រដ្ឋមន្ត្រីក្រសួងការបរទេសសហរដ្ឋអាមេរិក លោក អេនតូនី ប្លីនខេន (Antony Blinken) បានក្រើនរំឭកសារជាថ្មីនៅថ្ងៃអង្គារនេះ ពីការប្ដេជ្ញាចិត្តដ៏រឹងមាំរបស់អាមេរិកចំពោះភាពជាដៃគូយុទ្ធសាស្ត្រ ជាមួយឥណ្ឌូនេស៊ី និងការចូលរួមរបស់ខ្លួននៅឯសមុទ្រចិនខាងត្បូង។ នេះបើតាមការផ្សព្វផ្សាយដោយទីភ្នាក់ងារសារព័ត៌មាន Reuters។
ការថ្លែងរបស់រដ្ឋមន្ត្រីក្រសួងការបរទេសរូបនេះបានធ្វើឡើង ខណៈដែលរូបលោកជួបជាមួយរដ្ឋមន្ត្រីការបរទេសឥណ្ឌូនេស៊ី លោកស្រី រីតណូ ម៉ាស៊ូឌី (Retno Marsudi) និងការចុះហត្ថលេខាលើកិច្ចព្រមព្រៀងរួមមួយចំនួន។
ជាមួយគ្នានេះ លោកស្រី រីតណូ ម៉ាស៊ូឌី បានថ្លែងថា សហរដ្ឋអាមេរិកក៏បានប្ដេជ្ញាចិត្តក្នុងការបង្កើនការចូលរួមជាមួយឥណ្ឌូនេស៊ីនៅគ្រប់កម្រិតទាំងអស់ផងដែរ។
គួរបញ្ជាក់ថា លោក អេនតូនី ប្លីនខេន បានធ្វើដំណើរមកដល់ប្រទេសឥណ្ឌូនេស៊ី កាលពីថ្ងៃចន្ទម្សិលមិញ ក្នុងដំណើរទស្សនកិច្ចមកកាន់តំបន់អាស៊ីអាគ្នេយ៍ ក្នុងគោលបំណងដើម្បីពង្រឹងទំនាក់ទំនងនៅក្នុងតំបន់។
ក្នុងដំណើរទស្សនកិច្ចនេះ រដ្ឋមន្ត្រីក្រសួងការបរទេសដដែលក៏នឹងត្រូវបន្តដំណើរទៅកាន់ប្រទេសម៉ាឡេស៊ី និងប្រទេសថៃ ក្នុងសប្ដាហ៍នេះផងដែរ បន្ទាប់ពីបញ្ចប់ការបំពេញទស្សនកិច្ចក្នុងទីក្រុងហ្សាកាតា ប្រទេសឥណ្ឌូនេស៊ី៕
The United States and Indonesia share a strong vision of a free and open Indo-Pacific region. Today, I signed an agreement with Indonesian Foreign Minister @Menlu_RI to further deepen our bilateral relations and continue our excellent partnership on maritime cooperation. pic.twitter.com/9TJU4vUM6T
— Secretary Antony Blinken (@SecBlinken) December 14, 2021
