អន្តរជាតិ

អាល្លឺម៉ង់ថា រុស្ស៊ីអាចនឹងជួបផលវិបាកធ្ងន់ធ្ងរប្រសិនបើខ្លួនឈ្លានពានអ៊ុយក្រែន

លោក ភុន ច័ន្ទឧសភា
| ១៥ ធ្នូ ២០២១
ម៉ោង ១៤:០០

អ្នកស្រី Annalena Baerbock រដ្ឋមន្ត្រីការបរទេសអាល្លឺម៉ង់ ថ្លែងក្នុងជំនួបពិភាក្សាមួយកាលពីពេលកន្លងទៅ។ (ហ្វេសប៊ុក៖ Annalena Baerbock)

រដ្ឋមន្ត្រីការបរទេសអាល្លឺម៉ង់ថ្មី អ្នកស្រី Annalena Baerbock បានឱ្យដឹងនៅថ្ងៃអង្គារម្សិលមិញថា រុស្ស៊ីអាចនឹងប្រឈមមុខនឹងផលវិបាកធ្ងន់ធ្ងរប្រសិនបើខ្លួនឈ្លានពានអ៊ុយក្រែន។

ការថ្លែងរបស់រដ្ឋមន្ត្រីការបរទេសរូបនេះធ្វើឡើងក្នុងជំនួបតាមរយៈទូរសព្ទជាមួយរដ្ឋមន្ត្រីការបរទេសរុស្ស៊ី លោក Sergei Lavrov។

អ្នកស្រី Annalena Baerbock បញ្ជាក់ថា បូរណភាពទឹកដីរបស់អ៊ុយក្រែន មិនគួរត្រូវបានរំលោភបំពានឡើយ។

យោងតាមក្រសួងការបរទេសអាល្លឺម៉ង់ អ្នកស្រី Annalena Baerbock នៅក្នុងជំនួបនេះ ក៏បានអំពាវនាវឱ្យកិច្ចសន្ទនារវាងភាគីទាំងពីរប្រព្រឹត្តទៅដោយការបើកចំហនិងស្មោះត្រង់ ជុំវិញវិបត្តិនៅអ៊ុយក្រែនផងដែរ។

ទីភ្នាក់ងារសារព័ត៌មាន Reuters បានស្រង់ការលើកឡើងរបស់រដ្ឋមន្ត្រីការបរទេសអាល្លឺម៉ង់ ដែលបានបង្ហោះសារលើបណ្ដាញសង្គមធ្វីតទ័រ (Twitter) ថា៖ «យើងចង់បានការសន្ទនាដោយស្មោះត្រង់និងបើកចំហ។ បូរណភាពទឹកដីរបស់អ៊ុយក្រែន មិនត្រូវមានការរំលោភបំពានឡើយ»។

គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន បានចាប់ផ្ដើមកើនឡើង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន។

ទាក់ទិននឹងករណីនេះ អ៊ុយក្រែនក៏បានចោទប្រកាន់រុស្ស៊ីទាក់ទងនឹងការប្រមូលផ្ដុំទ័ពប្រមាណជា១០ម៉ឺននាក់ ក្នុងការត្រៀមខ្លួនសម្រាប់ការឈ្លានពានប្រទេសរបស់ខ្លួនផងដែរ។

ទោះជាយ៉ាងណា រុស្ស៊ីបដិសេធគម្រោងរៀបចំការវាយប្រហារណាមួយ ខណៈដែលពួកគេធ្លាប់បានលើកឡើងកាលពីពេលកន្លងទៅថា កងទ័ពទាំងឡាយរបស់ពួកគេគឺស្ថិតនៅលើទឹកដីរបស់ខ្លួន ដោយមិនបានបង្កការគំរាមកំហែងដល់នរណាម្នាក់ឡើយ៕

រុស្ស៊ី, អាល្លឺម៉ង់, អ៊ុយក្រែន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។