រដ្ឋាភិបាលជប៉ុនបានផ្ដល់ប្រាក់កម្ចីដល់កម្ពុជាចំនួន១៨៥លានដុល្លារបន្ថែមទៀត សម្រាប់ជួយដល់ពលរដ្ឋក្រីក្រ ក្រុមជនងាយរងគ្រោះ មានចាស់ជរា ស្ត្រី កុមារ និងជនជាតិដើមភាគតិច ក្នុងវិបត្តិកូវីដ-១៩ ដំណាក់កាលទី២។
ការប្រគល់កម្ចីនេះធ្វើឡើងនៅព្រឹកថ្ងៃទី១២ ខែមករា ឆ្នាំ២០២២នេះ នាវិមានសន្តិភាព ក្រោមវត្តមានរបស់លោកនាយករដ្ឋមន្ត្រី ហ៊ុន សែន។
បើតាមលោកនាយករដ្ឋមន្ត្រី ហ៊ុន សែន ការបន្តផ្ដល់ឥណទានសម្បទានរបស់ជប៉ុននេះ គឺដើម្បីអនុវត្តគម្រោងគាំទ្របន្តឆ្លើយតបទៅនឹងវិបត្តិកូវីដ-១៩ ដំណាក់កាលទី២ នៅកម្ពុជា។
លោកបានសរសេរនៅលើទំព័រហ្វេសប៊ុករបស់លោកថា៖ «ថវិកាកម្ចីនេះប្រើសម្រាប់គាំទ្រសកម្មភាពនៃការអនុវត្តគោលនយោបាយរបស់រាជរដ្ឋាភិបាលកម្ពុជា ឆ្លើយតបទៅនឹងផលប៉ះពាល់សុខភាព សង្គម និងសេដ្ឋកិច្ច ដោយសារជំងឺកូវីដ-១៩ ជាពិសេសលើជំនួយសង្គមសម្រាប់ពលរដ្ឋក្រីក្រ និងក្រុមជនងាយរងគ្រោះមានដូចជា ប្រជាពលរដ្ឋមានជីវភាពស្ថិតក្រោមបន្ទាត់ភាពក្រីក្រ ចាស់ជរា ស្ត្រី កុមារ និងជនជាតិដើមភាគតិច ជាដើម»។
កាលពីឆ្នាំ២០២០ រដ្ឋាភិបាលជប៉ុនបានផ្ដល់កម្ចីជាង២៣៧លានដុល្លារផងដែរ ដើម្បីឆ្លើយតបនឹងវិបត្តិជំងឺកូវីដ-១៩នៅកម្ពុជា។ សរុបទាំង២លើក ជប៉ុនបានផ្ដល់កម្ចីដល់កម្ពុជាជាង៤២០លានដុល្លារ។
ផលប៉ះពាល់ពីវិបត្តិនៃជំងឺកូវីដ-១៩ បានធ្វើឱ្យមានអត្រានៃភាពក្រីក្រនៅកម្ពុជាបានកើនឡើងវិញប្រមាណជា ១៧,៨% ដោយសារតែការបាត់បង់ការងាររបស់ពលរដ្ឋកម្ពុជា។
លោកនាយករដ្ឋមន្ត្រី ហ៊ុន សែន ធ្លាប់បញ្ជាក់ថា វិបត្តិជំងឺកូវីដ-១៩បានធ្វើឱ្យកម្ពុជាចំណាយថវិកាដែលសន្សំទុកអស់ប្រហែល២ ៣០០លានដុល្លារអាមេរិក៕
