តុលាការរាជធានីភ្នំពេញ បានកោះហៅអតីតប្រធានគណបក្សសង្រ្គោះជាតិ លោក កឹម សុខា ចូលរួមសវនាការនៅចុងខែមករា ឆ្នាំ២០២២ខាងមុខ ក្រោយពីសំណុំរឿងមួយនេះ តុលាការបានផ្អាកសវនាការប្រមាណ២ឆ្នាំមកហើយ ក្រោមហេតុផលទប់ស្កាត់ការឆ្លងរីករាលដាលជំងឺកូវីដ-១៩។
ក្នុងដីកាកោះហៅឱ្យចូលរួមសវនាការបន្តរបស់តំណាងអយ្យការអមសាលាដំបូងរាជធានីភ្នំពេញ លោក ប្លង់ សុផល កាលពីថ្ងៃចន្ទម្សិលមិញ ដែលទើបផ្សព្វផ្សាយនៅថ្ងៃអង្គារនេះ តម្រូវឱ្យលោក កឹម សុខា ត្រូវចូលរួមសវនាការក្នុងសំណុំរឿង «សន្និដ្ឋិភាពជាមួយបរទេស» នៅព្រឹកថ្ងៃទី២២ ខែមករា ឆ្នាំ២០២២ ជាកំហិត។
ដីកានោះសរសេរថា៖ «ជនជាប់ចោទត្រូវចូលមកបង្ហាញខ្លួននៅចំពោះមុខតុលាការ តាមដីកាកោះនេះឱ្យបានទាន់ពេលវេលាជាកំហិត»។
លោក កឹម សុខា បានរងការចោទប្រកាន់ពីបទ «សន្និដ្ឋិភាពជាមួយបរទេស» ឬ «ត្រូវរ៉ូវជាមួយបរទេសចង់ផ្ដួលរំលំរដ្ឋាភិបាល»។ សំណុំរឿងក្ដីរបស់លោកត្រូវបានតុលាការរាជធានីភ្នំពេញ លើកមកជំនុំជម្រះកាលពីអំឡុងខែមករា ឆ្នាំ២០២០ ហើយសវនាការនោះក៏បានបន្តនីតិវិធីរហូតដល់ចុងខែមីនាឆ្នាំដដែល ទើបតុលាការសម្រេចផ្អាករហូតមក។ បើទោះបីជាក្រុមសហមេធាវីលោក កឹម សុខា បានដាក់លិខិតស្នើសុំទៅតុលាការឱ្យបន្តនីតិវិធីជាច្រើនលើកក្ដី ប៉ុន្តែត្រូវបានតុលាការបដិសេធ ក្រោមហេតុផលការឆ្លងរាលដាលជំងឺកូវីដ-១៩។
គិតមកទល់ពេលបច្ចុប្បន្ន មានរយៈពេលប្រមាណ៤ឆ្នាំមកហើយដែលសិទ្ធិសេរីភាពធ្វើនយោបាយរបស់អតីតប្រធានគណបក្សសង្គ្រោះជាតិ លោក កឹម សុខា ត្រូវបានបាត់បង់ទាំងស្រុង ក្រោយពេលលោកត្រូវបានចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ យកទៅដាក់នៅពន្ធនាគារត្រពាំងផ្លុង ក្នុងខេត្តត្បូងឃ្មុំ ជាប់ព្រំដែនវៀតណាម។
២ខែក្រោយការចាប់ខ្លួនលោក កឹម សុខា ពោលគឺនៅថ្ងៃទី១៦ ខែវិច្ឆិកា ឆ្នាំ២០១៧ តុលាការកំពូលបានសម្រេចរំលាយគណបក្សសង្រ្គោះជាតិជាស្ថាពរ ខណៈគណបក្សប្រឆាំងធំមួយនេះមានសំឡេងអ្នកគាំទ្រប្រហាក់ប្រហែលគណបក្សកាន់អំណាចពេលនោះ។
ទាំងលោក កឹម សុខា និងមន្ត្រីជាន់ខ្ពស់បក្សសង្រ្គោះជាតិ ចំនួន១១៧នាក់ផ្សេងទៀត ត្រូវបានតុលាការកំពូលដាក់បម្រាមធ្វើនយោបាយរយៈពេល៥ឆ្នាំតាំងពីពេលនោះមក ហើយតំណែងអតីតមន្ត្រីបក្សប្រឆាំងតាំងពីថ្នាក់មូលដ្ឋានរហូតដល់ថ្នាក់ព្រឹទ្ធសភា ក៏ត្រូវដកហូតយកទៅចែកគណបក្សផ្សេងដែលពលរដ្ឋមិនបានបោះឆ្នោតជូនផងដែរ៕
