ប្រធានគណៈកម្មការអឺរ៉ុប លោកស្រី Ursula Von der Leyen បានឱ្យដឹងនៅថ្ងៃសុក្រនេះថា សហភាពអឺរ៉ុបបានត្រៀមខ្លួនរួចជាស្រេចក្នុងការដាក់ទណ្ឌកម្មធ្ងន់ធ្ងរលើប្រទេសរុស្ស៊ី ប្រសិនបើយោធារបស់ប្រទេសមួយនេះឈ្លានពានអ៊ុយក្រែន។
ទីភ្នាក់ងារសារព័ត៌មាន Reuters បានស្រង់សម្ដីប្រធានគណៈកម្មការអឺរ៉ុបរូបនេះដែលបានថ្លែងប្រាប់សន្និសីទសារព័ត៌មានមួយថា៖ «គ្មានអ្វីដែលត្រូវសង្ស័យនោះទេ ប្រសិនបើរុស្ស៊ីធ្វើសកម្មភាពណាមួយដែលជាការឈ្លានពានអ៊ុយក្រែន សហភាពអឺរ៉ុបនឹងដាក់ទណ្ឌកម្មដែលធ្វើឱ្យមានផលប៉ះពាល់ធ្ងន់ធ្ងរលើប្រទេសមួយនេះ»។
ភាពតានតឹងរវាងរុស្ស៊ី និងអ៊ុយក្រែន បានចាប់ផ្ដើមកើនឡើង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន តាមរយៈចលនាទ័ពរបស់ខ្លួននៅក្បែរព្រំដែនរបស់ប្រទេសមួយនេះ។
ទាក់ទិននឹងករណីនេះ ប្រទេសមួយចំនួន ក្នុងនោះមាន អាមេរិក និងអាល្លឺម៉ង់ ក៏ធ្លាប់បានព្រមានដាក់វិធានការសេដ្ឋកិច្ចធ្ងន់ធ្ងរ និងចំណាត់ការផ្សេងទៀតលើរុស្ស៊ី ក្នុងករណីដែលប្រទេសមួយនេះឈ្លានពានអ៊ុយក្រែនផងដែរ។
ទោះជាយ៉ាងណា រុស្ស៊ីធ្លាប់បានបដិសេធគម្រោងរៀបចំការវាយប្រហារណាមួយលើអ៊ុយក្រែន ខណៈដែលពួកគេបានលើកឡើងកាលពីពេលកន្លងទៅថា កងទ័ពទាំងឡាយរបស់ពួកគេគឺស្ថិតនៅលើទឹកដីរបស់ខ្លួន ដោយមិនបានបង្កការគំរាមកំហែងដល់នរណាម្នាក់ឡើយ៕
Let there be no doubt: if Russia moves against Ukraine, the EU will be in a position to take sanctions that could extract a massive cost.
— Ursula von der Leyen (@vonderleyen) December 17, 2021
We have done our work in that respect. pic.twitter.com/YKmXeeWsoe
