ប្រមុខរដ្ឋាភិបាលបញ្ជាទៅអាជ្ញាធរពាក់ព័ន្ធឱ្យពន្លឿនការចាក់វ៉ាក់សាំងដូសជំរុញឱ្យបានលឿន ដើម្បីទប់ស្កាត់ការឆ្លងរាលដាលជំងឺកូវីដ-១៩ បំប្លែងថ្មី «អូមីក្រុង» ខណៈវីរុសនេះបានឆ្លងចូលសហគមន៍ចំនួន៤ករណី។
លោកនាយករដ្ឋមន្ត្រី ហ៊ុន សែន លើកឡើងថា កម្ពុជាបានរកឃើញករណីឆ្លងជំងឺកូវីដ-១៩បំប្លែងថ្មីប្រភេទ«អូមីក្រុង» ក្នុងសហគមន៍ចំនួន៤ករណីហើយគិតត្រឹមព្រឹកថ្ងៃចន្ទនេះ។
ការថ្លែងរបស់នាយករដ្ឋមន្ត្រីធ្វើឡើងក្នុងពិធីសម្ពោធដាក់ឱ្យប្រើប្រាស់កំណាត់ផ្លូវជាតិលេខ៥ ពីខេត្តបាត់ដំបង ទៅស្រុកសិរីសោភ័ណ ខេត្តបន្ទាយមានជ័យ នាព្រឹកថ្ងៃទី១០ ខែមករា ឆ្នាំ២០២២នេះ។
លោកនាយករដ្ឋមន្ត្រី ហ៊ុន សែន មានប្រសាសន៍បន្តថា៖ «ខេត្តនីមួយៗត្រូវតែខិតខំខ្លួនឯង ដើម្បីឱ្យដំណើរការចាក់អាដូសទី៣ ដើម្បីដើរឱ្យទាន់ពេលអាអូមីក្រុងនេះ ដែលវាកំពុងឈានចូលក្នុងសហគមន៍ អត់មានជម្រើសឱ្យល្អជាងហ្នឹងទេៗ។ អ៊ីចឹងគ្រប់ខេត្តទាំងអស់ត្រូវខិតខំដើម្បីជំរុញល្បឿននៃការចាក់អាដូសទី៣ហ្នឹង»។
អគ្គនាយកបច្ចេកទេសនៃក្រសួងសុខាភិបាល លោកវេជ្ជបណ្ឌិត ហុក គឹមចេង មានប្រសាសន៍ថា ដើម្បីឆ្លើយតបទៅនឹងការឆ្លងចូលសហគមន៍នៃវីរុសបំប្លែងថ្មី «អូមីក្រុង» ក្រសួងសុខាភិបាលមានគោលការណ៍បង្កើនល្បឿនការចាក់វ៉ាក់សាំងដូសជំរុញឱ្យបានឆាប់តាមដែលអាចធ្វើបាន។
លោកថា៖ «សំខាន់បំផុតគឺពេលហ្នឹង អ្នកដែលត្រូវចាក់ដូសជំរុញ គឺត្រូវចាក់ឱ្យបានលឿន! ហើយអនុវត្តន៣កុំ៣ការពារហ្នឹង គឺយើងត្រូវតែប្រកាន់អាហ្នឹង»។
អនុប្រធានមន្ទីរពេទ្យហ្លួងម៉ែ លោកឧត្តមសេនីយ៍ទោ ចាន់ ដារ៉ាវុទ្ធ លើកឡើងថា នៅមន្ទីរពេទ្យហ្លួងម៉ែ ក៏មានអ្នកជំងឺអូមីក្រុងសម្រាកព្យាបាលដែរ ប៉ុន្តែលោកសុំមិនបញ្ជាក់ពីតួលេខអ្នកកំពុងព្យាបាលនិងជាសះស្បើយឡើយ គឺក្នុងន័យរក្សាទិន្នន័យស្ថាប័ន។
លោកបន្តថា អ្នកឆ្លងវីរុសកូវីដ-១៩បំប្លែងថ្មី អូមីក្រុង មានអាការដូចអ្នកឆ្លងកូវីដ-១៩ផ្សេងៗដែរ។ យ៉ាងណា លោកថា មិនអាចកត់សម្គាល់តាមសញ្ញាណាមួយបានទេថាអ្នកជំងឺឆ្លងវីរុសប្រភេទមួយណា លុះត្រាតែឆ្លងកាត់ការធ្វើតេស្តសិន។
លោកវេជ្ជបណ្ឌិត ចាន់ ដារ៉ាវុទ្ធ មានប្រសាសន៍ថា៖ «ពាក់ព័ន្ធជាមួយអូមីក្រុងដែលចូលមកថ្មីហ្នឹង រោគសញ្ញាវាអត់មានអីខុសប្លែកពី[វីរុស]ចាស់ទេ។ វាប្រហាក់ប្រហែលគ្នាទេ រោគសញ្ញាវាមានឈឺក្បាល រមាស់ក ឈឺក ហៀរសំបោរ ក្ដៅខ្លួនអីដូចតែគ្នាអ៊ីចឹង ឬប្រហាក់ប្រហែលផ្ដាសាយធំ។ ទី២ យើងអត់អាចកំណត់សម្គាល់ថាអាហ្នឹងវាប្រភេទដែលតា ប៊ែតតា អាល់ហ្វា ឬក៏អូមីក្រុង ទាល់តែចូលម៉ាស៊ីនទើបអាចញែកបាន។ យើងអត់មានរោគសញ្ញាណាមួយសម្គាល់ថា គាត់ឈឺនេះត្រូវតែអូមីក្រុង ឈឺនេះត្រូវតែជាដែលតា អត់ទេ! អត់មានទេ»។
លោកបន្ថែមថា ការការពារសុខភាពកុំឱ្យឆ្លងវីរុសប្រភេទអូមីក្រុង គឺមិនខុសប្លែកពីរបៀបដែលការពារពីវីរុសដែលតានោះទេ គឺត្រូវលាងដៃ ពាក់ម៉ាស់ជាប់ជាប្រចាំ រក្សាអនាម័យ រក្សាគម្លាតឱ្យបាន២ម៉ែត្រឡើងទៅ។ លោកថា សកម្មភាពទាំងនេះមានប្រសិទ្ធភាពកាត់បន្ថយការឆ្លង ខណៈអូមីក្រុងមានល្បឿនចម្លងលឿនជាងដែលតា និងអាល់ហ្វា។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី មានប្រសាសន៍ថា ជំងឺកូវីដ-១៩ មិនសាបរលាបភ្លាមៗទេ ខណៈវីរុសនេះតែងតែបំប្លែងខ្លួនថ្មីៗជាបន្តបន្ទាប់។ លោកថា ពលរដ្ឋត្រូវរៀនរស់ជាមួយវា ដោយរក្សាអនាម័យ និងចៀសវាងការប្រមូលផ្ដុំបើមិនចាំបាច់។ ក្រៅពីនោះ លោកថា ពួកគាត់ត្រូវចាក់វ៉ាក់សាំងដើម្បីបណ្ដុះអង់ទីករ។
លោក អ៊ូច វុទ្ធី ថា៖ «អូមីក្រុង វាហូរចូលពីប្រទេសគេ អ៊ីចឹងគួរណាតែយើងមានវិធានការដើម្បីចាត់ប្រជាពលរដ្ឋដែលគាត់ជាមនុស្សចម្លែកចូលមកស្រុកយើងហ្នឹង យកគាត់ពិនិត្យមើល ហើយដាក់គាត់ធ្វើចត្តាឡីស័កប៉ុន្មានថ្ងៃ ដើម្បីឱ្យគាត់បានទៅកន្លែងដែលគាត់ចង់ទៅ។ អានេះជារឿងមួយ គួរណាដែលក្រសួងសុខាភិបាលត្រូវតែមានវិធានការច្បាស់លាស់ពីរឿងច្រកចេញ-ចូលហ្នឹង អាហ្នឹងសំខាន់ណាស់។ ហើយខ្ញុំមើលបើបណ្ដោយច្រកចេញចូលប៉ាតណាប៉ាតណីអ៊ីចឹង ហើយអត់មានការពិនិត្យត្រឹមត្រូវតាមច្រកទាំងអស់ហ្នឹងទេ អាហ្នឹងវានៅតែឆ្លងរាលដាលឆ្លងអ៊ីចឹង។ ហើយអូមីក្រុងនេះ វាមកពីអាហ្វ្រិក ឆ្លងមហាសមុទ្រមិនដឹងប៉ុន្មាន អ៊ីចឹងមិនគួរណាវាចូលដល់ស្រុកយើង»។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី៩ ខែមករា ឆ្នាំ២០២២ បានឱ្យដឹងថា គិតមកដល់ថ្ងៃទី៨ ខែមករា កម្ពុជារកឃើញអ្នកឆ្លងជំងឺកូវីដ-១៩ ប្រភេទបំប្លែងខ្លួន «អូមីក្រុង» ចំនួន៣០នាក់ ហើយការនាំចូលពីក្រៅប្រទេសមាន២៩ករណី និងមួយករណីជាការរកឃើញឆ្លងក្នុងសហគមន៍។
ក្រសួងបន្តថា ករណីរកឃើញនេះគឺនៅលើបុរសជនជាតិខ្មែរម្នាក់ អាយុ២៣ឆ្នាំ ស្នាក់នៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
ក្រសួងបញ្ជាក់ទៀតថា ចាប់តាំងពីថ្ងៃទី២៧ ខែធ្នូ ឆ្នាំ២០២១ ដល់ថ្ងៃទី៥ ខែមករា ឆ្នាំ២០២២ បុរសជនជាតិខ្មែររូបនេះបានធ្វើដំណើរទៅកន្លែងជាច្រើន ដូចជា រាជធានីភ្នំពេញ ខេត្តកំពង់ធំ ខេត្តសៀមរាប និងទៅលេងទីតាំងមួយចំនួននៅតានីទូកមាស ខេត្តកំពត ដោយបានធ្វើដំណើរជាមួយបងប្អូនជីដូនមួយមកពីប្រទេសអូស្ត្រាលីកាលថ្ងៃទី២៧ ខែធ្នូ ឆ្នាំ២០២១។
ប្រភពដដែលថា នៅថ្ងៃទី៥ ខែមករា ឆ្នាំ២០២២ អ្នកជំងឺរូបនេះបានទៅកំដរអ្នកជំងឺដែលជាបងប្អូនជីដូនមួយគាត់នៅមន្ទីរពេទ្យមួយ ដែលក្រោយមកក៏បានរកឃើញមានវិជ្ជមានវីរុសកូវីដ-១៩ អូមីក្រុង តែម្តង៕