្វែងគំនិតគ្នា។
អ្នកនាំពាក្យដដែលបន្ថែមថា លោក ពូទីន កាលពីថ្ងៃទី៧ ខែធ្នូនោះ ក៏បានប្រាប់លោក បៃឌិន ថាកងទ័ពរុស្ស៊ីទាំងឡាយគឺស្ថិតនៅលើទឹកដីរបស់ខ្លួន ដោយមិនបានបង្កការគំរាមកំហែងដល់នរណាម្នាក់ឡើយ។
ទោះជាយ៉ាងណា លោក Dmitry Peskov បន្តថា មេដឹកនាំទាំងពីរបានយល់ព្រមក្នុងការមានកិច្ចចរចាផ្សេងទៀតដែលទំនងជានឹងធ្វើឡើងតាមរយៈវីដេអូដដែល។
លោកថា៖ «ជាការពិតណាស់ យើងនឹងជួបគ្នាសារជាថ្មី។ ខ្ញុំពិតជាចង់ឱ្យសកម្មភាពនេះកើតឡើងណាស់»។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន បានចាប់ផ្ដើមកើនឡើង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន តាមរយៈចលនាទ័ពរបស់ខ្លួននៅក្បែរព្រំដែនរបស់ប្រទេសមួយនេះ៕