ចក្រភពអង់គ្លេសបានបញ្ជាក់ជាថ្មីថា ខ្លួននៅតែប្ដេជ្ញាចិត្តក្នុងការគាំទ្រសេរីភាពនៃការបញ្ចេញមតិនិងសេរីភាពសារព័ត៌មាននៅកម្ពុជា។
ការប្ដេជ្ញាចិត្តនេះបានធ្វើឡើងដោយលោកស្រី Amanda Milling រដ្ឋមន្ត្រីទទួលបន្ទុកកិច្ចការអាស៊ី ក្រោយពីលោកស្រីបានជួបជាមួយក្រុមមន្ត្រីអង្គការសង្គមស៊ីវិលនៅកម្ពុជាកាលពីថ្ងៃទី១០ ខែមករា នៅពេលដែលលោកស្រីបានមកបំពេញទស្សនកិច្ចរយៈពេល៣ថ្ងៃនៅកម្ពុជា។
លោកស្រី Amanda Milling បានសរសេរនៅលើទំព័រ Twitter ផ្ទាល់ខ្លួនរបស់លោកស្រីកាលពីម្សិលមិញថា លោកស្រីរីករាយដែលមានឱកាសបានជួបសន្ទនាជាមួយក្រុមមេដឹកនាំអង្គការសង្គមស៊ីវិលនៅកម្ពុជាដែលធ្វើការងារខាងផ្នែកសិទ្ធិមនុស្ស។ លោកស្រីបន្តថា លោកស្រីបានជជែកគ្នាអំពីសារៈសំខាន់នៃការការពារសិទ្ធិមនុស្សនៅក្នុងប្រទេសកម្ពុជានិងនៅអាស៊ីអាគ្នេយ៍ផងដែរ។
លោកស្រីថា៖ «ចក្រភពអង់គ្លេសតែងតែគាំទ្រសេរីភាពនៃការបញ្ចេញមតិនិងសេរីភាពនៃសារព័ត៌មាន»។
Glad to have the chance to speak to some of Cambodia's leading human rights organisations.
— Amanda Milling (@amandamilling) January 10, 2022
We spoke about the importance of protecting human rights in Cambodia and across Southeast Asia.
The UK will always support freedom of expression and freedom of the press. pic.twitter.com/Y3vXFSnylF
ស្ថានទូតអង់គ្លេសប្រចាំនៅកម្ពុជាក៏បានសរសេរនៅលើទំព័រហ្វេសប៊ុករបស់ខ្លួនកាលពីម្សិលមិញដែរថា ចក្រភពអង់គ្លេសបានចាត់ទុកសិទ្ធិមនុស្សជាគោលការណ៍ស្នូលនៃកិច្ចការដែលអង់គ្លេសត្រូវធ្វើ។
ការប្ដេជ្ញាចិត្តរបស់លោកស្រី Amanda Milling បានធ្វើឡើងស្របពេលដែលបុគ្គលិកក្រុមហ៊ុនណាហ្គាវើលដ៍ជាង១ពាន់នាក់កំពុងធ្វើកូដកម្មទាមទារលក្ខខណ្ឌការងារអស់រយៈពេលជិតមួយខែមកហើយ និងស្របពេលដែលថ្នាក់ដឹកនាំសហជីពរបស់ពួកគេចំនួន៨នាក់ត្រូវបានអាជ្ញាធរចាប់ឃុំខ្លួនក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង៤៩៥ នៃក្រមព្រហ្មទណ្ឌកម្ពុជា។
យោងតាមរបាយការណ៍របស់អង្គការអ្នកកាសែតគ្មានព្រំដែន (Reporters Without Borders) សេរីភាពសារព័ត៌មាននៅក្នុងប្រទេសកម្ពុជា បានបន្តធ្លាក់ចុះក្នុងរយៈពេលបីឆ្នាំជាប់ៗគ្នាចាប់តាំងពីឆ្នាំ២០១៧មក ដោយសារតែការបង្ក្រាបរបស់រដ្ឋាភិបាលកម្ពុជាទៅលើប្រព័ន្ធផ្សព្វផ្សាយឯករាជ្យ អង្គការសង្គមស៊ីវិល និងសំឡេងក្រុមប្រឆាំង នៅមុនការបោះឆ្នោតជាតិនៅឆ្នាំ២០១៨។
បើតាមស្ថានទូតអង់គ្លេសប្រចាំនៅកម្ពុជា នេះគឺជាដំណើរទស្សនកិច្ចជាលើកដំបូងហើយរបស់លោកស្រី Amanda Milling រដ្ឋមន្ត្រីចក្រភពអង់គ្លេសមកកាន់កម្ពុជា ចាប់តាំងពីចក្រភពអង់គ្លេសបានក្លាយជាដៃគូសន្ទនាអាស៊ាន។ ក្នុងរយៈពេលបីថ្ងៃមកនេះ លោកស្រី Milling បានជួបជាមួយដៃគូកម្ពុជាជាច្រើនក្នុងជួររដ្ឋាភិបាល ធុរកិច្ច និងសង្គមស៊ីវិល ដើម្បីពិភាក្សាអំពីការពង្រឹងទំនាក់ទំនងជាមួយប្រទេសក្នុងតំបន់ ការជំរុញពាណិជ្ជកម្ម ការដោះស្រាយវិបត្តិកូវីដ-១៩ ការប្រែប្រួលអាកាសធាតុ និងតួនាទីរបស់ចក្រភពអង់គ្លេសក្នុងនាមជាដៃគូសន្ទនា ជាដើម៕
